Хусувэй по’ пилю’’ ирийхана маня’’ округханана ты’’ ялям’ мэцьтыва’’. Тарця ӈарка ялям’ хойхана мюсерта’’, манзарана’’ хибярина маля сиднтет юкад’ вата по’’ ямбан мэ’’ӈадо’. Тюку пова’ ӈод ӈани’ похот’ нись’ хаюр’’. Яндахана’’ ты’’пэрма серкад’ перена’’ ӈарка ялямдо’ мададось.
Невхы похо’’на манзаравы’’, теда хойхана мюсерта’’, тыдо’ пэртя’’ хибярина ӈарка ялудо’ мэ’’ӈаць. Тарця яляхана ӈобкарт’ хибярива ниван’ хабедось юр’’. Тэхэна’’ мэна’’ хибярина ед’ ӈока сейхад’ миндя’’ вада’’ соць, нина’’ мядонзэйм’ ня’’амаць, ӈобкана ма’’лась нито’ хэвхана ныланаць. Тарця ялямдо’ «Няръяна ты» колхозхана ӈод’ мэ’’ӈадось. Тикы колхозхана хусувэй по’ ты’’ялям’ мэ’’мась тиртя ӈанохона хоян’ тэворцеты’’.
Невхы похона маня’’ малӈэ’ хойхана илеваць, хойхана семьясавэй мюсерӈаваць, манзараваць. Хасавина ты’’пэртяӈэ’ тараць, не’’ мядм’ манзаям’ пэрӈаць. Ӈацекына хойхана вадабинаць. Саць савась.
Ардеева: – Маня’’ колхозханана ты’’ ялям хусувэй по мэцьтыдо’, тикы яляхана хибяри’’ вертолётхана хоян’ танасетыд. Тюку по’ ӈод ты’’ яляхана хоян’ ядэрӈаваць, ӈамгэ яхана мэвакэва тикым мань’ сацьри ехэрав. Пилю’’ ирий няхарамдэй толыркана ӈарка ялява ваерась. Хойхана теда манзарана’’ хибяри’’ ма’’ламбиць, тикахад’ невхы похо’’на хойхана манзаравы’’ хибяри’’- ветеран’’ хаӈаць. Мани’ Мария Николаевна Рочева ня’ ядэрӈанись. Невхэна хойхана ӈобкана илеваць, манзараваць. Мария Николаевна семьясавэй хойхана илесь, тикахад оседлостьхана ха’’мась малӈэ’ ӈобкана ӈэсын’ товаць. Тюку по’ ты’’ ялява сававна ваерась, няхарамэй ӈэсына ӈась. Хибяри’’ сянакуць, сомбой концерт’ танесь. Сидя хабенекохо’ яӈгарӈаханзь, тикахад корреспондент’ танесь, сидна’’ вадбой лаханормась табадабись. Тикахад соревнования’’ таняць, таняна ненэця’’ тынзям’ тюран’ моепиць, санарӈаць – тройной прыжок, сюрберӈаць. Тэри’’ савась. Колхозна ерв’ вадам’ хэтась, ваде’’ӈадась: ханзер ты’’пэртина манзара’’, хуюм’ ӈэсыхына серудо’ саваркавна миӈа’’. Тюку по’ Тимофей Васильевич Хатанзейской ӈэсыхына манзарана’’ хибярина нерде’’. Манзаидо’ теневана’’ хасава’’ таняна манзара’’, тыдо’ сававна пэръядо’. Няхарамдэй ӈэсы. Мань’ сидя хасава нюв’ тэхэна мэӈаха’, нисянди’ тотрев’ ты’’пэртяӈэ’ тараӈаха’. Ӈарка хасава нюв’ маля пон’ манзара, теда пенсиян’ тарпбэй, тамна манзарабта хань’ сава ӈа. Нюдяко нюв’ ӈобтарем ты’’пэртяӈэ’ тара. Харвась хоян’ танаӈгасьты, пон’ таняна мэсьты. Хардаханда лакамбой тэворцеты.
«Няръяна ты» колхозхана невхы похо’’на манзаравы’’ ты’’пэртя’’ хасавахат’ Афанасий Петрович Канюков ӈарка ялям’ мэ’’ӈась, тамна няданда ӈацекэрка, ӈоб маля пенсияхана мэна няда Алексей Петрович. Мядм’ манзаям’ пэрмы не’’ Хонгурейхана теда иле’’- П.С. Ледкова, М.Н. Рочева, С.Я. Ардеева. А.Г. Ардеева.
Няръяна маркана ӈод’ ты’’ ялям’ хибярина мэ’’ӈадось. Пилю’’ ирий’ хасуюдимдей яляхана Куя’ яха вархана мяд’ ӈамтавыць, мядм’ манзаям’ пэртя нява Ксения Филипповна Явтысая мядонди’’ ядтабись. Тарця ныланава яляхана хойхана мюсермы’’ хибяри’’ Красной, Хонгурей, Нельмин Нос ӈэсыхыт’ товыць, маркана илена’’ хибяри’’ ӈод тарця яляхана тянё ниць’ ӈа. Яля’ ямбан ханярид’ товы’’ хибярина’’, хой’ манзаям’ пэрмына’’, теда тамна манзарана’’ нина’’ ӈобкана ма’’лась ныланаць. Ӈарка яля’ ед’ хамандавы программа’ нюдя нись’ӈа’’. Хибяри’’ поӈгнандо’ пирдырӈаць, сянакуць, хыно’’таха’’ инзелець. Тикахад’ нянэй мякана сяйӈаць, ты’’ ӈамзахад’ пиревы евэйм’ ӈаворӈаць.
Сарё ӈэбнанда ӈод маня’’ хибярина ты’’ яляхана савовна нылэйдаць. Хусувэй таняна мэвы’’ хибяри сава ихиня мяканда тэвыць. Сенз’ ӈэва’ сер ӈани’’ похона няхато’ ӈани’ тэвӈгуд. Тарця ялява ӈатеӈгува’’.
