Вы здесь

Тиман’ явна ядэрӈаваць

 Перевод на ненецкий язык

Индигахана иленаˮ хибяриˮ тарем’ тасламбидо’, хареˮ илева ям’ тенева тараˮ. Пыдо’ харто’ ямдо’ мэнедо’, лэтрабидо’, сахарамбидо’. Тиман’ вымна тыбэртяˮ- мюсерӈаˮ, халяданаˮ – халяком’ няˮамарпиˮ, ханенаˮ- ханесэйм’ тэволасетыˮ.

Тиман’ ядо’ ивня’ ӈэда якоця ӈэвы. Сян’ ӈэдалава пиркана Баренцев’ яв хамбада’’ моёпи. Тикым’ пыдо’ Индиган’ туртахаˮ манэ’’лабтамбидо’. Харваниˮ иˮ варан’ ядалэйдо’. Варемдо’ мэта хибяриˮ туризм’ манзаиˮ пэрӈаˮ. Таняна Россияна’’ хэбидя яля’ ваерасеты. Тюку по’ матˮ яˮавлада неˮ яв’ ӈэсонд’ ядэрӈаць.
– Саво ирий’ 12 яляхана маняˮ Индигахад тарпынаць, пуня’ 16 яляхана пэвсюмбы’ пеляхана товаць, – тарця вади’’ Юлия Алексеевна Талеева хэтась. – Ӈокханда самляӈг яля’ ямбан’ 90 километрм’ ваяртаваць, Нюдя Горносталья’ яхакоця’ ӈэсонд’ тэвынаць. Тюку мэвахана матӈэ’ ядэрӈаваць – мал’ неˮ. Хэвхананаˮ Зенитм’ нюбета вэнековаˮ сюрась. Миˮманаˮ ёльцяӈгана’ сава нядаӈгодась, сиднаˮ ерамбадава… Ядэрманаˮ ямбан’ нумда савась, хаярэця ялякоць, мерцякода яˮавлысь. Самляӈг яля’ сер’ паской хой’ якоцявнанаˮ ядэрӈаваць. Ядвана’’ мальӈгана яваˮ нёхолкадˮ тавдамбиваць. Тиман’ выӈгана мань’ ирин’ ири мяд’ терсавэй тыда’ маниесь, мюсерӈась. Сиднаˮ нум’ ириваˮ лэтамбадарахась.
«Легенды Тимана» нюбета экспедициян’ ненэцяˮ нябимдей по’ тэворӈаˮ. Харто’ ямдо’ теневанаˮ, мэненаˮ хибяриˮ нидо’ явнандо’ ядэлаˮ. Тикы’ тарана серм’ Юлия Барамохина, пухуцямда хусувэй серкана нядабада Сергей Барамохин ня минреди’.
Юлия нюдя ӈэдяхаданда’ явнанда ядэрцеты, ӈарамзь ханярина иленаˮ хибяриˮ таня’ тэврамби, мэкад’ ӈавэˮ манэˮлабтамбиˮ. Баренцев’ яв’ ӈэсонд’ нидаˮ ям’ ехэрана ненэциеˮ ядэлаˮ. Яхакоˮ, тоˮ , саляˮ нюбедо’ ханяд ӈадимы ӈэвам’ вадецетыˮ. Вадёданаˮ ӈамдэд манэˮсарцетыˮ, сямян паской ӈавориˮ хомбасетыˮ. Хареˮ яхана ӈока ихиня сомбой, сейхана лимбяка ӈавориˮ нямна лахарёдо’ мэцетыˮ.
Тарем’ ядэрмахаданда хибяри ныхыдамда яхаданда’ нэкалтарха’ ӈэсетыˮ, сян’ яля’ ямбан’ сававна ныланарахаˮ ӈэӈгу.
Хусувэй ӈопоймэвна ядэрмы хибяри ӈани’ похона сейкода ӈани’ таня сата. Тарем’ хибяри’’ харто’ ямдо’ торомдабиˮ. Тарця тарана серм’ Индигахана илена хибярихи’ нерня минреди. Нянди’ сямянд нарка вада’’.