Си’’ив по’’ тяхана Россияна иленаӈэ’ тарця юн’ намдаваць: сидя ёнар’’ тетимдейяӈганя похона Сочи маркана олимпиада ваераӈгу. Тамальӈгана саць пон’ ӈэдархась.

Ти’, 2014 пова’ то. Февраль’ ирийна си’’ивумдей’ толыркана олимпиадам’ нэваць. Няхар’’ си’’ив яля’’ ямбан хуркари я’тер’’ пирдырта’’ ныхыдо’ хорпаӈгу’’. Тарця яляха’’ маня’’ ява хамякусь. Олимпиада’ ханзер ми’’мам’ хусувэй яля’ телевизор’’мана маниева’’. Ханяӈы хибяри’’ тарця сер’ маниевась Сочи’ март’ ӈэдалэйдаць. Маня’’ округна хибяри’’ ӈод’ таняна таня’’. Школа –интернатхана тоходанна’’ ӈацекы’’ таняюв’ хаяць, ӈокаювдо’ евако’’ ӈацекэця, пыдо’ харто’ сэвханато’ маниеӈгудо’. Харвабнанда хуркахова спортхана ныхытам’ ядабтаӈгу’’, лаханась нята’’. Тикахад’ волонтёр’’ ӈод яхадана хаяць. Тарця хибяри’’ нядаӈгодаӈэ’ тара. Нянэй ненэця’’ нина ӈод поӈгнандо’ таня. Ксения Филипповна Явтысая, Лариса Прокопьевна Талеева таняхад’ маля тоӈахась. Сё’’ мэта’’, тарана’’ хибярина ӈод таняна манзараӈгу’’. Янамбовна нито’ пумна таня тэворӈа’’. Мэта’’ си’’ивна нюртей яляхана Няръяна маркад’ «Хаяр» ансамбльхана тарана’’ ӈэдалэйдаць. Си’’ив яля’’ ямбан хамандавы программадо’ манэ’’лабтабаӈгудо’. Олимпиадан’ товы’’ хуркари’’ я’ тер’’ хибяри’’ нянэй ненэцие’’ вадам’ намдгу’’, маня’’ нина’’ сёхо’ инзелеӈгу’’, тарабцона’’ манэ’’та’’. Пыдо’ пуня товнда ныланава яляхана тута’’. Таняд’ то’’омахадандо’ лаханакурць нятына’’, вадидо’ пыдара’’ нянда тэвраӈгуна’’. «Хаяр» пуд’ «Родные напевы», «Северянна» олимпиадахана намдвы’’ ӈэӈгу’’, таня хынотина’’ хэвась’ ятна’’.