Округна’’ толаӈгова’ харад ӈэрм’ тенз ненэцие’’ отделкана манзарана’’ нина’’ хуркари’’ сейхана сомбой серу’’ е’’эмняна хамандабсеты’’. Таӈы’ мальӈгана ӈод нина’’ манзаядо’ ни’’тянёмдан’.

Саво’ ирий’ ямбан таняна манзая’’ ӈокась. Ныланана’’ ӈацекы’’ е’’эмня хамандавы мероприятия’’ тянё ниць’ӈа. Тикахад’ толаӈгова’ хардахана манзарана’ нява Надежда Талеева маркана илена’’ ненэцие’’ паднана Иван Меньшиков со’’яма яляхана ма’’лась. Паднана ненэць’ нямна сейхана сомбой ма’’лёвам’ хамадась. Надежда Николаевна толаӈгова’ хардан’ товы’’ хибярихи’ тарця вади’’ тэврась, пыда мась: – Юр’’ ватамбой по’’ тяхана Иван Николаевич Меньшиков со’’явы. Пыда – паднана, журналист, «Заполярьем’» нюбета литературной объединением’ яханана нэсь. Саю’ по’’ мальӈгана ёнар’’ хасуюёнар’’ тет ю’’ няхарамдэй похона яӈгумысь. Маня’’ яхана няхар’’ ю’’ тетимдей похона товысь, «Няръяна вындер» газета’ редакцияхана манзаравы. Тикахад’ хоян’ тэввыць, ты’’пэртя’’ хэвхана илевы. Таняна илесь, лаханако’’, хобцоко’’, хынабц’’ ма’’ламбавы. Тикы’ поӈгана нянэй вадавна сававна лаханась’ тоховы. Таняна ма’’ламида книгаӈэ’ сертавыдась, самляӈг книгам’ падвысь. Тарця книга’’ библиотеканана таня’’. Иван Меньшиков нюртей книгада 1936 похона ӈадимысь, тарця книгава яӈгу, няна’’ ниць’ тэв’’. Валакада сидя по’’ ямбан округханана илесь, тикы’пуд паднана Москва март’ илевась’ хэвысь. Ӈарка маркана ӈод газета’ редакцияхана манзаравысь, тикахад’ «Колхозник» журналкана паднавысь.

Небой по’ паднана юр’’ пода панысь. Тюку яля’ ӈод со’’яма яляхананда ненэцие’’ ма’’лава’’, паднана нямна вади’’ мэ’’ӈава’’. Ненэцие’’ ма’’ламбива’’, падвыда ваде’’цетыва’’. Ӈацекэци’ нямна паднавысь. Ӈопой ӈацекэця нямна тарця лахарём’ падвысь. Ӈацекы няръяна мят’ товы, тохолкодада Горький Данко’ е’’эмня падвы книгам’ толавы. Тикы книгам’ нянэй вадавна толабида. Ӈацекы инзелесь, падвы сер’ мэёвна сейханда еримы. Тикахад’ ӈацекэр’ хонарку: – хибя падвы ӈэдакы? Луци’’ не ма’’нив: – Горький’ падвы. Тикахана ӈацекэр’ ма’’нив: – Мань’ Горькиян’ мядонзэйм’ ӈэдарагудм’. Ӈацекы хуркари сянако сертабавы, Сяӈгова Горький сядм’ манэць, тарця то’’олха сянаком’ сертавы. Тикамда ӈэдаравэда. Тикахад’ сертавы мядонзэйкода’ пуня нив’ ту’’. Ӈацекэця’ тад’ ярумы. Ти’, тарця лаханакода таня.

Тарця падбада сер’ илӈгад’ мэвы ӈэ’’ним, паднанар’ манэ’’мыда нисяв’ падбю. Манзаянанда ӈэрм’ ӈацекы мел’’ ӈэвам’ манэ’’лабтаван’ харвавакы.

Толаӈгова’ хардахана манзарана’’ нина’’ та’ямбан хибярина няюв’ манзара’’, таняюв’ тюӈгада’’, ӈока ихиня сомбой серм’ намдгуда’’.