Маня’’ яна хусувэй ӈэсыхына ӈацекы’’ вадюдана’’, хусувэй ӈэсыхына ӈацекы’’ школахана тоходана’’. Вэба’’ ириян’ тэвась ханярина илена’’ ӈацекы’’ тоходанва помдо’ пясьтыдо’. Вэба’’ ирийна нюртей’ толыр яханана ӈарка яляӈэ’ ха’’мурӈа’’.

Тюку по’ ӈод ӈацекына школахато’ тоць, та’ мальӈгана сулурмы классханато’ партито’ тя ӈамдыдаць. Вэба’’ ирий’ нюртей яляхана округна хусувэй школахана ӈарка ялудо’ ваераць. Няхар’’ ирий’ ямбан тоходанва’ серкад’ ныланавы’’ ӈацекына тоходанва помдо’ пя’’. Тоходанась нята’’ нидо’ манэць маймбиць; тохолкодидо’ ядтась ихиняндо’ савась. Нерняна ӈока яля’’ ямбан ӈопой манзаям’ минреӈгу’’: нюртей’’ ӈацекы’’ тохолабгу’’, нябимдей’’ тоходангу’’.

Тюку по’ вэба’’ ирийна нюртей яляхана округханана сян ёнар’’ ӈацекы’’ тоходанвамдо’ пядось. Мат’’ юр’’ сидя ю’’ ӈацекэва тандая тоходанва’ серм’ пя’’. Нюртеймэвна школан’ тэвыдаць – Заполярный районна’ ӈэсыхына сидя юр’’ си’’ив ю’’ ӈацекы’’, Няръяна маркы школа’’ нюртей классхана няхар’’ юр’’ самляӈг ю’’ ӈацекы’’ тоходангу’’. Си’’ив пота ӈацекэця школан’ то’’ – сиддо’ нюртей тохолкодидо’ ядтабиць. Хусувэйдо’ ӈацекыдо’ маймбась ядтабиць. Ӈацекы’’ ӈод тохолкодахато’ мядонзэйӈэ’ ӈамдэд’ тэвраць.

Тандая тоходанва серм’ пявы ӈацекына хусувэй по’ мядонзэйм’ ня’’амсеты, тикы е’’эмня есь’’ округна бюджетхад’ хобсеты’’. Тюку по’ ӈод хусувэй тандая школан’ товы’’ ӈацекы’’ мядонзэйӈэ’ портфельм’ ня’’амась, пад’ мюня тоходанва е’’эмня хусувэй тарана ӈавода таня.

Тюку по’ хусувэй школан’ ӈацембой тохолкода’’ тоць. Ӈахы’’ похот’ манзарана’’ тохолкодина’’ ӈод маймбась манзаяхато’ тэвыдаць. Тарця тохолкода’’ поӈгана маня’’ нина’’ таня, тикы М.И. Талеева, П.А. Большакова, Ю.А. Ледкова, Н.В. Корепанова.

Няръяна маркана округна ӈэсыхыт’ товы’’ ӈацекына санаторно-лесной, тикахад’ школа-интернатхана тоходана’’. Тарця ӈацекына март’ маля тоць, пыдо’ ӈод тоходанва помдо’ нюртей яляхад’ минредо’. Вэба’’ ирийна нюртей яляхана Матрена Ивановна Талеева няюв лаханамась. Пыда маля тет ю’’ няхар’’ по’’ ямбан тохолкодаӈэ’ манзара, теда школа-интернатхана ненэцие’’ вадан’ ханярид’ товы’’ ӈацекы’’ тохолаби’’. Ӈарка яля’ мальӈгана тарця вади’’ хэтась: – Школан’ пилибт’ маймба ядсетыва’’, манзаява ӈэ’’нив. Хари’’ кабинетан’ тутан’, тикахана ерварахан’ ӈэӈгун’, хусувэй ӈамгэмд’ теневан’ ханяна’ ӈа’’. Манзарава’’ е’’эмня хусувэй таранар’ тюкохона ӈудат’ ӈылна’ ӈа’’. Теневан’ ӈацекы’’ е’’эмня ӈамгэ тара, тикыд’ маля малӈэ’ хамадабэй. Нюртей яляхана мал’’ маймба’’ ма’’лэйна’’. Та’ мальӈгана ӈацекына савовна нылавыд’. Ӈарка яляхана школахана няна’’ сава вади’’ хэтвась ерв’’ тоць, вадам’ ненэцяӈгат’ Ангелина Сергеевна хэтась.

Ӈацекына ӈод’ маймбась тоходанва помдо’ пядо’. Школана ӈаркта Людмила Викторовна маймба няна’’ лаханась, мась: – школава маня’’ танеӈгу, манзараӈгу. Ӈацекына таня’’, ӈацекына ма’’ла’’, школахана турта’’. Тюку по’ Холговхад’ самлязимдей классан’ нюдяко’’ ӈацекы’’ ӈани’’ то’’. Ӈацекы’’ турӈа’’, хамадабидо’- тоходана тара. Манзараӈгува’’, манзаява таня, ӈацекына тохолабгува’’.