Те’ ёльцяӈгана хусувэй выӈгана тыбэртя’’ ненэциена тэтнава’’ ялудо’ мэ’’ӈа’’. Ханярина иленаӈэ’, манзаранаӈэ’ забоян’ тэвравнда тыдо’ маля яӈгревы’’. Ханяӈы’’ ӈэсыхына хавадава манзаидо’ маля миӈа’’. Тюку по’ забоян’ тэвравы’’ ты’’ ӈамза’ маля ня’’амвы’’.

Маня’’ округханана юр’’ си’’ив ю’’ ёнаркад’ вата тэва’’ . Тыбэртя’’ ненэциена тыдо’ пэрць Нюдя, Ӈарка, Канин, Тиман вымна мюсерць илевамдо’ минредо. Ханярина мюсертина’’ сыра’’ ха’’мась, нюртей тецьда яля’’ха тэвась хаводава’’ нямна ибедорцеты’’. Тыто’ толыр’’ таславы’’, забоян’ тэвравнда тыдо’ яӈгревы’’. Ханярина мюсерта’’ ненэциена тыдо’ янамбовна хаводава ян’ тэврабидо’. Хор’’ ириян’ тэвась округханана ханяӈы’’ ӈэсыхына хаводава’’ манзаидо’ маля пэрцетыдо’. Тюку по’ нюртей ха’’амвы сыра ява’ хор’’ ирий’ хасуюдимдей толыркана тондадась. Нюртейӈэ’ забой манзаидо’ «Красный Октябрь» СПК пэрцетыдо’. Пыдо’ тыдо’ Воркута марад’ хэван’ танабидо’. Хаводалавадо’ таняна ӈэсьты. Тюку по’ ёнар’’ сиднтет ю’’ тым’ хаводаван’ яӈгрець, самляӈг юкад’ вата тонна’’ ӈамзаӈэ’ таслась.

Нянэювна округханана хаводава манзая’’ носиндалава ирийхана минзьты’’. Ӈокханда округна тыбэртина тюку по’ ӈэрё’ хаводаван’ тет ю’’ няхар’’ ёнар’’ тым’ яӈгрець, ӈамзан’ таслась тянё ни’’ӈа’’. Хусувэй СПК, семейно – родовой общинахана тюку по’ ваеравнда хаводаван’ маля хамады’’.

Пудана’’ похо’’на «Восход» нюбета СПК серудо’ сацьри’ савовна ни’’мий’’. Валакада тет’’ ӈэсыдо’ хаи’’, ханяна ненэця’’ тыдо’пэрӈа’’. Таняна хойхана манзаранаӈэ’ тет’’ ю’’ хибяри’’ толы’’. Хасава’’ тыбэрӈа’’, не’’ мядм’ манзаям’ пэртяӈэ’ манзара’’. Серудо’ тоенабнанда ӈод, «Восходхана» манзарана’’ нина’’ забоян’ хамады’’. Тюку по’ пыдо’ ёнар’’ сидя юр’’ мян тым’ хаводавы’’ яхандо’ тэвраӈгу’’. Забоян’ тэвравнда тыдо’ маля хамады’’. Сидя ӈэсы’’ тер’’ хаводаванда тыдо’ маля Оман’ тэврэйдось. Тецьда яля’’ха тэвась тыбэртя’’ забой’ манзаидо’ пяӈгудо’. Омахана забойной пунктандо’ яӈгова’ нид харвабнанда хаводава’’ манзаидо’ Пёшахана пэртыдо’, тарця ибедормам’ СПК «Восход» нерм’ пэртя Николай Латышев хэтась. Ханзер’’ тыдо’ мита’’, сян ты’’ӈамзам’ мирдата’’ тикахад’ хойхана мюсерта’’ ненэцие’’ ил’ переӈгу’’.

«Няръяна тэхэна» манзарана’’ ненэця’’ ӈод хоян’ ӈэдалэйдаць. Теда хойхана мэна’’ тыбэртя’’ кораль’ манзаидо’ пэрӈа’’, забоян’ тэвравнда тыдо’ яӈгремби’’. Сямянд’ нерде тыдо’ нюртей ӈэсым’ пэртя ненэця’’ харад’ хэван’ танаӈгудо’. Ӈокханда «Няръяна ты» СПК няхар’’ ӈэсыдо’, самляӈг ёнаркад’ вата’’ тэдо’. Хавадава’’ манзаидо’ нерняна товнда ирий’ нюртей яля’’ пирка’’на валакада пяӈгудо’.