Ханяна ӈэбта ӈод’’ Хоркы’ Хобам’ Мальцяданда мэта ненэць иле. Небянда, нисянда танявам’ лаханако нидя вадес’’. Ӈули’’ ян’ ӈопойриӈэ ялэда мадабида. Ӈавраданда толёда – няхар янда сэв’’, няхар’’ халянда пэхэ’’. Тунда пя – няхар’’ пэвдюкода. Ӈаворпата яляхана ӈопой янда сэвам’ ӈамсеты. Ӈопой пэхэмда пиресеты. Тухунда ӈопой пэвдюкомда мосеты. Нябимдей яляхана юркабата ӈаврата, пэвдюта ӈобтикы ӈокдадандо’ хан’’ӈа. Ӈобӈгуна няхар’’ нянянда сэвам’, пэхэм’, пэвдюм’ мал’ ӈопой яляхана сусадэйда.
Ханяна тад юркаванда ӈобкарт нянь’ яхалм’, пэхэм’, ту’ пям’ ни ху’’. Ханзер’’ ӈэвна: Хоркы’ Хоба Мальцямда мялкадтада. Пин’ тарпы’’. Пя ламбида сера. Сэвда ханя’ сырца’’ – та’ ед ялъй’’. Сянад хунад яднакы: пэда’’махаданда ныланаванзь ӈамды’’. Сыра’ ниня хэдембэй хорова’ хэва’ лым’ манэ’’ӈа. Тикы лым’ паданда мю’ пакледа. Неранда няна ӈопой мядико палы. Мяд’ ядхана юно’ сую сяры. Хоркы’ Хобам’ Мэтам’ нюмданда пяда. Пыда мят’ мятю. Мяд’ мюня пухуця мэвы. Мядонда’ тось пухуця едамда пиремба пя. Пирембада ед мю’ хасава хэбембэй лэмда тале пакледа. Нярава еданда пихива, пухуця ӈамзида тедыда. Тед’’ махаданда, пивы’’ ӈамзида пухуця хэвняку’ сюръяда. Мядонда няда манзь ханада:- Мань нерцю’ ед мю’ ӈамзам’ пиванзь модамзь. Ӈамзами’ пивы?
– Ӈамгэхарт ӈамза яӈгу, хэдембэй лы юсида. – Ханзер’’ ӈамза яӈгода – ӈамзада танясь. Хэд пухуця, ӈамзами’ харт ӈамэр ӈэӈгу!
– Тарця ни ӈа’’: ӈамгэхарт ӈамза яӈговысь – хэдембэй лэрим’ ходамзь. Харт мание, ханзер’’ ӈамзам’ мер’ ӈамдав?
– Ӈэя, тарем’ нибат’ харва’’ – сую юномд ханаӈгув. Хоркы’ Хобам’ Мэта пин’ тарпы’’. Пухуця пуданда тёрыр’’ӈа: – Суюми’ нёр хана’’! Ӈамзадамд толь ни’ мэдамзь. Сававна ӈавор’’. Пудана суюхавами’ нёр хана’’. Ӈаворци’ хаӈгудм’! Маро ӈэва вэва ӈэвы. Юно суюм’ иня’ малан’ сярада. Пунда валӈада. Пухуця тёранда сось хаи:- Хоркы’ Хобам’ Мэта- а-а-а, суюкоми’ тад-д-д-д!
Етри яднаханда мат’’ юнотанам’ едте. Миндо’ ӈобнзер’ ӈэвы. Нумда пэвсюмзь пэдара’ понд’ нултадо’. Хонавандо’ нерня суюм’ вадарта нядо’ ма:- «Хабтода’’ мэёвна сяро’’ яда’’. Пуна екарабто’ сую нямдо’ хадаӈгу’’.
Юнотана’’ ваданда сер’’ сертадо’. Маха’ нид мэтидо’ мэёвна сярыдо. Немто’ тось хонэйд’’. Пи’ сава ерня хасава юркы’’. Суюмда ханада. Нита юно’’ ӈэдэйда. Тобдо’ вэяхана масаръяда. Тале манзаямда мале’’мяхаданда хонёда нида юркабта, тёрда лэрха: -Юркыда’’ ӈамгэм’ сертавы’’? Суюми’ хадавы’’. Нер’’ нянда’’ мадамзи’, хабтода’’ мэёвна сярыда’’,екарабто’ суюми’ хадаӈгу’’.
Сырӈа’’, хабте’’эдо’ мал’ екаравы’’. Юно’ сую яхана юседа. Ӈарханда вэя. Харто’ хабтодо’ тад манэ’’ядо’, тыто’ тоба’’эясавэй’’. Тарцям’ манэкава мат’’ няда ма’’:- Нядна’’ нён нену’, хурка то’’олха юнон’ харван, тарця юнодар хана’’.
Тад тикахад тэмг, мэсыта сава, мерета юном’ Хоркы’ Хобам’ Мэтан’ ми’’ӈа’’. Тедахав’ ни яд’’. Юном’ мэць таӈга ӈэдалы’. Ӈэдалёдаханда маӈгабада тасу’ хабим’ хо. Ханоко’ ниня небянда хальмерм’ сюрманзь хальмераха’’ ядвы. Хоркы’ Хобам’ Мэта хабин’ ма: – Небянд хальмер няни’ тахаркарт, мань нернякуна хар’’ни’ сюртав. Пэдавэн ӈэдарахан, нылаванзь мяканд хань’’!
