Яханана паднана’’ ненэциена тянё ни’’ӈа’’. Луца вадавна паднана таня’’, ненэця’ вадавна паднанина’’ теневына’’. Матрёна Ивановна Талеева тохолкода, паднана. Тюку яля’ «Вы ӈодя’’» лаханакомда толада’’.

Вы' якоцява" мал' тасехэйӈэ хая. Ӈэрёй пирибця вымна яда, янда’’амна сырӈа. Пыда тасезэй имбытадм' сервы. Нерданда Мерця няби Тецьда ядӈаха'. Мерця халэвко ембдярм' сервы, Тецьда нумлаха ембдяро' мэ’’ӈа. Пыди' Ӈэрёй' хэван тоӈаха', пыда нянди' маймба лахана.

Ӈэрё: - Саць ӈоб’’ яндаха’’на паской, я саць паской,  тасехэй, мань тарем’ сертав’’! Нянанди' сава?

Мерця: - Ӈамгэ тякахана ядэрӈан? Пыдар ватор ваера.

Тецьда: - Ти, мань мертёвна питартав’’.

Ӈэрё: - Ювэй, саць теци, ёльце вэвади'!

Мерця: - Нянов’’ мертёвна питарӈарню’’, пэдаван!

Тецьда: - Хэхэни', ядэсумбхани', тамна хибяхавам' ядэбтаӈгуни'.

Хувы. Лахаця' ниня Мараӈга сиды, няби лахаця' ниня Лынзермя хоны. Мараӈгар сиды, ӈэвамда илада, ханимбэй сада' ит' сырӈа, няханда лахана.

Мараӈга: - Ехэй, сава нявэй, пи' ӈамгэхэвав’’ хадкавы? Няюн сыр’’! Паской ся’’ам хуркаӈэ хая?

Лынзермя: - Мань ӈани'  ӈамгэхэвав’’ хадкавы. Махав ирт мэсь я’’мадм'. Сит тумда я’’мадм', мань хуркадм'?

Мараӈга: - Ти, пыдар ся’’ал, пыдар ся’’алхар ни ӈа. Сит нидм' тумд.

Лынзермя: - Ювэй, ювэй! Нянов вэванёв’’! ( яр’ хана )

Тецьда: - Ӈамгэ ярӈади'? Мани' сити' тарем' сертани'!

Мерця: - Мани' теда Сывыком' ӈатени'. Пыда ватода тута.

Мараӈга: - Торовов! Нянани' ӈамгэ ӈэӈгу?

Лынзермя: - Сидни' нядади'. Ӈарка вадам' хэтӈгуни'!

Тецьда: - Мани нянди' нини' нядаӈгод’’. Сава нями' ӈатени'.

Мерця: - Мань нядаӈгудм', сидди' путадм'.

Тецьда: - Теда' пыдар мер серм' сертар’’, пэдаван!

Мерця: - Вы' я мал' париде, маренуй тиртя’’ мун’’ со’’, пыдо’ иба ян’ тиныд’’. Тецьда инда вато’, Мерця саць посна. Лахаця’ ниня ензьдей ӈамды’’, паской сём’ мэ’’ӈа’’. Ӈаркадюта' хэвхандо' Тецьда, Мерця тоӈаха'.

Ензьдей’’: - Торовов! Пустой мэди', маня’’ няданди’ нива’’ пин’’.

Тецьда: - Теда' сава нями' тута. Ти, сейда ханта!

Ензьдей’’: - Ханяна мэда, таня тоя, хурка ӈэбта?

Мерця: - Пыда мале хахаи. Пыда паской, саць сэрако!

Тецьда: - Сывыко, таля!  Сит ӈате, сейдо' харен’’!

Сывы: - Ӈани торова! Сидя сава няв, ӈамгэ тёрырӈади’?

Тецьда: - Торовов! Сывыко, сыр’’, лахаця’ ниня сава няс’’ ӈамды’’,сит хаӈа’’.

Сывы: - Торовов, Ензъдейко’’! Ӈамгэ си’’ым хаӈада’’?

Ензьдей’’: - Торовов! Ти, Сывыко, хуркан!  Маня’’ сит ниваць хай’’, няданд нива’’ пин’’. Маня’’ нара тамна сензва’’ ӈэӈгува’’, няна’’ мал’’ маймбаӈгу’’!

Сывы: - Ти, теда', сырӈада’’, нивыданю’’ нядан пин’’! Мань ватов то. Сидя сава няв, си’’ым нядади’. Мань япда сырахана сиддо’ тондаӈгудм’! 

Мерця: - Сывыко, пэдаван, ёльце мертёвна сырахана талыд’’. Ӈобкарт ӈодя яӈгу. Ювэй, маня’’ теда’’ ӈаркдётава’’! 

Тецьда: - Сава няхаюн, тамна' нерня', сейдо' харебаванзь, хэхэва’’! (Маймба хая’’ ).