Тарем’ нюмдевы ярабц нябиюм’ пелям’ тюку яля’ толара’’. Ярабц падвы ненэць’ Я’малкана илена, «Няръяна ӈэрм» нюбета газетахана паднанаӈэ’ манзара. Нюмда Няё Вэнго.
Тикы’ хасава манзараванда’ сер явнанда ӈокавна ӈэдалёрцеты’’, хынокад’ ненэцие’’ падбасьты. Тюку ярабц ваде’’мы’’ Панаевск’ няӈы’ выӈгана мюсерта не Елена Токливна Лаптандер.
Параӈода’ ню полката хананда мюд ян’ ха’’мы’’. Мят’ ханя тю’’. Мань тарем’ мадм’: – Тёняха’’на, нохоха’’на тэмдахавава?
Ӈарка Ӈасяда мэтада ӈэвамда пян’ ладыбида. Параӈода’ ню луца тарем’ ма: – Тарем’ ӈэбта – савахав саванё’. Тёня’’ ӈэя’’, еся’’ ӈэя’’.
Ӈарка Ӈасяда ӈани’ ма: – Тарем’ нидм’ харва’’ – Пирцяко Вылка нями’ хадавы. Параӈода’ ян’ хана тара!
Юно’ хан’ ни’ пыда ӈамды’’. Мань тарем’ мадм’: – Мань ӈод’’ ӈани’ тохорцядм’. Юно’ хан’ ни’ ӈани’ ӈамдыв’. Параӈода’ мят’ ханяна’’ тэв’’. Параӈода’’я харданда лат’’ хаця тахабта’’. Пыда тарем’ ма: – Ӈэта есядё тась тарась! Сюрмя’ ваӈган’ тяха’ ханара’’!
Пирцяко Вылка’ сяне’’ таркавна Нехода хамдомби. Хэня луци’’ пу’ ӈани’ ялъй’’. Сюрмя’ ваӈган’ тэвына’’. Ӈэми’ тапхалъй’’. Нями’ сидя хэвхад ня’’амвэдо’ – сюрмя’ ваӈган’ мирцядтедо’. Нями’ нэкалмадавэхани’ яноларавэв’’. Тикы яхад ханя’ хэвнядм’ – яхани’ ялъядм’. Такы юнетами’ пумна мякни’ тэвыдм’. Нябами’ не’’я тарем’ ма: – Нямд ӈэдаванзь хаянаси’? Нямд хадарабтар? Пелей’ няна тедахав’ илеӈгун!
Пелей ня’ илелъядм’. Ӈарка Ӈасяда мякна’’ пили’’ турцеты. Пыда ма: – Мэванда немда мань ханахав.
Мань мадм’: – Тарем’ нидм’ харва’’! Нябав’ ма: – Манзьван нянани’ ӈули’’ ни тара’’. Ӈасяда маси: - Ӈобкана мядокава’’.
Нябав маси’’: – Тарем’ нидм’ харва’’! Нюми’ ӈани’ хадаӈгура’’! Тован’ харвабата’’ нерим ханаида’’.
Мань’ ӈани’ мадм’: – Тарем’ нидм’ харва’’!
Хахаяда’’ яля’’ тэвыд’’. Нюми’ соя. Пелей’ няна нюми’ вадабив. Ӈарка Ӈасяда мякна’’ пили’’ турцеты. Манзь ханасетыда: – Няни’ нюм’ хар’’ни’ вадаӈгув!
Мань ӈобо’’ манзетыдм’: – Ӈули’’ тарем’ нидм’ харва’’! Ӈавэ’’ пиркана Ӈарка Ӈасяда турць ӈэвадэй’’. Няхар’’ по’ илева’’. Нябав не’’я мунм’ ӈамзь ни ӈа’’: – ялэ тэдорцеты. Пыда манзеты: – Нюдя Ӈасядан’ манд’’ нисянав’, – Ти’’ ниня ӈамдё ӈамгэм’ пэртан? – Илеӈгу’’ нисяв’. Пирцяко Вылкам’ сюрмя’ ваӈган’ нидонзь моӈгу’’. – Теда’ нюнд ня’ харти’ иледи’!
Ты’’ няби пелям’ нябав та. Тиканда ямдэй’’. Нюхувада ӈарма. Мяды’’ тиркана таня хаини’. Ӈамгэми’ тикахана пэрманани’ – несэй ян’ ямдэйни’. Мя’’ми’ мярами’. Тарем’ иленахани’ нюми’ ӈарма. Нюдя Ӈасядам’ ядабцасавэй’, хурка ӈэбтасавэй’ нена’’ пыдавэда. Тадхава тикы яхани’ та илелъяни’.
Ти’, ярабц’ малда.
