Параӈода’ не манзарана’ мякана илекари сер’’. Сита ӈавламби, пин’ хан’’ла. Илеванда сер’’ ӈобо’’ манзеты: - Параӈода’ солдат няхар’’ нядахава нядэйнась. Ӈобкартадо’ нись ха’’. –Ӈули’’ сиякан. Ӈобкарт ядэро’’мар яӈгусянё’’. Харад’ поӈгана етри’ лаханакурӈа’’: - Сидна’’ ӈоб’’ ябта сер’’ луца нядабись. Хыбяхартава’ нись ха’’. Нерде хэб’’на’’ мэкада сэр’’ юнось. Нябимдей’ париденя юнось. Няхарамдэй няръяна юном’ мэ’’ӈась. Хыбя ӈэдакы?

Ся’’ны ӈэбта ӈод’’ ӈодиманзь вэсако хая.. Няхар’’ ӈодя’ сэвам’ сепанда мю’ мэ. Сидя ӈодяда ӈули’’ няръяӈаха’, ӈопойдо ӈули’’ париде. Мяканда тэвы’’. Параӈода’ не манзарана хонрада: - Ханя’ ханцан? – Ӈодиӈадамзь. Няхар’’ ӈодям’ ходм’. Хуняна ӈани’ ӈодиманзь хантадм’. – Тикахавана ӈодядами та’’ма.

Вэно савар не манзаранан’ няръяна ӈодям’ ми’’ӈа. Тикы, ӈодям’ ӈамы няда, сава мирбян’ ха’’амы’’. Ӈули’’ паромба сава мирбямда манэ’’ параӈода’ не нюн’ сюрбы’’. Параӈода’ не ню сядота нямна манэвакава Вано саван’ сюрбы’’. Сава мирбян’ ха’’амаван’ ӈани’ харбилы’’. Тикахавад Вано савацяр параӈода’ не нюн’ париденя ӈодям’ ми’’ӈа. Ӈодям’ пеӈганда мэда, мяканда сюрбы’’. Мякананда ӈодямда ӈамада. Яхадэй хороваӈэ хая. Мята мюй ӈамӈгэрида маламбой’ тахабтэйда. Параӈода не нюмда ханзеркарт’ савумда я’’амада. Иба я’ сей’ параӈодам’ тэвара’’. Савумда выдара, хабцянда ӈамгэ ӈэдакы. Ӈопой Ӈэрм сей’ параӈодари теневавы. Манзь ханада: - Харт мят вэкана иленя Вано савахад ехэравэнанё’’.Пыдрида не нюмд савумда пиртада.

Параӈода сидя солдатан’ тарем’ ма: - Вано савам’ тюкон’ тэврари’. Ӈамгэ’ пирка’’на Вано савам’ тэвради’. Мят’ тю. Параӈода нянда ма: - Вано сава пыдар ӈэвэнанё’’. Теда не нюми савумтаб’’нанд неданд мэӈгур. Иб’’нянд ӈэвамд туросатавы лата’ ед’ сапаӈгува’’.

Вано сава параӈода’ не ню’ илелаван’ тэвы’’. Няръяна ӈодянда сэвам’ яхадей хорова’ нянсин’ мода. Ӈодямда ӈамада ӈахат мирбяханда ха’’амы’’. Ханяцей сядо’’ӈа. Пилибт’’ неданда мэда. По’ ӈэсоӈгана хасава нюди’ соя. Ӈаво’’ пирка’’на яханда харбилы’’. Параӈодам’ хонрада, няда тэрихив ма’’нив’: - Сит табэда нидам’ пирас’’. Тикахав ханас’’, тур’’. Тиканда ятнолы’’. Хардата хэвняку’ хая: серан мюд палкасавэй хорованда хобам’ ӈадимде. Хобанда ни’ ӈамды’’. Ма’’нив’: - Невыхы параӈодани хардаха’’ си’’ми тэвара’’.

Пон’ нись мы’’ тэвы’’. Ӈани’ параӈоданда хард’ нимня ӈадимя. Нехэюта ня’ ядаю Сидя хасава нюдя мале ӈармэхэ’. Мякананда сиив яля’ иле. Си’’ив’ ӈэсоӈгана параӈодаханда ма’’: - Няхаюд тихи’. Пыдари’ высэймбати’ няби параӈодоӈэ тараӈгува, няби марцэхэданда таран. Мань тюку яхана нидам’ илеӈгу’’. Вадида мэсо’’махаданда хорованда хоба’ ни’ ӈани’ ӈамды’’ – тю’’уцей’ тарада. Нув’ параӈоданда харда’’мна ӈани’ ӈадимя.

Вано саванд ню ӈарманда сер’ параӈода е’’эйӈэ таралъ’’. Пыди’ луца’ хэхэӈэ хаяха’.

Лаханако’ малда