Июнь’ ирий нюртей толырка”на Ханты-Мансийск маркана финно-угорской’ фольклорной коллектив» «Живущие по солнцу» фестиваль-конкурс’ ңась.
Маня округхадана сидя коллектив таний я’ няю”тирңась, тикы ңысма народной коллектив «Югыд-шонды» тамна ненэцие” театр «Илебц». Харто’ Ханты-Мансийск округхадандо’ фестивалян’ товы коллективдо’ ңокаць. Нюртей яля хусувэй коллектив харта номинациямда манэ”лабтамбись. Тарана тараць, хынота хыно”ңаць харто’ вадавнандо’, ансамбль» харто сянако инструментханандо’ сянакуць, ханяңы невхы илм’ харто ханты няби манси вадавнандо’ манэ”лабтамбиць. Театрава таня «Самбдава» спектакльм’ тэврась. Тикы е”эмня ңа, ханзер” невхэна тадебя выңгана ядета хибяри савумдамбись. Тамна ненэця’ вадавна Василий Николаевич Ледков падвы лаханама толамбиваць. «Югыд-шонды» ансамбль сидя сём ңысма вадавна мэңась. Тамна Красной ңэсыхыдана Валерий Ледков сё мэ»манзь тобэясь. Пыда ханты нямна ңэда сё мэ”ңась, тамна ханты ембдяр” сервысь.
Конкурсной’ программа пуд” жюри» пэрти’ ня’ круглой стол ваерась. Хусувэй жюрихина мэна хибяри харта вадамда мэ»ңась. Пыдо’ маць: «Сидна» ёльце» маймбтада”, пэдавада, вадамда сахарамбира”, ңока ңацекы” фестивалян тобэй”, тикы сава. Тикахана хар”на культурына нерня’ илеңгу” Ңоб” тарем манзарада”. Маня” театрана е»эмня жюрихина мэна Татьяна Тихоновна мась: «Ненэцие» театрм’ ңахат теневав, пыдо’ нюртейңэ финно-угорской’ транзитм’ нэць. Пили” фестивальха”на мэсьты”. Валакада няндо’ маман харвам, театр ңармбэйңэ хантана, ңацьбой хибярида” тянё” тикы нямна манзара тара, тикахана ненэця’ вада, культура илеңгу”.
Няби яля фестиваль «Живущие по солнцу» Югорской долина няна ңась. Таняна няхар” мя” нусь. Ңамнелада навор” пиревыць. Нерня’ диплом фестивалян’ тобэйха” миңаць. Театр «Илебц» диплом Лауреата III степени мэсь. Мядонзэй мима пуд” мал хибяри сяйлабтэйдонзь. Халя евэйм’, ям’ ңаворңаваць. Ңопой мякана маня” янатер не Лидия Александровна Валей-Альясова манзарась. Пыда харта сертавы, сэдвы хамадярта манэ»лабтамбись. Хусувэхэна халя’ нярахад сэдвы хамадярта мядонзэйңэ няна тась. Хэвхана газетахана , телевиденияхана манзарана сидна” падвась тосеты”. Хар”на культурана нямна няндо’ вадам’ мэцетыва”.
Маман харвам’ тарця фестиваль-конкурс тара, пыдо’ культурамдо’ манэтан, ханзер” вадамдо’, культурамдо’ сахарамби” хэтңгудо’. Тамна паской марто’ нинав манэт. Ненэся” Ханты-Мансийск мар” ёльце” паской, нин манд’ невхэна пя’ харад” ңока” ңэвы”. Харад паской, хуркари тэнз, пулдо тавдавы», мар систой. Ңани’ яхад товы хибяри сэвха”на минда ңади, ервдо’ хибяридо’ сававна илева е”эмня ивъер” манзара”. Есям’ сяндараха” ни ңа”.
«Илебц» театрм’ минрена
С.П.Дуркина падвы
