Пудана ӈарка сайнормахана ненэциена тет по’’ ямбан сайнорӈаць. Хусувэй выӈгад’ ненэця’’ хаяць. Недо’, нюкцидо’ мякнандо’ хаиць. Ӈаркамбой ӈацекы’’ сайнорма по’’ тенад’ тенейдо’. Тарця хибяри’’ Саляхана ӈокаць. Теда ӈод’ тикы ӈэсыхына хибяри’’ иле’’, хуний саю’’ по’’ мальӈгана ӈацекыць.
Михаил Трофимович Ардеев округна тыбэртя’’ ненэцие’’ поӈгана теневана’’ хибяри. Пыда вадё’’махаданда ӈока по’’ ямбан тэхэ’’на мэнаӈэ’ манзарась. «Выучейской» нювм’ нюбета колхозхана тыбэрӈась, бригадирӈэ’ тарась. Манзараванда мальӈгана ӈэсыдо’ пилибт’ нердесь, ненэциедо’ ив’ ер манзараць. Михаил Трофимович санорма по’’ тенейда, тамальӈгы илевандо’ нямна тарця вади’’ мэ’’ӈась: – Небяв Анна Александровна, нисяв, Трофим Михайлович’, нив тене’, яӈгумбата сидя пов ӈэвангабясь. Нельмин Саляхана илеваць, вэвакоцявна илеваць. Ёнар’’ хасуюёнар’’ тет ю’’ нябимдей похона школан’ хаям’. Табседехэна тоходанамась, интернатхана илеваць. Ембдёхова мальцятамась, пибитамась. Сыра’ ямбан’ ӈопой пиваха’’на ядэрӈамась. Ембдертув небяв сэдбись. Нюртей някувана савась, сававна ӈавламбиць, пиребэй ӈавар ӈэсьты. Нись ӈаха’’на рюжа’’ танесеты’’. Наваӈга, сайка нермя’ хэвхана ӈонатёсеты. Халядава’’ подышка’’ тагаха’’на хосеясьтыва’’. Подышкап екаӈгур ӈэсяко таӈэ. Пэвсюмбдькохона хонава’ нерцюна нермя вар’’мана пахан’ хэсьтыва’’. Еранзёда ягосеты. Тикымбохона халядава’’ пэрцетыва’’. Сайкам’, наваӈгам’ ӈайбадбасетыва’’. Столовойхана ӈо’’ тикы халям’ пиребасеты’’. Сайнорма мальӈгана ёнар’’ хасуюёнар’’ тет ю’’ няхарамдэй тет ю’’ тетимдей похова’’ вэвако’’ по’’ець. Сахар’’ли вуни тэвор’, нянь тянёсь.
Тоходанван мальӈгана хуркари трещетка, пя туни сертабиваць. Паха’ варувна ядэрма сер’’ трещеткаха’’на марнэрӈаваць. Урок’’ мальгана тарем’ ядэрӈаваць. Луца тохолкодахат, сайнормахад сидя хибяри ва’’лабэйха’ ӈэвангабяхась. Ӈанидо’ ӈацьмбой’’ тохолкодаць, лакувна педучилищем’ ёльцебэй’’ ӈэвангабяць. Хасава ӈацекэхэв ӈокамбоясь, мал’’ нюдяць. Ӈаркамбой’’ хойняри’ хаяць, ты пэрць тарась.
Победа’ нямна юнм’ Нельмин Саляхана намдамась. Школахад хунываць, мале нимась тоходан. Ӈарка хибярихит намдамась, манзраван сер’’. Война’ пуд ненэциена’’ вадбой’’ турӈаць, поӈгнандо’ мерёлебэй’’ таняць.
Война’ пуна ёртяӈэ манзарамась, талранаӈэ тарамась. Тикы пуд ненэй тыбэртяӈэ’ хаядамзь.
Тарем’ сайнорма по’’ мальӈгана ӈацекына илець, вадюданаць. Тедахова пыдо’ малӈэ’ ӈармбэй хибяри’’. Михаил Трофимович Ардеев теда ӈод’ Саля’хана нюта’’ хэвхана иле. Тад’ нерня ӈод тамна пон’ хынёси’’, сайнормам’ ехэрась, сенз’ ӈэсь илея. Сава ихиня хусувэй ялям’ ядабтабая.
