« Сямянхат мерета» сянакован’ маля торомбэва’’, нара’ тось ӈатесетыва’’. Тюку по’ ӈод тарця пирдырман’ хойхана мюсерта’’ нина’’ сидна’’ ма’’лаць. Хой’ илӈгана илена’’ хибяри’’ ныхыдо’ хормась Няръяна март’ тэворӈаць.
Пыдо’ тэхэна’’ ӈэдалёрӈаць; тынзям’, тыбкам’ моепиць, сюрберӈаць, санарӈаць. Тарця яляхато’ хой’ тер’’ ненэциена хамякосьты’’. Сямянд’ меретина’’ грамоты’’, диплом’’, мядонзэй’’ ня’’амась мякандо’ ӈэдалэйдаць.
Тюку яля’ пирдырмахана мэбета’’ хибярина нюмдеӈгудм’.
Тэхэна’’ ӈэдалёрмахана тюку по’ хасава’’ поӈгана нердевы Михаил Александрович Вылка СПК «Ерв», снегоход «Yamaham» мядонзэйӈэ’ ханась.
Нябимдейӈэ’ товы Андрей Николаевич Ледков СПК «Харп», лодочный мотор – мядонзэйда. Няхарамдэй местам’ ханавы ӈани’ СПК «Ерв» ты’’пэртя – Александр Михайлович Ледков, мядонзэйӈэ’ буран’ двигатель.
Не’’ поӈгана тюку по’ тэхэ’’на’’ сямянд’ нюртейӈэ’ товы – Валентина Федотовна Ледкова СПК «Ерв», нябимдей Любовь Николаевна Ледкова, няхарамдэй Александра Григорьевна Талеева СПК «Харп».
Тэхэ’’на’’ ӈэдалёрма’ хавна вы’тер’’ ненэциена хан’ тя санарӈаць; тынзям’, тыбкам’ моепиць, сюрберӈаць. Хибядо’ тарця пирдырмахана нердець?
Сямянд’ сававна яркалана’’ ненэця’’ малӈэ’ СПК «Ерв» ты’’пэртя’’, пыдо’ тынзям’ моепавахана нердець – нюртей местам’ ханавы Пётр Константинович Ледков, нябимдей Илья Гаврилович Ледков, няхарамдэй Иван Константинович Ледков.
Санарта’’ поӈгана – тройной национальный прыжок. Тарця пирдырмахана сямянд’ мэбета’’ ӈобтарем «Ервхана» манзара’’ – Алексей Ильич Ледков, Владимир Александрович Вылка, Алексей Максимович Ледков.
Алексей Ильич Ледков СПК «Ерв» тынзям’ моепава серкана нюртей местам ханась, нябимдейӈэ’ Пётр Константинович Ледков хаясь, ӈобтарем «Ерв» СПК; няхарамдэй местам’ ханавы «Харп» ты’’пэртя Пётр Михайлович Вылка.
Тюку’мэвахана хойхана мюсерта’’ хасава’’ ёнар’’ метр’ сюрберӈаць. Сюрберта’’ поӈгана нердейвы Владимир Александрович Вылка «Ерв» ты’’пэртя, Василий Михайлович Ледков нябимдей, ӈобтарем’ «Ервхана» манзарана, няхарамдэйӈэ’ хэвы – Алексей Ильич Ледков ӈани’ «Ерв».
Не’’ тюку по’ самляӈг юр’’ метра’’ сюрберӈаць. Нюртейӈэ’ товы – Алина Ильинична Ледкова, нябимдей – Екатерина Егоровна Ледкова, няхарамдэй – Владислава Витальевна Вылка.
Хасава’’ тамна хын’ тя санарӈаць. Тарця пирдырмахана сямянд’ ныхытаӈэ’ - Владимир Александрович Вылка хаясь, «Ерв» ты’’пэртяӈэ’ тарана ненэць. Нябимдей – Вениамин Александрович Ледков «Ерв» ты’’пэртя, няхарамдэй- Анатолий Николаевич Талеев «Ялумд» родовой общинана манзарана.
Пирдырма’ хавна тамна самляӈг номинацияхана сямянд’ нердевы хибяри’’ нюмдець – А.М. Ледков, Е.А. Рочева, З.А. Ледкова, В.Ф. Ледкова, А.Г. Ледков.
Сидя ёнар’’ тетимдей яӈганя по’ «Сямянхат мерета» пуняна’ хаи. Хойхана илена’’, тэхэ’’на’’ манзарана’’ нина’’ мякандо’ ӈэдалэйдаць. Валакада хойхана нюртей сую’’ ӈадимда, ты’’пэртина’’ тэтнава’’ яляха’’ тэвотыд’. Ты’’ ниць ёльцядо’ сававна ваерая, нумда сава ӈэя.
Хойхана мюсерта’’ ненэциена теда маля ты’’ яляхана ӈобт’ ма’’лаӈгуд, тарця ялуна’’ округханана пилю’’ ирийхана мэцьтына’’.
