«Илебц» театрава округханана ӈока по’’ ямбан манзара’’. Таӈок по’’ ямбан вадамдо’, культурамдо’ мэнена’’ нина’’ таняна ма’’люрӈа’’. Хибяри’’, хуний манзаито’ пуд маймбась репетицияхато’ ядсеты’’.

Пыдо’- тарана серм’ пэрӈа’’. Тикым’, вадам’ пэртяӈэ’ сававна хамандабива’’. Театрхана сянакодина’’ харвась округмана ӈэдалёрцеты’’, ӈани’ яхана мэвадо’ ӈод маля ӈока. Ханярина мэбнандо, ханяри’тэворпато’ сейхад’ сянакосьты’’. Театрана манзаям’ нерня пэртяӈэ’ Серафима Петровна Дуркина тара, режиссертандо’ теда Евгения Горностай манзара. Тикы’ нито’ няюв манэ’’лабтабада программамдо’ пилибт’ нэсэюмдамбидо’. Хусувэй сценахана ӈадимахана едэй ӈамгэм’ манэ’’лабтасеты’’. Ӈарка пэвдэй ирийхана сейхана сомбой программам’ Василий Николаевич Ледков, ненэцие’’ паднана’’ со’’яма ялян’ хамандаць. Хаювы ныланава яляхана театрана коллектив’ Нельмин’ Салян’ ӈэдалёрӈась. Таняна илена’’ хибярихи’ несэй программамдо’ манэ’’лабтадось. Хибяри’’тарцям’ манэць нянэювна маймбиць.