Таӈы’ мальӈгана культурам’ пэртя’’ ненэциена манзаидо’ нисьтыдо’ хаембю’’. Тарця манзаям’ минрена’’ хибярина ныланавидо’ ӈобнзер’’ сяӈгарт’ нисьтыдо’ мэс’’. Нито’ пумна ныланава’’ ялудо’ мадабасьтыдо’.

Ӈодьбянда та’ ёльцяӈгана ӈод’ культурахад’ перена’’ мероприятия’’ ханярина танесеты’’. Этно-культурный центрхана манзарана’’ нина’’ теда ты’ яляха’ хамяку’’, Хибяховидо’ хоян’ ӈэдалаӈгуд’. Ты’ ялян’ хамандавы программыдо’ таняна манэ’’лабтаӈгу’’. Вэба’’ ириян’ тэвась маня’’ округханана маля ӈарка фестиваль’ ваераӈгу. «Енава мюд’» – «Аргиш надежды» нюбета Межрегиональный детский фестиваль национальных культур таневась’ мэ’’. Яханана тарця фестиваль’ теневам’ ӈани’ я’ тер’’ хибяри’’ ӈод тенева’’. Тарця ӈарка яля’ танева’ мун’ ӈаха’’ тэворӈа’’. Тюку по’ округханана ӈацекы’’ поӈэ’ таславы, ӈодьбянда нянэювна ӈацекы’’ харто’ пыдадо’ манэ’’лабтавась ма’’лаӈгу’’. Тикахад’ Россияна’ Государственный Дом народного творчества юр’’ пода пангу. Тарця сер’ ед фестивалькана концерт’’, выставка’’, творческой лаборатория’’, мастер-класс’’ ваеравы’’ ӈэӈгу’’. Яндахат’ товы’’ мел’’ хибяри’’ манзаидо’ тэвраӈгу’’, хынокад’, тарана’’ ӈацекы’’ товась’ ятна’’.

Тюку по’ ваеравнда фестиваль’ яндахат’ товы’’ хибяри’’ ма’’лаӈгу’’. Сидя’ хэвхы округхад’ товнда таня’’ – Ямало-Ненецкий, Ханты- Мансийский округ’ ӈацекы’’ маня’’ ява’ манэ’’мась товась’ ятна’’, тикахад’ Мордовия, Удмуртия, Ӈысма республикахат’ товнда танеӈгу’’, харто’ коллективдо’ тамна Ленинградской областьхад’ товнда манэ’’лабтаӈгу’’. Ӈарка хибяри’’ хавна тамна ӈацекы’’ самодеятельной коллектив’’ танеӈгу’’, харто’ хынота’’, сё’’ мэта’’ ӈод фестивалькана танеӈгу’’. Ӈани’ яхат’ товы’’ хибяри’’ хавна маня’’ округна ӈэсыхыт’ товы’’ хибярина округна еркы март’ тута’’.

Няръяна маркана «Енава мюд’» ӈацекы’’ межрегиональный фестиваль’ национальных культур тюку по’ манзаямда вэба’’ ирий сидя ю’’ самлязимдей яляхана нэӈгуда. Няхар’’ яля’’ ямбан манзараӈгу’’, таӈок’’ яля’’ ямбан ӈока’’ мэкад’ коллектив’’ тэвравы’’ манзаидо’ манэ’’тава’’.

Яндахат’ товы’’ хибярина ӈобкана ма’’лась нито’ манзаи’’ манэ’’та’’, лахарёдо’ нерня манзарава нямна мэта’’. Хуркари’’ тенз’ мэта хибяри’’ нито’ няюв’ ӈопой серм’ минребнандо’ поӈгнандо’ нись’ поелахарамбю’’ илевамдо’ мэтадо’, тарем’ яхана ӈэбнанда нив’ тара’’. Нина’’ илм’, культурам’ теневабна хынёси’’ илеӈгува’’.