Округханана’’ те’ ёльцяӈгана ты’’ хабарпава ёльць ӈэсеты. Хойхана мюсерта’’ ненэця’’, тыбэрта’’ нина’’ тыдо’ забойкаха’ танабидо’.

Тюку ялян’ хэтась мале’ тет тыдо’ танеда’’ округна’’ сельхозпредприятие’’ ты’’ ӈамзи’’ хамадамбава серт’ лапцейдаць. Яханана’’ луца’ вадавна хэтась забойной кампаниям’ пя’’. Ӈэлов’, маркана иленаӈэ, несэй ты’’ ӈамзам’ тэмдабаӈгува’’. Тарця юн’ округна’’ губернаторна’’ ма’’лёвахана ӈуда’ ӈылыда Альберт Чабдаров хэтась.

Тюку по’ яханава’’ тарця сер’’ сямянд нерде’ СПК «Ижемский оленевод и Ко» манзарана’’ пядонзь. Таняна ӈокханда самляӈг ю’’ си’’ив тонна’’ ты’’ ӈамзи’’ хамадаванзь ятна’’. Ныланава яля’’ пуд’’ няндо’ тамна няхар’’ хозяйство’’ нядэядаць, тикы СПК «Путь Ильича», «Красный Октябрь», тамна коопхоз «Ерв». Ӈокханда сидя ёнар’’ сидя юр’’ самлязимдей по’ ты’’ хабарпава’’ ёльць ямбан’ 19 хозяйства’’ тыдо’ забоян’ тэврамбаӈгу’’.

– Ӈамза’ няюв тасламбась, ӈопой ёнар’’ юр’’ самляӈг ю’’ тоннам’ ня’’мась тасламбива’’. Тамна тыбэрта’’ харто’ тыдо’ забоян’ тэвраӈгу’’, тикахад ня’’амвы ӈамзина’’ толыр’’ нядаӈгу’’. Ты’’ хабарпава’’ яхад ӈамзи’’ ӈокаюв’ пеляда округна’’ АО «Мясопродукты» предприятиен’ тэвравы’’ ӈэӈгу’’. Ӈокханда таслась, Альберт Чабдаров вадавна, сиднтет юр’’ самляӈг тонна’’ ӈэӈгу.

Тамна округна’’ ӈэвахана мэнана’’ ӈуда’ ӈылы мась, ӈэсыхына илена’’ хибяри’’ ӈамзаси’ нибнандо’ хаю’’, ӈамза мир’’ ханярина ӈоб’ то’’олас ӈэвам’ маниеӈгува’’.

– Теда’ тарця сер’’ манэ’’саръяна’’. Тарем’ Несьхана по’ ямбан хибяри’’ ты’’ ӈамзам’ лавкахана тэмдабась мян’’мам, мирдатна’’ няюв тасламбива’’.

Хорей Верхана илена’’ хибяри’’ вадавна, ӈэсыхынандо’ мирдапада ӈамзидо’ ӈани’’ по’ забойка’ ӈэсонд ни’’ тэвор’’. Ӈокамдась тара. Тарця сер’’ СПК «Путь Ильича» няюв таславаць. Тюку по’ забойкахад ӈамза’’ нормам’ ӈокамдаӈгува’’, ӈопой ӈудаха’ няхар’’ ты’’ ӈамза таславы ӈэӈгу – Альберт Чабдаров ваде’’ӈада – Тикы’ хавна, округна’’ природных ресурсов, экологии, агропромышленной комплекс’ департаментхана маниеӈгудо’, сян’ есявна сельхозкооператив’’ , явнандо’ мюсерта’’, хари’’ тыдо’ маниена’’ тыбэртяхат’’ ӈамзи’’ тэмдабидо’. Яндахана мирдапада ӈамза’’ мирта ӈоб’’ томас ни’’ӈа’’, тикым’ яханана’’ сельхозкооператив’’ харто’ тасламбидо’. Тарем’ ӈэбнанда ӈод’’, серм’ маниеӈгува’’, ты’’ ӈамза мир’’ яндахана нибнанда яӈг’’.

Ханзер’’ округханана’’ тюку по’ яханана’’ манзаидо’ миӈа’’, тикы’ нямна юн’’ тамна танеӈгу’’.