Округханана ӈока сава вадам’ намдувнда хибярина иле’’, хуркари манзаяхана пыдо’ манзара’’. Тарця хибярина ӈармбэй хибяри’’ поӈгана тянё вани’’ӈа’’.

Сава вадина хэбидя яля’ тось хэтбасьтына’’; нянд’ со’’яма яляхана ихид’ ӈэда’’ вади’’ мэцьтыва’’. Тюку по’ Ксения Филипповна Явтысая со’’яма ялямда Норвегия я’ Тромсё маркана мэ’’ӈадась. Таняюв’ пыда округхадана’’ Баренц регионхана илена’’ ненэця’’ Конгрессан’ ӈэдалёрмы’’ хибяри’’ поӈгана ядэрӈась. Ксения Филипповна Явтысая округханана илена’’ хибяри’’ поӈгана теневана хибяри. Илан’ мэёвна сырта, илеванда ямбан ӈокавна манзарана. Нюдя яхана соявы, Саляхана илевы, манзаравы. Хой’ илм’ сававна теневана не. Илеванда ямбан вынд’ ӈока’’ тэвормы.

Ксения Филипповна, нянд’ сямянд’ сава вада’’: сямянд’ тарана – сензан’ ӈа’’, сава ихиня хусувэй товы ялям’ ядабтамбю’’, тамна пон’ манзара, харвась ивнянд’ ӈэда манзаяханд’ яд’’.