Маня’’ илесь’ яханана тыбэртя’’ хибярина’’ пилибт’ илець, теда ӈод’ тыдо’ пэртя’’ хибяри’’ хусувэй выӈгана мюсерӈа’’. Ӈокаювдо’ нянэй ненэця’’. Ненэця’’ илевадо’ тэхэт’ пере’’. Хуркари’’ тоенана сер’’ танябнандо’ ӈод маня’’ хибярина варёмдо’ мэць тэкоцидо’ маниесь илевамдо’ хойхана мэ’’ӈадо’. 
Тарця хибярина харто’ ныхыто’ енась иле’’, манзара’’, нюдо’ вадаби’’. Тыбэртя’’ нина’’ ӈарка ялям’ хусувэй по’ мэцьтыва’’. Ты’ ялява ӈатесетыва’’. Тарця ялян’ тэхэ’’на’’ ниня’’ мэнаӈэ’ ӈод маймбасьтыва’’. Мал’’ маня’’ паӈгуна’’ тыбэртяхат пере’’. Ӈокаюв’ округна’ тер’’ нянэй ненэця’  иринадо’, нисянадо’ тыдо’ пэрць хусувэй выӈгана мюсерӈаць. Хадунадо’, небянадо’ нянэй мякана илець, хасавидо’ нядабиць, нюдо’ вадабиць. Невхы’’ похо’’на ненэця’ мяд’ терсавэй мюсермы’’ ӈэ’’ним’’, хардан’ ӈояк’ тэворцеты’’. Хой’ тер’’ хибяри’’ тены’’ по’’ тотрев’ хардахана ниць’ иле’’. Тедахова хойхана мюсертаӈэсь округханана си’’ив ёнар’’ нянэй ненэцяӈгат’ валакада ёнаркад’ вата хибярива хой’ илм’ мэтаӈэ’ таславы’’. Семьясавэй мюсертина’’ валакада Канин’ выӈгана, Ӈарка яхана иле’’, тыдо’ пэрӈа’’.  Нюдя я’ терхова’’ ӈахэт’ маля сменной выпас’ мэ’’ӈа’’. Нюдя яхана «Выучейской» нювм’ нюбета колхозхад’ хаювы’’ тэкоцидо’ семейно-родовой общинахана пэръядо’. Таняна манзарана’’ хибярина тыто’ толыр’’ ӈокамдабидо’. Ӈокханда маня’’ округханана тыбэртя’’ ненэциена юр’’ синдтет ю’’ ёнар’’ тым’ лэтби’’. Тыбэртя’’ хибярина харто’ манзаяхато’ ив’ ер сырӈа’’. Ямдо’ лэтбась, тыдо’ сянзь’ манзара’’. Ты’ яляхана ӈокаюв’ тэхэ’’на’’ мэна’’ хибярина ихид’ миндя’’  вади’’ намдаць. Тарця яляхана хойхана илевандо’ ямбан манзаравы’’ хибяри’’ ӈод юрбада’’ нисьты’’ ӈа’’. Хойхана тыбэрмы’’, мяд’ манзаи’’ минревы’’ ненэциена Няръяна маркана ӈод’ ма’’лабсетыдо’. Тюку по’ ӈод тарем’ ӈась. Илевандо’ ямбан «Харп», «Ерв», «Няръяна ты» колхозхана, сельхозстанцияхана манзаравы’’ не’’, хасава’’ ӈарка ялян’ турӈаць. Тарця хибяри’’ поӈгана ӈока теневана’’ нина’’ манэ’’ӈаваць. Мария Павловна Тайбарей теда Краснойхана иле, пода маля ӈока’’. Хойхана соявы, тикахад’ илеванда ямбан хойхана манзаравы не. Вэсакода «Харп» колхозхана тыбэрӈась, пыда мядм’ манзаям’ пэртяӈэ’ тарась. Пётр Николаевич Вылка ӈоб’ «Харпхана» манзарась, бригадирӈэ’ тараванда мальӈгана ӈэсыда нердесьты’’. Пыда ӈока’’ сававна манзарана тыбэртям’ вадась. Теда ӈод’ нюнди ню Максим тэна’’мэ, маля сян’’ по’’ ямбан харта ӈэсынанда бригадирӈэ’ манзара. Иринда тохолавы хасава ӈоб’ манзаямда мэнеда, теневада. Харвась хойхана манзара. Пётр Николаевич  неда Мария Максимовна ӈоб’ мяд’ манзаям’ пэртя некоця. Манзаравамда «Няръяна мякана» медучилищем’ ёльце’’махаданда пявэдась. Тарем’ самляӈг’ юкад вата по’’ ямбан хойхана мюсерӈась. Теда пыди’ Краснойхана илеӈаха’, харти’ мяти’ таня. Нюди’’ нисянди’, небянди’ мят’ турцеты’’; нюти’’ ню’’ ӈод хадандо’, ириндо’ хардан’ маймбась ядсеты’’. Хаювы’’ ӈарка яляхана Мария Максимовна, Пётр Николаевич Вылкаха’ мядоманзь’ март’ тэворӈахась. Пыди’ ӈод манзаравы поди’ тэри’’ тарем ни’’ хаю’’. 
Ты’ яляхана хусувэй илеванда ямбан тэхэ’’на’’ манзаравы хибяри’ сава вади’’ намдась. Тарем’ пилибт’ ӈэбнанда тара’’.