Санкт Петербург маркана ӈока яна’ тер’’ хибяри’’ тоходанаць, ханяӈыдо’ теда таняна иле’’, манзара’’. «Нятва» нюбета землячество округхадана тарпвы’’ хибяри’’ ӈоб’ня ма’’ ламби, округна Предствительство манзара. Маня’’ яна’’ ӈацекы’’ тарця паской маркана танеда университетхана, институтхана тоходана’’.
Ӈокаюв’ ӈэрм яхад’ товы’’ ӈацекы’’ Институт народов Севера мякана тоходана’’. Таняна самляӈг’ юкад вата’’ по’’ ямбан Мария Яковлевна Бармич манзара. Маня’’ яханана соявы, вадюданвы, тоходанвы, манзаравы нява. Теда пыда Герцен’ нювм’ нюбета университет’ Почётный профессор, наука’ манзаям’ пэртява, илеванда ямбан ӈэрм’ ӈацекы’’ е’’эмня тоходанва серкана тарана’’ книги’’ падби. Ӈока хибярим ненэцие’’, нганасан’’, энец’’ вадан’ тохолась. Мария Яковлевна Бармич тохоламбавы хибяри ӈэрм яхана ханярина иле’’. Ӈокаювдо’ илевандо’ ямбан ӈацекы’’ тохоламби’’, хибяхова наука манзаям’ пэрӈа’’; радио’, телевидение’, газета’ манзаям’ пэртя’’ поӈгана таня’’. Ханярина манзарана’’ хибяри’’ тохолкодамдо’ сава ихиня тенедо’, сахарамбидо’.
Мария Яковлевна маля ӈарка хибяри. Тюку по’ ты’’сие ниць’ ирийхана тохолкодана сиднтет ю’’ пом’ мэ’’ӈаваць. Тамальӈгана яндахат’ товы’’ хибяри’’ Санкт-Петербург’ март’ тэворӈаць, сейхад’ миндя’’ вадидо’ тохолкодандо’ мэ’’ӈаць.
Тяхакуй’’ похо’’на Мария Яковлевна Бармич округан’ ӈобӈгэварка тэворцеты. Тарем’ еримбнанда харта со’’явы яханда, Канин’ хоян’ ӈэдалёрцеты. Таняна нита’’ поӈгана варёмда мэць ныланасьты. Теда маля тарем’ ӈэдалёрць нида’’ пирас’’. Ӈодьбянда хусувэй товамда маймбась ӈатесетыва’’. Нерняна товнда’’ яляха’’на маня’’ округна ӈарка ялям’ Няръяна маркана мэтава’’. Тарця яляхана яндахат’ товы’’ мядонда’’ танеӈгу’’. Санкт-Петербург’ маркад’ ӈод товнда нина’’ таня’’. Маня’’ округханана Мария Яковлевна Бармич ӈатева’’. Сян яля’’ ямбан пыда округхана манзараӈгу. Администрацияхана ӈэрм’ тенз’ ненэцие’’ серу тасламбада управление’ манзарана’’ вадам’’на’’: Санкт Петербургхад’ товы мядондана е’’эмня яӈга программа’ хамандавы. Тарем’ еримбнанда, ханзер’’ округна ӈацекы’’ таняна тоходана’’, ханзер ӈарка маркана иле’’? Тикы’ нямна Мария Яковлевнам’ лаханакурць няць хонраӈгува’’.
