Москва маркана XIV международной фестиваль «Русское поле» ваерась, таняна округна’’ этнокультурной центрхад мел’ няхаюна’’ манзараӈаханзь.

Тарця ма’’лёва хусувэй по’ танесеты, таня ӈарка яна’’ си’’ив ю’’ регионхат няхар’’ ёнар’’ мян’ мел’ хибяри’’ манзаидо манэ’’лабтаванзь тэворцеты’’. Хибяри’’, хуний харто яндо историям’, культурам’ теневана’’, хари’’ сёдо, хари’’ тэнздо ӈавори’’ лэтбада’’, декоративно-прикладной творчеством’ тю’’у пэрта’’, ембдяро сэдбада’’, ӈавар’’ сертамбада’’.

Ненэцие’ автономной округхад таня ӈудиди’ мэта няхаюна Александр Ледков няби Маргарита Латышева тэворӈаханзь. «Русском поле» фестивалян’ пыди’ нертеймэвна ядэрӈаханзь, мяканди’ ӈарка наградам’ тэврась тоӈаханзь: «Лучший народный мастер» номинация’ гран-при нянди’ тэвыць.

– Маргарита Васильевна маня’’ выставкана’’ нямна лаханась, экспозициява’’ ненэцие’ культурам’ манэ’’лабтамбись – тыбэрта’’ илӈгад ӈацекы’’ сянако’’ ӈэсонд, хойхана вадюданана’’ ӈамгарихит’’ этнокультурной центрана’’ «Пунушка» журнал’ нямна. Гран-при ня’’амбабни’, ихинани’ лимбякась: маня’’ манзаина саву’’ядонзь. – Александр Ледков мась.

Выставкахана пыда манзаида – хасава ни’’ танець.

Он скромничает и не упоминает, что на выставке были представлены и его мужские оленеводческие пояса «Хасава ни». Александр харта хасава ни’’ сертабада, тикы хавна тамна тарця серт’ нида’’ тохолаби. Этнокультурной центрхана нябимдей по’ мале’ проектадо’ манзарась, таняна хасава’’ ни’’ сертабась тоходанаць.

– Фестиваль саць сававна ваерась! Хэбидя ялярхась, хусувэй регионхат площадка’’ манзараць, фестивалян’ турмы’’ мядонда’’, нумӈгхад сарё сэв’’ ха’’мурпато’ ӈод’’, идо’ савась. «Русское поле» Гран-при – маня’’ командана’’ манзая, тарця фестивалян’ сававна хамяковава’’ манэ’’лабта. Хусувэй хибярин’ хибя сидни’ нядабись, ӈарка вада! – мел’ хасава тарця вади’’ хэтась.

Тамбир’ фестивалян’ тэвормахана нина’’ нядавы’’ Няръяна мар’’ администрация, НАО’ департамент образования, культуры и спорта.