Сенз’ ӈэва’ сер’ яля’’, ирий’’, по’’ мер пуняна хаюрӈа’’. Тамна нись’ ӈахакуна теда мэта’’ пом’ ядабтабиваць, теда маниесь маля няхар’’ ирий’’ ваерась пона’’ пудана’’ яляха’ тэвӈгуна’’. Хусувэй похона хуркари’’ хэбидя’’ ялуна танесеты’’, хуркари’’ манзаяхана манзарана’’-хибяри’’ манзаито’ ӈарка яля’’ танесеты’’.
Ӈопой тарця ӈарка ялям’ хор’’ ирийна тось мадабасьтыва’’. Тикы тохолкода яля’. Хусувэй по’ тохолкода ялям’ округханана манзарана’’ тохолкодина’’ мэцьтыдо’. Тюку по’ ӈод тарем’ ӈэвндя. Округханана манзарана’’ тохолкодина поӈгана ӈока теневана’’ нина’’ манзара’’, пыдо’ няндо’ ихид’ ӈэда вадин’ ӈэдарабим’. Сямянд’ тарана – сензда ӈада’’, ӈацекыда харвась школан’ турӈая’’, сававна урокханато’ манзарая’’, сидда хусувэй серкана нядабая’’.
Няръяна маркана маня’’ тохолкодина манзара’’, ханяныдо’ сававна теневына’’. Ӈокаювдо маля пон’ ӈацекэхэ’’на манзара’’. Тарця хибярина поӈгана Валентина Ивановна Дьячковам’ нюмдеӈгудм’. Тохолкода яля’ – пыда яляда’ . Тет юд’ мян’’ по’’ ямбан тохолкова манзаям’ саць сававна торомдадась, саць сававна теневада’’. Нюртей тохолабвы ӈацекыда маля ӈарка хибяри’’, харто’ маля манзара’’. Хэбидя яляхана тохолкодамдо’ нисьтыдо’ юр’’, ханяӈыдо’ сава вади’’ хэтвась някунда турцеты’’. Тарем ӈэбнанда нив’ тара’’, Валентина Ивановна манзараванда ӈокаюв’ пелям Индига ӈэсыхы’ школахана мэ’’ӈадась. Тикы ӈэсы школа ервотаӈэ самляӈг’ яӈганя по’’ ямбан манзарась,ӈока ныхымда манзаяханда масьтесь. Инда лата тохолкода’ теда Няръяна маркы’ ненэцие’’ школа-интернатхана тохолкурӈа, округна ӈэсыхыт’’ товы’’ ӈацекэци’ тохоламби’’. Тарця тохолкода’ хэвхана ӈацекэхэна сава ӈэсьты, харвась Валентина Ивановна урокха’ тэворцеты’’.
Тамна ӈопой мэбета тохолкода Матрёна Ивановна Талеева, пыда ӈод ихид’ ӈэда вади’’ намдурпата’ тара’’. Тет ю’’няхар по’’ямбан ӈацекы’’ няюв’ манзара. Пыда – ӈарка тохолкода. Мал’’ манзаравамда школа-интернатхана мэ’’ӈада. Теда маля сяӈгова тохоламбавы ӈацекыта ню’’ тохоламби. Матрёна Ивановна илан’ мэёвна сырта не, ӈацекыда ӈод тарем’ тохоламби. Паднава, толаӈгова сер нямна ӈацекыда харто’ ямдо’, харто’ вадамдо’ мэнесь тохоламбида. Хусувэй ӈацекы паӈгуда теневась, харта сехэрымда минресь мэёвна илевамда мэпнанда.
Маркана илена поӈгана нянэй ненэця тенз мэта тохолкодина сацьри ӈока ни’’ӈа, хусувэдо’ сэвхана ӈади. Тарця нина’’ школахана манзаравандо’ хавна тамна сян’ тенз’’ общественной манзаи’’ пэрцеты’’, ханяныдо’ культура’ серм нерня минревахана нядаӈгосьты. Хусувэй тарця тохолкода хамандабида, мань тарця манзаям’ нибнан’ серта хибя сертаӈгуда? Тарем’ ӈод Юлия Александровна Ледкова манзара. Ӈока по’’ ямбан тохолкодаӈэ манзарана нява. Холговхана ӈацекы’’ тохолабись, Няръяна март’ илелма’’хаданда санаторно-лесной школана манзара. Теда тамна «Ясавэй» ассоциацияна вице-президентаӈэ’ тара.
Тохолкодина хуркари’’ манзаяхана нядаӈгода’’. Тюку по’ та’ мальӈгана округна нормативно-правовой акт’’, тикахад’ Уставм’ ненэця’’ вадан’ пададось.
