Си’’ив ю’’ тет по’’ тяхана ӈэрмний яхана’’ вэвко юн’ тэвыць. Хэвний яхад’ Германияхад’ товы’’ хибяри’’ маня’’ яхана вэвко’ серм’ нямна тоць. Тарцям’ нись ламдамбю хусувэй яхана илена’’ хибяри’’ ямдо’ лэтравась тарпыдаць.

Хусувэй яхад’ хибярина’’ сайнорманзь’ ӈэдалэйдаць. Ӈэрм’ ненэця’’ ӈод пуняна ниць хаю’’. Маня’’ округхадана саю’’ по’’ ямбан ӈокханда юд’ мян ёнар’’ хибяри’’ хаяць. Хуркари’’ яхана сайнормына таня’’. Хоян’ вэвко юн’ тэвась, нянэй ненэця’’ ӈод тыдо’, недо’, нюкцидо’ хаесь харто’ яхадандо’ ӈэдалэйдаць. Маня’’ ӈарка нина’’ пыдадо’ нись сяй сайнорӈаць, ямдо’ хэвняхад товэхэт’ сахарамбидось. Ямдо’ лэтрадось. Ӈокаюв’ ненэця’’ пудана ӈарка сайнормахана ӈэвдо’ масьтець, ханяӈы нина’’ тенад’ юнси’ юхубэйӈэ толы’’.

Сайнорма похона хойхана вадюданвы’’ ӈацекы’’ ӈод Победа ялям’ хахаялтамбиць. Пыдо’ ӈарка хибяридарев’ манзараць. Тюку по’ Победа яля’ това’ сер, хусувэй сайнормы’ похо’’на манзаравы’’ юбилейной медальм’ ня’’ амаць. Тарця’ медаль’ ня’’амвы’’ поӈгана маня’’ нина’’ ӈод хань’’ таня’’. Ӈока’’ ӈацекы’’ хойхана вадюданаць, сайнорман’ хэвы’’ иринато’, нисянато’ хаевы’’ манзаи’’ пэрӈаць. Тэхэна мэсьты, халям ня’’амбадана’’ поӈгана нядаӈгосьты’’, почтам ядэласьты’’, ханесэй ня’’амбаӈгу’’. Хойхана ӈод’ сертабада манзая’’ ӈокась. Фронт’ е’’эмня не сэдораць, ӈацекы’’ нядаӈгода’’ ӈэсьты’’. Маня’’ хибярина ӈод’ юбилейной медаль ня’’амаць, ӈокаюв’ тарця хибярина’’ теда ӈод’ харто’ ӈэсыхынато’ иле’’. Маркана иленяхат’ юбилейной медаль’ юр’’ хасуюр’’ хасую’’ хибярир’ ня’’амаць. Поӈгнандо’ ӈопой не, тикы Валетина Артемьевна Ханзерова. Канин’ яхана соявы, сайнорма по’’ сававна тенейда. Нися’ хасада ӈод’ сайнормахана мэвысь. Медаль ня’’амванда мальӈгана тарця вади’’ хэтась: – Маня’’ яхана Ӈарка Победа ялям’ ядтавась’ ханярина’’ хамяку’’. Тюку яля’ тюкохона сайнормы’ похо’’на ӈацекы’’ ӈэвы’’ хибяри’’ ма’’лэйдаць. Сайнормы’ похо’’на тылхана манзаравы’’ хибяри’’ ӈокавна манзараць, ӈарка серм’ сертабиць. «Всё для фронта, всё для Победы!», тарця девизм’ мэць илець. Маня’’ ӈацекэӈэ’ ӈарка хибярина нядабасьтына’’: сенокосхана манзарасьтыва’’, халям’ ня’’амбасьтыва’’, тэхэна’’ мэсьтыва’’. Мань’ сидя по’ ямбан ханена’’ няпой бригадахана манзарадамзь, ханисэй’ хоба’’ ма’’лабиваць.»

Теда ӈармбэй хибярина’’, сайнормахана ӈацекэӈэ’ манзаравы’’ округханана иле’’, Пыдо’ сян яля’’ ваерась – ӈарка ялям’ ядабтаӈгу’’. Тикы пыдо’ ялядо’. Нерня пон’ илея’’, вэвко серм’ ехэрая, сенз’ ӈэя!