Маня’’ яханана ненэцие’’ тенз’ мэта поӈгана харто’ вадамдо’ мэнена’’, харто’ культурамдо’ теневана’’ хибярина тянё ни’’ӈа’’. Хибяри’’, хуний вадамдо’ тю’’у пэрӈа’’, культурамдо’ манэ’’лабтамби’’. Ӈокаюв’ тарця хибярина ӈока по’’ ямбан «Илебц» театрхана сянаку’’.

Таняна хамандавы программыдо’ манэ’’лабтавась ханяримна ӈэдалёрцеты’’. Сюртевы’’ ядо’ маля ӈока. Маня’’ нина’’ округна ӈэсымна харвась ӈэдалёрцеты’’. Тюку ирийхана театрхана сянакода’’ нина’’ Салян’ тэворӈаць. Ӈэсыхына илена’’ хибярина сиддо’ ядабтабиць. Нина’’ Салян’ ӈэдалёрмамдо’ ваде’’ӈа’’.

Нина Баркулёва: – Тарем’ ӈэдалёрма’’ ихиняна саць саварха’’. Хибяри’’ саць сомбовна сидна’’ ядтабиць. Мань’ харн’ перенин’’ таняна иле’’, сиддо’ манэ’’ӈамась. Культура’ хардан’ товы’’ хибяри’’ ӈокаць. Нянэй ненэця’’ тикы ӈэсыхына ӈока ӈэ’’ ним’’ маня’’ манэ’’лабтабэва нянандо’ мэкадархась. Мань’ Василий Ледков падвым’ толамась. Театрхана сянакова нянан’ саць илека. Мань’ ӈахакуд’ маля театран’ ядэрӈам’. Округмана ӈэдалёрцетыва’’, ӈэсыхы’’ тэворцетыва’’. Тикы’ хавна ӈани’ яха’’ тэворцетыва’’. Ӈани’ ям’ манэцетыва’’, ӈани’ тенз’ хибяри торомдасьтыва’’. Калмыкиян’ ӈэдалёрӈаваць, Финляндияна мэваць, Норвегияхана мэвава’’ таня’’, Я’малкана мэваць – Саля’хард маркана, Горнокнязевскхана, Аксаркахана. Манэ’’мэва’’ ӈока, намдвэва’’ ӈока. Тикы’ хавна Москван’ ӈэдалёрӈаваць, Мордовияна Саранск маркана мэваць. Тикахад’ ты’’ яляха’’ ядэрцетыва’’. «Дружба народов» СКП ты’’пэрти’’ манэ’’ӈаваць, Тиманской выӈгана мюсерта’’няюв тэворӈаваць, «Ямб’ тон’» ядэрӈаваць.

Валентина Тайбарей: – Мань’ Нельмин’ Салян’ нябимдэймэвна ядэрӈамась, ихинян’ саць савархась. Округмана ӈэдалёрпана’’ хибярина ханярина сидна’’ саць со’’ ядтабасьты’’, концертхана тосьты’’. Ненэця’’ вадам’ намдурпато’ маймбасьты’’. Сценахана сянакобнана’’, мэкад’ ӈэбнанда няновна писензеты’’. Мань’ вадакохона парны’’ немась, сими’ маниесь хибяри’’ писензеты’’. Тикахад’ Василий Ледков падвы вадавна хынс’ мэ’’ӈамась.

Фаина Ледкова: – Нельмин Нос мань’ соявы яв’. Таня хэвава’’ намдась, маиваць. Саляхана илебнан’ саць пон’ «Маймбаван’» ядэрӈамась. Тюку’ мэвахана концертан’ хыноць’ нята’’ нин’’ турӈаць, тикы Нина Сафроновна, Майя Ильинична. Тикы не’’ няюв няхар’’ ю’’ по’’ ямбан ӈобкана хыно’’ӈаваць. Пыдо’ нядандо’ ихид’ миндя’’ вади’’ намдаваць, маць: театрхана сянаковава’’ хусувэй’ мэвна несэюмдана, минрена манзаянана вадюданава’’. Театр’ тобнанда маймбась ядсеты’’. Тюку’ мэвахана мань’ Прокопий Андреевич Явтысый падвы стих’ толамась. Луца’’ вадавна толавась, ненэця’’ вадавна хэтась: не хойхана илевы, си’’ив нюда’’ сайнормась хэвыць, ӈобкартадо’ пуня яханда нивысь’ ту. Небякоцядо’ нюкцида илеванда ямбан ӈатейдась. Нюта’’ ембдярка хусувэй по’ сэдбавысь, мальцидо’, пибидо’ лэтбидась. Нюта’’ няюв” иле’’хадарев лаханавысь. Тикахад’ В.Н. Ледков сиднтет ю’’ пон’ хамандавы композициява’ манэ’’лабтаваць. Тикахана «Хынос’’ма’’, хынос’’» стих’ толамась. Тарем’ ӈэдалёрма нянана саць’ тара’’. Ненэця’’ ӈэсыхы’ тэворпана’’ саварха’ ӈэсьты, таняна хибяри’’ сидна’’ хамадабсеты’’, маймбасьты’’. Ӈацекэхэрт’ инзелесьты’’, нянандо’ мэкад’ ӈэсьты. Красной, Хонгурей, Нельмин Нос – тарця ӈэсыхы’ ӈэдалёрць’ тара’’. Хар’’на’’ нина’’ манэцетыва’’, перенина’’ таняна ӈока’’, теневанина’’ таня’’.

Серафима Дуркина: – Февраль’ хасуюдимдей яляхана маня’’ Нельмин’ Салян’ ӈэдалёрӈаваць.Таняна хар’’на’’ программава сертаваць. Тикы программава округна со’’яма яля’ е’’эмня хамандаваць. Округна тюку по’ сиднтет ю’’ самляӈг пода пангу. Маня’’ яханана Ӈарка, Нюдя я’ таня, Холгов’ ӈо’’ таня’’, тикы е’’эмня вадина мэ’’ӈаваць. Тикахад’ ненэця’ паднанана хаювы по’ сиднтет ю’’ пом’ ядабтаваць. Тикы Василий Николаевич Ледков, пыда падвы’’ стихда ненэця’’ вадавна толабиваць. Тамна вадаком’ манэ’’лабтава’’. Луца’’вадавна хэтась «Праздничная суета». Ты’’пэртя’’ ӈарка яля’ е’’эмня ӈа. Ханзер’ хойхана хибярина тарця ялян’ хамякосьты’’, тарана’’ ӈавори’’ тэмдабаӈгу’’. Мань’ «Сэр’ хохорэй» падвым’ толамась.