Тюку яля вадин’’ Валерий Филиппович, Людмила Петровна Апицынха’ нямна ӈэӈгу’’. Пыди ӈока по’’ ямбан Индига ӈэсыхына илеӈаханзь, таняна хусувэнди’ хари’’ манзаяда танясь.
Валерий, Людмила Апицынха’ Индигахана соявэхэ, ӈопой садикан’ ядэрӈаханзь, ӈопой школахана тоходаӈаханзь, ӈопой тохолкода’’ сидди’ тохолабиць.
Сидндет классм’ ёльце’’махаданда Валерий Няръяна маркана Ненэцие’ школа-интернатхана нерня’ тоходанавамда минредась. Людмила Архангельскан’ ӈэдалавыць, педагогической училищехэна тоходанась пядась.
– Нюдакоходан’ садикхана манзаранаӈэ хэван’ харвамась, илӈганани’ тарем’ хая, – образование’ ветеран по’’ ваерась лахана.
Валерий школанда’ пуд’’ Архангельск’ маркы рыбной хозяйство’ мореходной училищен’ тоходанаванзь еримясь. Ленин’ нювм’ нюбета колхоз’ ерв таня тоходанаванзь ӈэдарадась, пыдо халям’ ямӈгана пэрмыць, ӈанодо’ Баренцево ямӈгана, Атлантической океанхана ядэрмыць, Мурманск мар’’ портандо приписка’ ӈэвысь. Училищем’ ёльце’’махаданда ӈацьмбой хасава «Северный полюс» няби «Путь коммунизма» колхоз’’ ямӈгана ядэрта’’ ӈанохона манзарась.
– Баренцово ямӈгана халям’ пэрӈаваць, халям хосеяванзь Африкан’ тэворцетыва’’, – ванерабтёсь Валерий Апицын лахана.
Таняна Валерий няхар’’ по’’ манзаравы. Тикы’ пуд’ соя’’мы яханда товысь, Индигахана наръянамаркы’ рыбокомбинат базахана мастерӈэ манзара пядась.
– Сидя ю’’ по’’ ямбан манзаравы. Тохо’’на’’ халям’ пэрмыць, хуркари’’ халяда ӈока ӈэвысь. Хусувэй яля’ самолёт’’ халям’ хосеяванзь тэворцеты’’, – Валерий Филиппович лахана.
– Си’’ив маттамдэй яляхана ӈэсыхына илена’’ хибяри’’ нядаӈгованзь ханзеты’’, садикхана манзарана’’ ӈани’’ турцеты’’, – Людмила Петровна тарця вади’’ хэта. – Коробка’’ мю халям’ паклебсетыва’’, 19 ӈыдава нялцеты.
Индигахана ябамда ховы
Школамди’ ёльце’’махад Людмила Валерий’ няюв ниди’ ӈэсындо’ культура хардахана тарава’’ ёльцяӈгана ядабтавыдись. 1982 по’ ӈэвысь, первомай’ хэбидя яляхана. Валера пирибцяком сэвтэсь, тараванзь ханадась. Тараванди’ мальӈгана, хонрада: «Пыдар’ нюмл хибя?» Тарцям’ намдхая Людмила пысамъй: «Валера, сими’ нин’’ тумд? Мань Пётр Николаевич Выучейской не нюдм’».
По’’ ваерась тарця сер’’ тензебтесь, писензетыни’. Нями’ хонрабсетыв, ненся сими’ нисян тумд? Харвабнанда, ёненавакэн? Пыда ненсянда’ ӈод’’ сими’ нивы тумд…
Педучилище’ пуд’’ Людмила Хорей вер ӈэсыхы’ детсадхана воспитательӈэ манзаравысь. 1981 похона хардаханда, Индиган’ товысь.
– Манзая’’ яӈгуць, мань садикхана ханяна завхоз’, ханяна ервота’ манзаям пэрцетым. Хаюпа хэ’’мяхадани, хасава нюни’ соя’’ма пуд’’ ведомственной садикан’ воспитательӈэ тодамзь. 1992 по’ ӈэсонд ӈэсыхынана’’ сидя садикваць, ханяна мань манзараманзь, парась. Тикы пуд’’ ӈопой садик’ сертаць, - тохолкода лахана.
