Си’’ивм потна Ӈэлько небянда ня’ илеӈаха’. Хардади’ ӈэсы’ вархана ӈа. Сидеркад пирця Савнды хой ӈади. Нись ӈаха’’на Ямб то ӈади. Ӈэлько небянда ня’ неранзетыхы’, ёрцетыхы’. Ӈэлько небямда саць мэнедась.
Ӈоб’’мэва’ Ӈэлько’ небя хаӈгулы’’. Небянда ныхы сусадана пяда. Хасава ӈацекэця небямда савумдаван’ харва. Валакада ханзер’’ тикым’ серта тара нида хамэдамбю’’. Пий юдабцохонанда пыда тарця вади намда: «Хардат хэвхы хой’ ӈэвахана илер’’ ӈамдэд’’ вадёдана. Небякомд валакада тикы ӈамдэд’’ савумдаӈгуда.» Ӈэлько’ ида ядэрӈа: «Савов! Илер’’ ӈамдэка’’на небяв савумдаӈгув, хабцяӈгад ӈэдаӈгув.» Ӈэлько Савнды хой’ ни’ танаванзь ятналъй’’. Ӈынамда, муӈгда, харта харкомда мэ. Пин’ тарпы’’. Хой’ няӈэн’ ядалъй’’. Ядванда сер’’ хабэвком’ манэ’’ӈа. Хабэвкор ес’ инян’ еремы. Ӈэлько есм’ сибдада, хабэвком’ ӈэдарада. Хабэвко – «Сит нидм’ юрӈгу’’.» тёрсавэй тий’’. Ӈацекы ӈоб’’ нерня’ ядалъй’’. Лэркабт’ тямдэдм’ манэ’’ӈа. Тямдэ’’ иципой’ вынхалмы. Ӈэлько тямдэдм’ садан’ тоса мода. Тямдэ’’ – «Сит нидм’ юрӈгу’’» вадасавэй ит’ мулкада, ӈохолэй’’.
Ӈэлькова’’ ӈоб’’ нерня’ пирця хой’ няӈэн’ яда. Лакри’ сармикахад хунбада хорекомда манэ’’ӈа. Хасавакова’’ ӈынхад сян па’’мя маӈгм’ ӈэдара. Сармикм’ харе. Хорекомда нянь’ ютикэцяхана ӈавлада. Хорекода – «Мань сит нидм’ юрӈгу’’» вадасавэй неро’’ понд’ сакада. Ӈэлько пирця хоян’’ тэвы’’, танта пяда. Неранда няд лакри’ паль’’ неро’’ ӈадимя’’. Ядва серта яӈгу, ёхова мян. Ӈацекэця’ ида ядэлы’’:- «Нерохо’’ мань выдараӈгудм’. Си’’ми нядабада яӈгу’’.»
Тикымбохона лэркабт’ хэвхананда хабэвко ӈадимя, паромба ма:- Махан ни’ ӈамдад’’!. Ӈэлько хабэвконда ни’ ӈамды’’. Тиртя’ маха ӈарка ӈэвы, лата ӈэвы. Ӈацекы таӈга ӈамды’’. Паль’’ неро’’ пуняна хаи’’. Ӈэлько ян’ ха’’мы’’, сырӈа. Хабэвко’ ӈо’’марида яда. Ӈэлько хой’ ни’ ӈани танта пяда. Лэркабт’ неранда няд ёря яха ӈадимя. Ӈацекэцява’’ харта яхам’ мада я’’мада. Ида вома, манзь ханада:- Хибя нян нядаӈгода? Мань выдараван’ нидм’ харва’’. Небяв савумдаван’ харвадм’.
Лэркабт’ тямдэ’’ ӈадимя. Идм’ ӈэрпа пя. Яхам’ сусада. Ӈэлько хой’ ӈэва’ ни’ тана’’ хацей’’. Тад неранда няна лэркабт’ идебя сыра ӈадимя. Ӈацекы туселъй’’, ярӈа: - Няна’’ выдаранарахадм’. Нядаӈгодадув тоя. Небяв савумда тара!
Ненэсянда ӈо’’ лакри’ хорекода ӈадимя, ма: – Мерку’ махан ни’ ӈамдад’’! Ӈавка-хореко ервамда мерривна хой’ ӈэва’ ни’ тэврада. Сыра’’я тикырихында тэмза. Хореко тобаха’’нанда ям сабкаба пя. Илер’’ ӈамдэдм’ паӈгсавэй ӈадимде. Ӈэлько ӈамдэдм’ мэёвна ня’’мада. Хореко ервамда мерри’ хардаханда тэврада. Ти ханзер’’ Ӈэлько небямда хабцяӈгад ӈэдада.
