Маня’’ яханана пирдырма серкана ныхыта’’ хибярина тянё ни’’ӈа’’, поӈгнандо’ северное многоборье, ханяна национальные виды спорта нина’’ манэ’’лабтаби’’. Тарця пирдырмахана хибярина ныхы’’ӈа’’.

Таремъюв’ пирдырта’’хибярина тюку’мэвахана Ульяновск’ маркана ваеравы фестивалян’ тэворӈаць. Таняна хуркари’’пирдырмахана ныхыта ма’’лавыдаць. Россияна тет ю’’ хасуйю’’регионхад’ ӈокханда сидя ёнаркад’вата хибяри’’ ныхыдо’ хорпавась’ товыць. Маня’’ округна сборной команда северной многоборье программана сянакусь. Пирдырта’’ ӈацекы’’ ӈокаювдо’ «Нордхана» пирдырта’’. Ныхыдо’ спортхана хорпада’’ Фестивалькана мэвы’’ хибярина малӈэ’ӈахэт’ пирдырта’’, поӈгнандо’ няхар’’ Россия чемпион’’, сидядо’ Россия первенствохона нердевы’’, мат’’ Россия чемпионат’золотой медалист’’ – тарця юн’ тренерӈэ’ таранадо’ Алексей Коткин хэтась.

Маня’’ ӈацекына сававна пирдырмыць, нюбедо’ ти’ – Никита Дуркин, Денис Коткин, Роман Латышев , пыдо’ ихиня сомбой юн’ яхандо’ тэвраць. Тарця ныхыти’ пирдырти’’ маниесь Всероссийский фестиваль’ хамандабада’’ хибяри’’ ӈани’ мэвна ваеравнда пирдырмахана северное многоборьем’паклеӈгудо’. Нерняна товнда ирийхана маня’’ спортсменна Саля’хардан ӈэдалаӈгуд, таняна Кубок ЯНАО ваераӈгу. Теда таня хэвась хамякода’’. Тикы’ пуд Ханты-Мансийкс маркана сиддо’ ӈате’’.