Сидя юкад’ вата по’’ тяхана Варандэйхана илевы’’ нянэй ненэця’’ илевась округна еркы’ март’ тоць. Хибяхова’’ тамальӈгана харвась’ товакы’’, хибяхови’’ ныхыри’’ тюкон’ тэвравакыдо’. Ӈэсымдо’ таладось, лавкамдо’ сусададось, свет’ ӈэсынандо’ яӈгусь, хибяри’’ манзаяси’’ хаиць. Ханзер’’ илеӈгун’?

Ӈодьбянда хибярина’’ март’ тоць. Варандэйхад’ товы’’ хибярина тедая’’ Искателькана, Няръяна маркана иле’’. Хибяхова’’ манзаядамдо’ хось, манзара’’. Ханяӈы’’ хибяри’’ тенад’ манзаяси’. Ихиняндо’ пуня’’ харто’ ӈэсыхындо’ хэван’ харванарха’. Хари’’ ватовнандо’ илесь’ торомбэй хибяри’’. Нянэй ненэць’ ханебнанда’ тара’’, ханисэйм’ ня’’амарпабнанда, ёрпата’’. Тикахана илевада таӈга минда’’ . Маркана тарцяр’ яӈгу’’ нив’’. Харта’’ ватовнанда иленар’ марад’ илм’ мэць нида’ пирас’’. Марад’ илӈгад’ ханяӈы’’ ненэця’’ юхуборӈа’’.

Сидя юкад’ вата по’’ тяхана Варандэйхад’ товы’’ хибяри’’ поӈгана тарця хибяри’’ ӈод’ таня’’, хуний маркана илевамдо’ мер’’ торомдадонзь’, манзаядамдо’ хось тенад’’ манзара’’. Ӈарка хибяри’’ манзаидо’ ёльцесь пенсиян’ тарпыдаць, теда нылана’’. Тарем’ ӈод Валентина Васильевна Чупрова.

Тикы не округханана соявы, паӈгуда Канинхана мюсерта’’ ненэцяӈгат’ пере’’. Няхар’’ юкад вата по’’ ямбан Варандэйхана илесь, таняна манзарась, нюда’’ сояць. Няръяна маркана Валентина Васильевна семьясавэй маля сидя ю’’ по’’ ямбан иле. Валентина Васильевна нямбара некоця, та’ мальӈгана таневы хэбидя яля’ мальӈгана пыда’ няюв’  лаханакурӈамась. Тамальӈгана нями’ тарця вади’’ хэтась: - Канинхад’ томась, ӈахэт’ маля. Сидя ю’’ по’’ ямбан Няръяна маркана илем’. Тикы нерцю Варандейхана няхар’’ ю’’ тет по’’ илеваць. Таня’ тюбан’ тамна сидя ю’’ пов’ яӈгусь, сиднтет яӈганя повась. Мирдатнаӈэ’ манзаравась. Сававна таняна илеваць, манзараваць, мядуна’’ таняць, ӈацекына’’ вадюданаць. Тикахад’ тарця серт’ тэвына’’, ӈэсыва’’ таладо’. Маня’’ ханя хантавата’’? Ӈацекына’’ таня, таняна маля’’ манзая’’ яӈгу’’, ӈавар’’ яӈгу’’. Хаява’’ ӈахы’’ илесь’ ядана’’. Маркана мятава’ таць, минханда маркана илелъяна’’. Мал’’ тюкона илева’’. Нюн’’, нюн’’ ню’’ тюкона иле’’.

Корр: Хурка, маркана илесь саварха’, торумада’’?

- Ханя’’ маля хантавата’’? Илева’’ маля, ханя’’ хантава’’, мюсерӈава’’ тарем’.

Корр: Теда театрана’ сянакун’, ханзер’’ тюкон’ тэвсин’?

- Тюкохона сянакода’’ хибяри’’ пилибт’ тарасеты’’. Вадам’ теневана’’ хибярина тянё’’. Мань’ нем’, хари’’ вадавна лаханам’. Сюв’ нюрте Серафима Петровна тюкон’ хаӈась. Мась: някуна’’ ту’’, хэвханана’’ театрхана сянакодан’. Тарем’, том’. Репетицияха’ ма’’люрцетыва’’, выступайговась’ ядэрцетыва’’. Тадхова хаюм’ тюкохона. Тэри’’ сава. Нина’’ манэ’’пива’’, поӈгнана’’ лаханакодава’’. Хардахана ӈамдёва вани’’ӈа’’, тарця сер’ пэдаси’’.

Тюкохона хари’ вадавна поӈгнана лаханорӈава’’, ненэцие’’ вадаку масьтебива’’. Мань’ ӈопой масьтевы’’ манзаянана’’ пирибця’’ небяӈэ’ тарам’. Тикы манзаява’ сян’мэвна маля манэ’’лабтабиваць. Ханзер’’ сянакум’? Мань’ ханзер’’ хэтгув’? Мань’ нянан’ саварха’. Хибярина’’ хурка ӈэбнанда? Харто’ хэтгудо’. Теда манзарабнана’’ ӈока хибяри’’ сырмась’ тоць, ихиняндо’ саварха’. Тикахад’ нянана’’ ӈод’ сава. Нумда сава, иба, яля, хаяр. Тикы’ ӈани’ маймбцо. Хибярина’’ нылана’’, маня’’ ӈани’ хэвханандо’ ныланава’’.