Округна этно-культурный центр’ мякана манзарана’’ нина’’ хуркари’’ тенз’ ненэцие’’ культура’ нямна ӈарка манзаи’’ сертамби’’. Ненэцие’’ отделкана манзаранина’’ӈод по’ ямбан сертавы’’ манзаядо’ тянё нисьты’’ ӈа’’.
Маля сидя ёнар’’ поход’ «Сава сё» фольклорный конкурс’ хамандабсеты’’. Сямянд’ нерде хынокад’ ненэцие’’ Няръяна март’ хыно’’манзь ма’’ламбава манзаям’ пявы Анастасия Федоровна Михайлова. « Сава сё» – пыда и’’ӈута. Фестиваль’ эмблемам’ сертавы хасава нюда Ян Эрнестович Михайлов. По’ ватамбой маля ваера ханзер’’ Анастасия Федоровна яӈгумась, тарем’ ӈод пыда пявы манзаяда тенад’ иле. Ненэцие’’ сё’’ мэта нина’’ округна еркы март’ хусувэй сидя по’’ ваерась турӈа’’. Тюку по’ ӈод тарця ӈарка ялява ваерась. Округна ӈэсыхыт’ хынота’’, тарана’’ хибярина турӈаць. Няръяна маркана илена’’ нянэй ненэця’’ ӈод харто’ сёдо’ конкурсан’ хамадавыць. «Сава сёна» гала-концерт’ «Арктикам’» нюбета КДЦ мякана ты’’ саполана ирийна сидя юдимдей толыркана ваерась. Ӈокханда «Сава сё» самляӈг’ юд мян’’ хибяри’’ ма’’лась, ӈацекы’’ ӈокаць. Сямянд’ нюртей «Сава сём’» невхы сё’’ мэ’’ма е’’эмня таславысь. Тамальӈгана хынокад’ нина’’ тамна ӈокаць. Тедахарт’ сиддо’ тенейна’’, поӈгнандо’ Елизавета Ардеева, Александра Маркова, Александра Коскова, Дмитрий Бобриков, Надежда Талеева. Тикы хибярина’’ малӈэ’ маля яӈгумы’’. По’’ ваера’’, конкурсава ӈод’ несэюмдана. Тюку по’ ваеравы конкурсхана невхы хынс’’ мэта нина’’ ӈока’’ ниць’ ӈа’’. «Сава сёна» невхы хынс’’ мэ’’мы’’ – Надежда Талеева, Федосья Шамсутдинова, Галина Вануйта, Галина Тайбарей, Нина Баркулёва, Светлана Тайбарей, Екатерина Тайбарей, Любовь Белугина, Вероника Талеева, Фаина Ледкова. Диплом первой степени ня’’амвы Филипп Ардеев, Надежда Канюкова. Диплом второй степени ня’’амвы, мядондава Галина Вануйта. Сямянд’ сававна невхы сём’ мэ’’мы’’, диплом первой степени’ ханавы Надежда Талеева.
Тюку по’ ваеравы «Сава сёхона» сямянд’ нюдяко конкурсхана мэвы тет’’ пота ӈацекысь, сямянд’ ӈаркадо’ хасуюр’’ тет’’ пота не Надежда Федоровна Ардеева, Несьхад’ товысь.
Тюкумэвахана ваеравы конкурсхана тарана’’, сё’’ мэта ӈацекы’’ ӈокаць. Ӈацекыдо’ Краснойхад’. Саляхад’ тэвравыць, тикахад’ санаторно-лесной школа тер’’ таняць. Малӈэ’ пыдо’ пэдоваць. Хадри Окотэтта няндо’ тарця вади’’ мэ’’ӈась: – Тюку’ хэбидя яляхана савовна хыно’’ӈадаць, савовна тарадаць. Нюртейӈэ’ хэвы ненэцяӈга сава вадам’ мэтава’’, ӈуда’’ тер митава’’. Нянда’’ ӈарка вада, тюкон’ турмами’ нянани’ ёльце савась. ӈанимэвна тамна тутадм’. Не ӈацекы’’, пирибтя’’, вадамдо тохолабая’’. Ӈани’ тоб’’нани малӈэ’ нянэй вадавна лаханабнанда тара. Тарем’ ӈэя.»
Несьхад’ товы не’’ сававна хыно’’ӈаць, пыдо’ группадо’ «Сава не», тикахад’ Краснойхад’ хынокад’ не несэй хынс’’ тэвраць, Саля” тер’’ некоця пэдоваць ихид’ сёдо’ хайнаць.