Мэнена манзаямда Людмила Петровна тет ю’’ по’’ ямбан минредась, ӈока ӈацекы’’ ня манзаравы. Манзаямда – сямянд сава манзаяӈэ толабида.
Индигахана таневы рыбокомбинат 90-й похо’’на’’ ягумдадонзь, ханярина таневы участок’’, база’’, приемной пункт’’ талыдонзь. Ӈэсыхына манзая’’ яӈгуць. Тикаханана Валерий манзаядамда Варандейхана ховысь. Тикахад самляӈг по’’ ямбан манзараванзь таня ӈэдалёрӈась, плотникӈэ, столярӈэ таняна манзаравысь. Ӈоб’’ пиркана мяканда тэвась, нянда мавы’’ – ӈэсына’’ ЖКУ ервотаӈэ ту’’. Ти, тарем пенсиян’ тарпван ӈэсонд таняна манзаравысь.
– Коммунальной хозяйство манзаям’ пэрмахана хасенава яӈгусеты. Та’ мальӈгана сяхаӈгарт нисетыва’’ нылана’’, те’ ёльцяӈгана тэтнасетыва’’. Манзаява’’ ӈока ӈэсеты: ГСМ’, пям’, уголь’’, запчасть’’, хуркари’’ тарана ӈавори’’ ӈэсын’ тэврабсетыва’’, – хурка манзаи’’ пэрцеты’’ Валерий Апицын нюмдейда.
Людмила мась, вэсакоми’ пили’’ манзаяхананда мэсеты, тэтнавандо’ ёльцяӈгана ялэ’’, пий’ манзарасеты’’.
Валерий Филиппович манзарась теневана хибяри, хусувэй серт’ ивъер’ сырта, хусувэй манзаямда сававна пэрта. Ӈэсыхына илена’’ хибяри’’ нямдо’ сахарамбидо, тенева’’ – пыда мэйрёда, сата хибяри.
Иланди’ маймбцо’’
Пудана’’ похо’’на’’ Апицынха’ Искателькана илеӈаха’. Людмила Петровна, мята’ пэрта, ӈудида’ мэта некоця. Пенсиян’ хэ’’мяхаданда крючокхана сяродась тоходанась, теда хуркари сомбой манзаяко сярбасеты. Валерий Филиппович бассейнан’ тэворцеты, сидяӈг’’ сертабасеты’’, пыда архивнанда хари’’ яна’’ нямна сертавы’’, хибяри’’ сидяӈг’’ ӈока, исследовательской манзаи’’ падаби.
Пыди’ ӈобкана пивня ядэрцетыхы’, толанзёва серм’ харвабтади, библиотекаха’ тэворцетыхы, «Арктикан» кинон’, концертха’ ядэрцетыхы. Марад илм’ мале’ сававна торомдади. Ханярина хари’’ янди’ тер’’ ниди’’ ядабтабнанди, маймбасетыхы.
2024 похона Апицынха’ хари’’ семьянди’ тет ю’’ пом’ ядабтаӈаханзь. Пыди’ няхар’’ нюм’ вадавэхэ’, сидя хасава Виталий няби Евгений, не нюди’ Алёна.
– Мани’ хасую’’ внукми’. Ӈаркаюм’ сидя ю’’ пода, сямянд нюдякони’ – нябимдей покцяда. Ӈэсыхына илевани’ мальӈгана сиддо’ ӈояк’ маниесетыни. Тедахова няха’’на’’ пили’’ тэворцетыва’’, маймбцо, – Людмила Петровна ма.
Людмила Валериянда’ ня тет юкад вата по’’ илеӈаха’, ӈокавна манзаравэхэ’, нюди’’ вадавы’’, теда’ внукди’ вадабась нядаӈгуху. Нерняна сидди’ тамна ӈока ябдава по’’ӈате’’, хусувэй серкана мал’ сава ӈэя’’.
