Хойхана мюсерта’’ ненэциена ӈод’ «Сямянхат меретам’» ӈатедо’. Пыдо’ ӈод манзаито’ поӈгана хусувэй по’ танеда пирдырман’ хамяку’’. Хусувэйдо’ сямянхат меретаӈэ’ ӈэван’ нив’ харва. Няръяна март’ тось нидо’ манэ’’тада’’, лахарёдо’ манзаито’ нямна танеӈгу’’, ныхыдо’ пирдырмахана хорпаӈгу’’.

Сырэй пудана’’ ириян’ тэвась ты’’пэртина ӈарка ялудо’ танесеты’’. Хусувэй по’ «Канин’ мэбетава» мэцьтыва’’, тикахад’ Няръяна маркана ӈани’ «Сямянхат меретава’’» ваерасьты’’. Маркана иленаӈэ’ тарця сянакован’ торомбэйва’’, ханяӈэна’ ӈодь’ лам’’дёсь тарця ялям’ ӈатесетыва’’.

Тюку по’ «Сямянхат меретава» округна еркы маркана хойхана мюсерта’’ ненэциена сиднтетимдеймэвна ма’’лаӈгу’’. Тарця серт’ хамякова’’ е’’эмня оргкомитет’ манзара. Оргкомитет нюртей ма’’лёвада ваерась, ханяна хасую’ яӈганя хибяри’’ манзара’’. Нина’’ ма’’лёваханандо’ самляӈг вопросм’ манэ’’сарӈаць. Ты’’пэртина ӈарка ялян’ хамякова планм’, «Сямянхат мерета» пирдырма’’ положением’, программам’ таслаць.

Тюку по’ ты’’пэртина пирдырма ты’’ сие’’ ниць’ ирийна самлязимдей толыркана Кармановской курья’ няна ваераӈгу’’. Ханяна хусувэй по’ танесеты’’. Сидя ёнар’’ тетимдей яӈганя похона ваеравнда «Сямянхат мерета» программада нюдя’ ӈэвась ни’’мэ’’: ты’’пэртина поӈгнандо’ пирдырта’’- тынзям’ моепаӈгу’’, няхармэвна санарта’’, хан’ тя санармадо’ танеӈгу’’,тэхэ’’на’’ ӈэдалёрта’’. Тикы’ хавна не’’ сэдвы’’ манзаидо’ манэ’’лабтабаӈгу’’- сямянд’ паской паным’ тэрабаӈгу’’.

Тюку по’ ваеравнда «Сямянхат меретан’» ныхыдо’ хормась СПК «Ерв», «Харп» ты’’пэртя’’, тикахад’ Нюдя’ яхана семейно-родовой общинахана манзарана’’ хибярина тута’’, тикы’ хавна агропромышленной компания’ ты’’пэртя’’, мяд’ манзаям’ пэртя тованзь’’ятна’’.

Няръяна март’ товнда ненэциена е’’эмня культурахана манзарана’’ нина’’ ӈарка программамдо’ хамандаби’’. Нянэй мя’’ ӈамдтавы’’ ӈэӈгу’’, ханяна хибярина ты’’ӈамзахад’ пиревы’’ ӈавор’ хорта’’, евэй’ танеӈгу. Мирдатна’’ харто’ сертавы’’ манзаидо’ мирдапгу’’. Сё’’ мэта нина’’ хыно’’та’’, тарана’’ тараӈгу’’.

Хойхана мюсерта’’ ненэциена ӈод’ «Сямянхат меретам’» ӈатедо’. Пыдо’ ӈод манзаито’ поӈгана хусувэй по’ танеда пирдырман’ хамяку’’. Хусувэйдо’ сямянхат меретаӈэ’ ӈэван’ нив’ харва. Няръяна март’ тось нидо’ манэ’’тада’’, лахарёдо’ манзаито’ нямна танеӈгу’’, ныхыдо’ пирдырмахана хорпаӈгу’’. 

«Сямянхат мерета» сянакова тюку по’ ты’’ сие ниць’ ирий’ самлязимдей яляхана ненэцие’’ ма’’лаӈгу’’. Маня’’ ӈод тарця яляхана таняна манзараӈгува’’.