Маня’’ ты’’ яхана илева’’. Ӈокаюв’ ӈэрм’ няна соявы’’, илена’’ нянэй ненэця’’ паӈгудо’ тэхэт’ пере’’. Тыдо’ пэрць ненэцие’’ тэнз’ мэта хибяри’’ пилибт’ выӈгана мюсерӈаць, нянэй мякана илесь’ илевамдо’ мэ’’ӈадось.

Теда ӈод’ тарем’ ӈэ’’нив’. Хусувэй выӈгана тыдо’ пэртя’’ нина’’ мюсерӈа’’. Харто’ илевамдо’ нерняри’’ минредо’. Иринато’, нисянато’ мюсерць ямдо’ сахарамбась нина’’ хойхана манзара’’. Тыдо’ пэрӈа’’, тыто’ хадарць ямдо’ лэтби’’, нюдо’ вадаби’’. Хойхана илена’’ нина’’ варёмдо’ мэць иле’’. Нянандо’ тикахартад’ саварка ил’ нинарха’ тара’’. Ӈодь’ тыт’ хадырць я’ таняя, тыд’ сенз’ ӈэя’’. Мят’ тер’’ хэвханат’ илея’’, сенз’ ӈэя’’, маям’ ехэрась илевамдо’ мэ’’ӈая’’. Хойхана мюсерта’’ нина’’, хой’ илм’ пэртина манзаравандо’ ямбан ныланавам’ ехэрась манзарасьты’’. Похона ӈопой яля’ таня’’ ся’’ня вындер’ нина’’ ныланасьты’’. Ты’ яля. Тарця ӈарка яляхана нина’’ ныланавась ма’’ласьтыд’. Хой’ тер’’ нина’’ хэбидя ялям’ хусувэй по’ мэцьтыва’’. Маля неняӈг’’ ирий’ пудана’ толыркана сямянд’ нюртей ӈарка ялян’ ма’’ласьтыд’. Ӈокаюв’ ненэця’’ ныланавамдо’ пилю’’ ирий нюртей яля’’ мальӈгана мэцьтыдо’. «Няръяна тэхэна» манзарана’’ ненэця’’ ӈод ӈарка ялямдо’ хусувэй по’ мэцьтыдо’. Тикы колхозхана ӈока’’ по’’ ямбан Афанасий Петрович Канюков тыбэртяӈэ’ тарась, нябимдэй ӈэсыхына бригадирӈэ’ манзарась. Хой’ илм’ сававна теневана хасава. Теда пыда маля ӈарка ненэця’, ӈахакуд’ пенсияхана мэ. Тарем’ ӈод сейда’ хой’ ил’ нямна, тыта’’ нямна  пилибт’ няркнасеты. Илеванда ямбан мюсермы ян’ ихинянда тэворман’ харвасеты. Хойхана соявы, хой’ илевам’ маниесь вадювы; илеванда ямбан тэхэна’’ манзаравы хибяри’ сейда хань’ хой’ нямна няркна’’. Тарця хибярихит’ Афанасий Петрович пере.

Афанасий Петрович Канюков Нюдя явна мюсермы’’ ненэцие’’ мякана саво’ ирий сиднтетимдей’ толыркана ёнар’’ хасуюёнар’’ тет юдимдей похона соявысь. Нися’ хасада Петр Иванович Канюков тэхэна’’ мэна хасавась, небя’ хасада Пелагея Михайловна мядм’ манзаям’ пэртяӈэ’ таравы. Нисянда’ хэвхана Афанасий Петрович тыбэрма серм’ торомдась. Илеванда ямбан «Няръяна ты» колхозхана манзарась. Тыбэрӈась, тикахад’ ӈока по’’ ямбан нися’ хасанда ня’’амбавы колхоз’ нябимдей ӈэсыхына бригадирӈэ’ тарась. Таняхад’ ныланавась’ тарпыць.

Тюку ирий’ сиднтетимдей толыркана Афанасий Петрович Канюков си’’ив ю’’ самляӈг помда ядабтась. Со’’яма яляхана ӈока’’ сейхад’ миндя’’ вади’’ намдась. Афанасий Петрович пухуцянда’ ня тет нюмди’’ вадаӈахась. Ӈопойӈэ’ хаёсь Афанасий Петрович маркана нюта’’ хэвхана иле’’. Нюда’’ хусувэй серкана нядабида’’, нюта’’ ню’’ пэрцеты’’. Тад’ нерня ӈод’ хой’ тер ненэця’  илевада сававна миӈая, сенз’ ӈэя, тамна пон’ харта явнанда маям ехэрась ядэрӈая!

Афанасий Петрович нибнанда манзара’’ ӈод  тыта’’ нямна яда пилибт’ няркнасеты’’. Тарем’ еримбнанда пыда хоян’ тэворцеты. Тюку по’ ӈод харвабнанда ты’ яляхана харта манзаравы яханда тэворта. Теда хойхана манзарана’’ ненэцие’’ няюв’ ты’пэрма серу’’ таслабгу’’. Ӈацембой ненэця’’ ӈарка няндо’ вадан’ нзелесьты’’. Тенева’’, илм’ мэ’’мы хибярир’ вэвко серт’ ни’’ табедаӈгу.