Ваеравы си’’ивхана маркана иленаӈэ’ ӈани этнокультурный центр’ мякана ма’’лэйнаць. Тюку мэвахана сид’’на’’ Галина Григорьевна Тайбарей ма’’лась. Тикы няна со’’яма ялям’ ӈобкана мэ’’ӈаваць.
Галина Григорьевна округханана теневана не. Пыда сита теневана’’ хибяри’’ яханана ӈока. Хибяхова’’ няюв’ пыда сяӈгова тоходанась, хибяхова’’ няюв’манзарась, хибяховам’ пыда тохолабидась. Манзаравэда тикы не тянё’’ вани’’ ӈа’’. Пыда – нянэй тохолкода. Округна Ӈарка яхана мюсета’’ ненэцие’’ мякана мат’’ ю’’ по’’ тяхана соявысь, маркана вадюданась, тоходанась. Ленинград’ маркана Герцен’ нювм’ нюбета институтм’ ёльце’’махаданда’ харта со’’ явы яханда манзаравась тэвыць. Тикы похот’ ямда нидась хаембю. Пилибт’ харта мэнена’’ яхананда иле, мал’ ныхымда ивнянда ӈэда манзаяханда паклембида. Нюртей манзарась пябнанда Волоковой ӈэсыхына илена’’ ӈацекы’’ луца’’ вадан’, литературан’ тохолабись. Тикахад Няръяна март то’’махаданда, ненэцие школа-интернатхана округна ӈэсыхыт’’ товы’’ ӈацекы’’ няюв’ пон’’ манзарась. Ӈацекы’’ сававна хамандабада тохолкода. Манзараванда ямбан ӈока ӈацекым’ тохолась, илан’ табадась. Теда ӈод’, ханяӈэна школа-интернатхана тоходанвы ӈацекы’’, тад’ тохолкодамдо’ манэ’’пато’ тэри’’ тарем мунзипой’ хэвувнанда ни’’ ваераӈгу’’. Нултыд’, торовата, лаханакурта. Мал’’ пыдо’ сава ихиня тохолкодамдо’ тенедо’.
Тамна Галина Григорьевна Няръяна маркы педколледжхана манзарась. Ненэцие’’ вадам’, методикам’ студентха’’ минресь. Тандая школамдо’ ёльцевы’’ ӈацекы’’ хэвхананда савовна манзарасьты, маня’’ вадава харвась’ тохолабидось. Тамальӈгы по’’ студент’’ теда маля ӈарка хибяри’’, ханяӈыдо’ округна школахана ӈацекехэ’ ненэця’’ вадава минре’’. Педколледжан’ ненэця’’ вадам’ тохолабвась’ тобнанда незел’’ нись’ ӈа’’. Тамальӈгана яӈга методика’ яӈгусь, методической литература’’ саць’ тянёсь. Хусувэй манзаямда Галина Григорьевна харта сертабидась. Манзарась, янамбовна харта методикамда падась. Студент’’ няюв’ нидо’ хамандабась ӈобнзер’ манзараць. Ненэцие’’ культурам’ ӈод ӈацекехэ’ минресь. Педколледжхана харто’ ненэцие’’ коллективдо’ ӈадимясь. Ӈацекы’’ харвась ӈобкана ма’’люрцеты’’, ненэця’’ вадавна вадако’’ мэцьты’’ , хыноцеты’’, сэдорасьты’’.
Галина Григорьевна Тайбарей хуркари’’ серкана мэбэта’’ не. Пыда ӈарка тохолкода, тикахад’ ӈудида’ мэта’’, ненэця’’ вадавна падна, падвыда луца’’ вадан’ харта сертамбида. Со’’яма яляханда округна этнокультурный центр’ манзарана’’, ЛитО «Заполярье» нито’ няюв Галина Тайбарей едэй книжкам’ хамандаць. «Памятью рода дорожа» тарця книжкацям’ хибяри’’ мядонзэйӈэ’ ня’’амадось. Тикы книжкан’ ненэця’’, луца’’ вадавна падвы’’ стих’’ ма’’лавы’’. Сава сёнзяхана сертавы манзая’, сомбовна падтавы.
Тюку ирийна си’’ивумдей яляхана Галина Григорьевнан’ ихид’ ӈэда’’ вади’’ хэтвась теневана’’ нида’’ ма’’лыць. Сейхад’ ӈэда вади’’ мэ’’ – Ангелина Ардеева, Татьяна Окладникова, Любовь Царькова, Валентина Зганич, Людмила Лаптандер, Гаврил Ноготысый, Елена Канюкова, Лидия Сядейская. «Илебц» театрхана сянакода’’ нина’’ харто’ вадидо’ Галина Григорьевнан’ тэвраць, сём’ мэ’’ӈаць. Театрхад’ Серафима Дуркина лаханась, пыда мядонзэйӈэ’ книгам’ тэврась. Тарця книгам’ ня’’амась Галина Григорьевна маиць, таняна пыда перенянда сидяӈг’ таня, нита’’ нямна сава вада падвы’’.
Галина Григорьевна Тайбарей сава ихиня со’’яма ялямда ядабтадась, товы’’ няха’’та’’ маймбись, сейхад’ няха’’та’’ лаханась.
Мань’ тикы няв’ маля няхар’’ юкад вата по’’ ямбан теневав’. Радиона манзараван’ мальӈгана тикы’ нями ӈока сими’ нядабасьты’’, теда ӈод’ харта падвыда газетан’ тэврабсеты. Нянда, сямянд’ ӈарка вада’’. Пон’ иле’’, несэй манзаи’’ падбю’’, ябда иламд’ мэт’, сензан’ ӈа, не нюкцяр’ сит’ пилибт’ нядабая. Сава сёнзяхана хусувэй товы’’ ялям’ ядабтабад’.
