Тецьдов, ирабтёв’’!

Хад’’я, марабтёв’’!

Хаерл – танаӈгов’’!

Хаерл – мэбе’’ӈов!

Нюни’ нюи илеӈгу,

Пыда мер’ ни хаӈгу’’:

Пыда теда’ – Василей,

Илебядё Василей! –

Сёход яловорта сюртяв сята тамна сюртяваркаӈэ ханаба хадаеми хыно’’ӈась. Хадаеми си’’ми сялӈо’’омнан ня’’амбасава, саць яб’’мани нид мань ӈани’ пулыта нина тарасадма.

Тарем’ мань ини ӈудо’’ то’’мам’ тензибте’’ нисядам’. Тикар ӈока неняӈгахат си’’ми ӈун’ сярба’’мадо’ таӈэхэна ӈэдарахась – нумда, яда ӈока неняӈгахат мал’ сыйнасава. Сярбахава си’’ми хэ’’ли’ сярбиць – тикар хара вуни ӈа’’. Мяквар мя’’ нив ӈа’’. Нёвна ӈобӈгэв’’ нямданаб’’ ханямна-танямна сисавэй мя’’ал минханда неняӈгаха’’на панӈгу. Неняӈгахабид… Неняӈг’’ хурка ӈэвам’ – хусувэр теневада!

Си’’ми ӈэдахавабто’ мя’’ни терат хусувэхэндо’ юнрасьтыдм’: ӈамгэ мад си’’ми мэвы’’ ӈэбто’, ӈамгэндо’ е’’эмня, мань харвабта те’’над’ ӈарёцӈэ сюрбертавакэдм’? Пыдхавадо’ ванебтёсьты’’, пондан’ няхато’ васанасьты’’. Нисяв, небяв, хадав си’’ми неро’’ поӈгана хо’’мамдо’ ваде’’ласьты’’ – вада’’нанда, мань Ӈарка яна’’ сямянхат ипека вархы Надар лабтанд хасрёхона тямдэдо’’ поӈгана санармэдм’. Нюрте хадав небян ня’ сикартув Тямдэ’’ӈэ нюмдеван’ харвавэхэ’,валакада нисяв тарем’ мамы: – Ни. Хибярир – тямдэ’’ ни ӈа’’! Хасавав нюв Василей ӈэӈгу. Хоседа хардахана сава луца няни нюм’ тарем’ нюмдеби’’. Тикар сомбой хасава ӈацекы.

Тарем’ ти, Василейӈэ мань хаядм’. Маньзьван теневадамзь: неросавэй хасрёнд тямдэдо’’ поӈгана си’’ми вунься’’ хо’’ – мань хар’’н соядамзь. Сямянхат сата тецьдата понд сыв’ соясадма, Ӈарка Пэвдэй ирийхана. Нюдя Пэвдехэд Лимбя ириянд ӈэсонд’ маня’’ выӈгнана’’ хаерл вуни ӈадибер’’: хадан вадавна хаерл тамальӈгана нувот пано’’ техэ золотой мякнанда хоны.

Ханзер’’ соя’’махавав мад ханзер’’ теневнав, валакада мань нябидм сававна тенедм’.

Таӈы ӈэсава. Тиканд нерцюна мань ненэй таӈэмд сяхаӈгарт’ вуньсятыв манэпю’’. Епи! Мохокабты! Тод, хасрёд мал’ лохомэрха’’ – ти мале, тикыд инд’’ӈэ янд нид ӈыдары’’ню’’! Неня-а-аӈг’’! Тикы’’ ватосялмбадид нянд син’, пыян сихи’’, сэвхат ӈэхэдарӈа’’. Тикыт нид мань ханяӈэхэ’’на ярумзетыдм’. Мцнзипой’’. Си’’ми ханзеркава’’ нисяв манэс’’ нив’, ма: – Эхэ! Хасавав нюв. Манэць пыдар – ныхы’’мясьдан хибян ӈэвэнню’’!.. Неняӈгахат таӈылмбин! Тарем’ ӈамгэ савав’… хасавов? «Сэр’’ неняӈгат» тихиваб’’… ӈамгэ ӈэӈгуда’’?!

– Неняӈг’’?! Сэраку’’?! – Пысаван нид ӈэван мюйхарт тайналй’’.

Нисяв нян сырӈа. Пайдыта ӈыльний вархана сюртяв ваӈгця’’ нензабарӈа’’, сэвда ванерабты’’.

– Неняӈга’’я’’ тикы’’… сэрако’’… сятора’’? -тосэйвана юнрадм’.

– Тикамд, хасава нюӈэ, хэта я’’мав,- мунзялма’ хэсь пыда ма, нярмортана муноциеда пуйхалӈа, тикахад нядада. – Хуркари ӈэсь пир’’ӈа. Хибяхавам’ ханя’’ сяторпю’’, хибяхавамд ӈани’’… Тикамд ваде’’ма пон’ ӈа. Илеӈгува’’ – манэтава’’.

Ӈэван мюй мань невхэнда нимня тайналй. Нисяхан ӈамгэхэртм’ нидм’ хэт’’. Ӈэяда! Тэӈэ таӈгнанда неняӈгата яляхана еняси’’ мэсь вунидо’ пирас’’, ӈадьбянда мань хано’’ помна нисян ӈэдалёся’ няю’ нись паромбю’’ ядалъюв’’, ӈамдёрад’ ӈылад тынзям’ нохобтадм’, тёреюв’’:- Хой! Хо-ой! Хо-о-ой!...

Ненэсянда тэхэ’’ тёренанаӈэ си’’ми пясь – вэн’’ мадлыд’’. Тэехэбин мань ӈамгэхэртм’ вуни’’ намдор’’, ты’’ вуни’’ ӈа’’: ян’ паклабэй’’ нямд’’ма. Тикыд мань ты’’ малкнава’ мальӈгана варю’’ нимна сюрберць юнуйнда ямбан’ ма’’ламбинась.