Ваеравы си’’ивхана таневы газетаханана Матрёна Ивановна Талеева школахана, интернатхана иле’’мида ваде’’ӈась. Нюртей’ пелямда маля толараць. Тюку яля’ вадита’ пуданам’ намдада’’.
Ӈопой мэва сидя не’ ӈацекэва’’сата мерцяхана пу’’лэйханзь. Ӈэсындер’ хибяри’’ мал’’ пюрманзь тоць, яӈгумы’ хибяри сюрплава’ ян’ (кладбище) крест’ понд’ не’ ӈацекэхэ’ таркавэхэнзь, таняд’ хибяри’’ хойдось. Мертёвна интернатан’ не’ ӈацекэхэ’ хибяри’’танахаюдонзь, Алевтина Ивановна’ ӈэсына’’ медсестра не’ ӈацекэхэ’ ма’’нэманзь тось, ядембада ӈаволавахана воспитательма’’ сяйлабтабидась, саць нивэхэ’ ханив’’, юӈаха’. Маня’’ саць сейна’’ хаяць, ханяӈы ӈацекы’’ ярӈаць. Тохолкодина’’, воспитательна’’ тикы’ пуд саць вэва нумгана ӈэсындер’’нядаӈговась ханзетыдо’.
Ӈэсындер’’ тохолкодина’’ сахарамбидонзь, ӈобнзер’’ нясъюмба, нидо’ нядамба илець. Ӈэсыхынана’’вэвако хибяри’’, ябехад яӈгуць, мал’’нидо’ теневыдось, няхато’мядоманзь ядэрцеты’’. Ӈарка яляха’’на тохолкодина’’, воспитательна’’ клубхана концертм’ сертабасьты’’, тарасеты’’, хыноцеты’’. Школава’’талмахад тохолкодина’’, воспитательна’’ округна’’ тавна манзаядамдо’пюрць хаяць. Нина Ивановнава’’ харта ӈэсыхында Омаханда тэвыць, таняна хаепа хаясь, тохолкусь, тет нюм’ вадась. Оксино’ ӈэсын’ нянана’’ Варвара Ивановна, Яков Ивановичанда ня’ воспитательӈэ манзараванзь тоӈаха’, Елена Васильевна – луца’ вадан’ тохолкода, хэвханана’’ ӈобтарем’ тось. Пыдо’ харто’ нюдо’ яӈгуць, сидна’’ харто’ ню’ хасуйӈэ толабиць. Хэвний яхана тенаванаси’’саць вэва ӈэӈгусь, пыдо’ сидна’’ нядамбасьты’’, сянзьты’’.
Пуна’ ӈани мая ӈадимясь, Оксино’ ӈэсыхэна школава ӈарханда парась. Маня’’ихинана’’ пуня’ Варандэйхана сидна’’ ханавам’ ӈатеваць, тале енаваць. Тарем’ ӈарка ервха’’на нивыкы серос’’. Варандэйхад тобэйӈэ сидна’’ Няръяна март’ ханаць, лесозаводской школахана тоходанаваць. Няхар’’сахарамбада нява’’: Хатанзейской Варвара Ивановна, хасавада’ Яков Иванович, Чернышева Елена Васильевна ӈани’ ’хэвханана’’ март’ тоць, маньена’’ ёльце маймбиваць. Пыдо’ нивы ӈэбто’ ту, ӈока маям’ маня’’ манэтавакэва’’, ӈока яртавакэва’’. Маркана илева, вындер’ ӈацекэхэ’’на ӈэсыхына илева вуни ӈа, майбцода яӈгусь.
По’ ваера ӈани’ пуня Оксинон’ сидна’’ ханаць. Няхар’’сава нява’’нянана’’ниць ту’’, харвабта ныланаванзь (пенсиян’) хэвакы’’.
Сян’ по’ ваерамахад Варандэй’ ӈэсыхына ӈани едэй школам’ сертаць. Валакада тикы школа геолог’’ ӈацекы’’е’’эмня сертадонзь. Таня’ мале ӈани хибяри’’, тохолкода’’ илеванзь тоць. Варандэй’ ӈэсыхына илебэй хибяри’’ тенад’’ ӈэсыкомдо’ хаедо’, ханяӈы март’ илелъяд’’, ханяӈы’’ӈаи маради’’ няю илеванзь хая’’. Тенад’’ хамада я’’мава’’ ӈамгэ мэнена ӈэсыхынана’’ тарця сомбой, едэй, паской школана’ нём’ ӈацекэхэт таладонзь?
Пуна ӈани’ едэй сертавы школам’ таладо’, хэвняд тобэй хибяри’’ ӈани харто’я хато’ хая’’. Теда’ Варандэй’ ӈэсыхынана’’ терсяда париденя хардакори’’ евакодрев яв’вархана ӈатена ну’’. Харвабта сяхаӈгава ӈани’ едэй школам’ сертаӈгу’’, ӈэсына’’ школа ӈани ӈацекэхэ’’на панӈгу. Школандо’ мюня лэ’’мортарев малнаӈгу’’. Школа танеӈгу – ӈэсыва’’ӈани илелты’’! Илева ӈоб’’нерня’ миӈа, маня’’ ӈоб’’ ӈатенаӈгува’’.
Ӈэрм ӈэсыхынана’’, Варандэйрихинана’’, хар’’на’’ яханана’’ябда илеваць.
