Саць ӈаи’’ по’’ тяхана  тецьда выӈгана ӈоб’’ ӈарка мя’’ нувы. Тикы’ Иримбо вэсако мя’’. Пыда саць паской не’ нюда танявы, нюмда Нара. Яля’’ ваеӈга’’, по’’ ваеӈга’’. Я’ ни ӈока сыра ха’’амсеты, ӈани’ юсьты. Вэсако не’ ню ӈарма. Саць паской, тюуй сюрням’ пыданарха, нирчьеда  ӈын’ пядрев выермэрха’, сэвнда’тар’’ муӈгад ямбарка’’.  Нарэйне  ябтако тюрдарев ирт ӈа, сята ялумдатрев морена. Лэмбаранда ниня’ сидя няӈота ӈэбтанда паӈгляр худэрӈаха’. Мерета тэдрев сюрберцеты, тад хынопата няби ӈэсы’ няна хыномада соӈгу.  Иримбо’ вэсако  не’ню  саць сомбойко , янда’’амна Нарэйне’ е’’эмня юн хая.  Яндахат наны’’  Иримбо  мят’   ӈэвтаванзь турць пядо’.

Нюртей наны ӈэвтанасавэй  Иримбо мят’то.  Наны саць паскойвана хыно’’ӈа. Серм’ минрена ӈэвтана хибяри саць наным’  савуӈада: « Наныва'' саць мереӈа ӈэдалёбта, мерцядарев пулёда, саць ныхы’’ӈа, иӈудоңа, серо тасламба сававна тенева’’. Наны вахалй’’: "Нарэйне нян илеванзь то, нев ӈэӈгун’’. Иримбо’ вэсако ма: «Саць сомбой наны.  Не’нюкоцяв, нянда хаепа хань’’».  Нарэйне вахалй’’: «Хаер’’ ня пирдарць пиртан?». Наны ма: «Хаер’’ ня придарць я’’амгудм’». Нарэйне ма: «Хаер’’ няданда саварка!».  Наны мунзи, харто’ мякандо’ ӈэдалэяд’’.

Няби мядндер’’ ӈэвтаванзь  Иримбо мят’ то’’.  Нанымдо’ ӈобтарем’ савуӈадо’. Вадам’ минренадо’ хуркари мэкад хобцако хэта. Наны ма: «Нарэйкоця, нядан недан’ то, сававна илеӈгуни’, мань саць сит мэнеӈгудм’». Иримбо вахалй’’: «Нянов наныра’’ ңарканю, пирцяню, ныхы’’ӈаню’’. Нарэйне ӈоб’’ вадада: « Хаерм’ пирдале пиртар?». Наны ма: «Хаерм’ пирдале я’’амгув’’». Нарэйне вэдене ма: «Хаер’’ няданд саварка». Няби мядндер ладвэдрев мякандо’ пулэяд’’.

Няхарамдэй мядндер’’ ӈэвтаванзь то. Нанымдо’ савуңа: « Маня’’ наныва’’ саць сомбой, ёльце ябтакоця, сэвда тудрев лэйнаха’. Теда’ сырңада ханзер’’ хано’ нимня санарта’’, тар’’ пускадрев тиӈгӈгу’’.  Нарэйне сырмахаданда, ма: «Хаер’’ няданд саварка’’». Няхарамдэй мядндер  мякандо’ ӈэдалэяд’’.

Яля’’ ваеӈга’’, по’’ ваеӈга’’. Иримбо саць вэсэйӈэ хая, не’ нюхунда ма: «Не’ нюкоцяв, хибяхартм’ нин мэне, евэрӈан. Хурка сюдбям’ ӈатенда? Мань мале вэсаком’,  илевав пон ни ӈа. Хибя ня илеӈгунда? Нарэйне ма: «Мань тарця хасавадув хован харвадм’, пыда хусувэй хибярин’  ябм’, майбцом’ таббата’’. Мань валакада хаерм’ мэнедм’. Хаер’’, таля, мань сит мэнедм’».

Нарэйне вымна ядэрманзь хая, ӈудида   тюу’’ илсетыда, хаерт’ тёрырӈа: «Хаер’’, ӈани торова!» Тад’  нарэй ялякохона  хаер’’ ян’ тэвы, ма: «Нарэйне, торовов,  ӈобкана хибярихы’’ ябм’, майбцом’ тэврахани’». Нарэйне маймба няюнда сюрмби, ма: «Хаер", тарця серм’ мань пили’’ ӈатевась!». Хэвханди’ яндахат паскойвана ембдёда’’ ӈацекы’’, ӈарка хибяри’’ то’’. Мал’’ маймби’’, тара’’, хыно’’ӈа’’,  тёрырӈа: «Нара хаерм’ няна’’ та. Вы’ яханана’’ савовна,  маймба илеӈгува’’!»

Тарця вадаком’ луца’ вадахад ненэця’ вадан’ Матрёна Ивановна Талеева сертадась