Тюку яля’ Матрёна Ивановна Талеева падвы пьеса’ тетимдэй пелям’ толара’’, тарця падвы манзаяда ямб’, янамбовна мал’’ газетахана падвы ӈэӈгу.

Яв’ хумба со. Соты’ ядхана мя’’ морена, сэр’’ хохорэйдарев ӈаха’’ ӈади, мя’’ якэда моӈгъя. Вэн’’ мадлыд’’, хибяри’’ мякад тарпыд’’, сырӈа’’, ӈатена’’. Мядонда’ няю тороварманзь ядалъяд’’. Нерняна’ Луке’ пухуця, холая, парумба яда, яӈгада ямб, тобэй хибяри тумдэйда. Выӈгана хибяри’’ ӈахат нидо’ тумдсетыдо’.

Луке’ пухуця: Ӈани торовов! Пон сидна’’ вэдоманзь нидаць тур’’. Ювэй, нянов ӈацекэця ӈармыню’’. Сянд’ нуӈгувата’’, мят’ хэхэва’’, мядондада’’, Еване столм’ ӈамтамби.

Еване: Торовов, торовов, хубта яра яӈгов’’! Сяян’ тода’’, сава хибяри’’ сяй’ хамадёдан тосьты’’. Тыне ӈоб’’ нерня’ мий’’, ӈацекы’’ хаданда’ хэван ӈамдгуд’’, хасаваха’ харти’ ӈамдёлавади’.

Мика: Пале, ханзер’’ сывымда мадара’’? Нарада вэвасьню’’, суюда’’ ни’’ха’’, колхозник’’ няданда хахаи’’ теневана ӈысмина’’ ниса’’ мяканда’’ тур’’? ( ӈодь янамбовна лахана).

Пале: Сывымда сававна мадава’’, нюртей суюна’’ ха’’, ханимя’’, колхозник’’ хахая то’’, мядодо’ ӈади’’, ӈысмина’’ ниць тур’’, ӈарка яха’ тяхана хаюдакы’’. ( нись парумбю лахана). Хаврява’’ ханяна мэда?

Луке’ пухуця: Хаврява’’ Як’ няканда ӈацекы’’ ня яв’ няна мэ’’, яв’ халя сававна миӈа. Мякнанда теда’ хибя’’ хаита’’, сянра ӈэсадата’’, мале юрба пяв’’? Тэхэна Саляко мэнакы? Сян’ пода мале паныда? ( не’ нюнда няю сылы’’).

Тыне: Мякна няхар’’ ӈацекэми’ хаи’’. Небёв, ӈарка не’ нюн самляӈг яӈганя пода паны. Хасавав’ тюку поход сеймда еделӈа, невхы ваеравы’ сер’’ немахананда турӈа. (индата хахат нэкалӈа).

Луке’ пухуця: Ехэй! Мер’ по’’ ваера’’, ваторама’ вадан’ ватода товыню’’. Невхэна ибкава ваторама’’ вадам’ пуня’ пэртя’’ нисьты’’ ӈа’’ (ибедорӈа). Пэдаваков, теда’ хибяри’’ едэй ватовна иленю’’ ( маймба вахалй’’) Едэй ватовна Паленд’ ня ӈобт’’ паднасади’ ( не’ нюнда’ няю сылы). Еване, сёябтакум’ хотнакэн, вадав’ лаханаба’’ан хайнаӈгу. Еванзадакун’’, сяянзъ малебта’’ сянакованзь хаяда’’,тына’’ ӈадьбатом’, манэӈара’’. (ӈацекы’’ мертёвна пин’ тарпыд’’, тарця вадам’ ӈатевы’’).

Еване: Мядома серкна, сёябтако ханя тара, хотадм’. Мань ӈо’’ ив’ нювнан’ ядэрцеты, небя’ вадам’ няданда намдвэв’’ яӈгу, харвабта сяхаӈгарт нидм’ намдӈгу, сидя пота ӈацекы ӈамгэм’ тенеӈгу, хадада нивыкэда вадець ( еся’ хыдям’, харм’ мэ, тарпы’’.)

Эдэ: Хакэй, тына’’ ӈадиӈэй’’, соты’ ядхана хадырӈа’’. Сидя ӈэдалёда мюслава’ сехэрэвна харад’ няю ӈэдалыхы’. Тыти’ нямд’ саць ӈарков’’, ёльце мертёвна ӈэдалыхы’, ханяӈэ’’на няваталӈгуху’. ( пихид лахана ).

Мика: Вы’’ ылка ӈэдакы’’. Ӈокатэта’ мят’ ӈэдалёдакы’’, сян’ по’’ мале ӈэвтаванзь ханӈа’’, тарця юн’ ӈахакуна выӈгана сось, си’’ ивмдей поӈэ хая. Мякна’’ Ламдо Хрис’ ненда’ ня сыв’ турӈась, неда саць ӈоб’’ нямбара. Теневанада, намдвэда ӈока, вадаком’ вадетарха. Хасавада пили’’ мунзи, нерида пюрна.

Пале: Яндавна хуркари хибяри’’ таня’’. Ӈэсын’ хабейманзь ядэрӈаваць. Ӈэсы’ помна ядэрта ӈоб’’ яӈгу. Невхы похо’’на саць ӈоб’’ палытана’’ ӈокацьню’’, теда’ мал’’ харто’ ято’ нию хэвы’’. Вымна машина ӈод’’ ни’’ ӈадю’’, хури’’ якоцяна’’ машина’’ ермыдо’’ ӈумӈэ хая’’, ӈэдалёб’’ сава. Теневана луцахан’ хасуй пядва’’ мякна’’ тавась табадамась. Яв’ хэвхана мэвахана’’ хасуй пям’ мэп’’ сава.

Мика: Яв’ нямна ӈопой машина ӈадись, Як’ тенева луцида’’ яв’ хэвхана ӈэда хардакохондо’ халям’ хадабаванзь турмакы’’. Ӈопой луца хабененда’ ня ӈэрёйнда ӈэсонд’ хардакохона илесетыхы’. Яв’ няю хэвханана иленя ӈысмина’’ хасуй пядамдо’ хосая мюдхана хэсьты’’. Тедари’’ явняна’’ хасуй пя’’ ӈока’’.

Малда тамна ни’’ӈа’’