Небой по’ пилю’’ ирийхана вэвко юн’ няна’’ тэвыць. Округханана ӈокаюв’ хибярихина теневана нява Александр Иванович Выучейской яӈгумам’. Александр Иванович Выучейский округханана Ӈарка яхана соявы ненэць.

Чёрной нюбета ӈэсыкоцяхана вадюданась. Харта со’’явы ямда сахарамбада хибярись.

Хуркари’’ манзаяхана манзарась пыда сава специалистӈэ’ толюсеты. Илан’ ив’ер сырта хибярись. Илеванда ямбан ӈокавна манзаравы. Нянэй ненэцясь, харта паӈгуда тенена хибярись, ненэцие’’ вадамда мэненась, харта вадамда мэтась. Ханяна нир’ ядтаӈгу, пилибт няданда хари’’ вадам’ намдурцетыдм’, пили ненэця вадавна лаханасьты. Хойхана мюсерта’’ хибяри’’ илевам’ теневанась. Хамадабидась, ханзер’’ тоена хойхана мюсертина иле’’. Ӈока ныхымда ӈэрм’ тенз ненэцие’’ илевам’ савумдаван’ масьтебись. Александр Иванович хуркари’’ тенз’ хибяри’’ поӈгана хари’’ хибярись. Ӈарка общественной манзаям’ илеванда ямбан минренась. Няхар’’ мэвна «Ясавэй» нюбета ассоциацияна президентӈэ’ тэрабиваць, депутатӈэ’ тараванда мальӈгана ӈарка манзаям’ минресь.

По’ маля нява хэвханана ни’’ иле’’. Хибярина ихиня пилибт’ илевнда. Нюда’’ ӈод нисямдо’ тенедо’. Нисяндо’ нювм’ илебтембидо’. Чёрной ӈэсыкоцяхана тенеда хардахандо’ музейм’ сертаван’ харва’’. Тюку ирийхана таняна хасава нюда тэворӈась, нисямда теневана хибярита’ няюв – луца вадавна хэтась: памятной доскам’ илевы харданда’ хэван ӈыдараць.