Вы здесь

Ялумд’’

Родная тундра, ее просторы – все это дорого юбиляру

Андрей Николаевич Талеев Саляхана илена’ ненэця’. Тюку’ ирий’ самлязимдей яӈганя толыркана си’’ив ю’’ помда ядтась. Пыда ӈэсыхынанда теневана хибяри. Теневана’’ нита’’ вадавна: - нямбара, ёнекад, лэмбаранда лата ненэця’.  Со’’яма яляхананда ӈока ихид’ миндя’’ вади’’ намдась. Пыда илеванда’ ямбан ӈокавна манзаравы, пухуцянда ня’ нюди’’ вадавэхэ’, не’ нюнди’ нюкци’’ маниевэхэ’.

  Наталья Корепанова – руководитель  учебно-оздоровительного учреждения

Маня’’ округханана’’ мале си’’ив ю’’ сидя по’’ ямбан санаторной школа-интернат манзара. Теда’ ненэцие’’ санаторной школаӈэ нюмдебидо’. Таӈок’’ по’’ ямбан’ округхы’’ ӈэсыхыт товы’’ тивак’’ едям’ мэта’’ ӈацекы’’ тоходана’’, сиддо’ лекарь’’ савумдаби’’. Ӈокавадо’ ӈацекы’’ едядо’ тивак’’ хабцяӈгат пере. 

Ирина и Степан Талеевы – 35 лет вместе

Саляхана мале няхар’’ ю’’ самляӈг по’ ямбан ӈобкана Ирина Николаевна, Степан Семенович Талеевха’ илеӈаха’. Тюнти’ пуд’’ таӈок’’ по’’ ямбан мяти’ тум’ лэтбихи’. Таӈок’’ по’’ ямбан мяканди’ турта’’ ниди’’ ядтабсетыхы’. Мяд’ ибам’ лэтбада Ирина Николаевна, хасавада’ Степан Семенович хуркахарт’’ манзаям’ ниня пилюта ненэця’.

Метать тынзей мальчишки учатся с детства

Ваеравы та’ сидя ирий’ ямбан Канин’ выӈгана нюдяко ӈацекы’’ е’’эмня мюсерта’’ садик манзарась. Тарця’ проектм’ округна’’ администрацияхана хамадаць, тикахад серт’ масибтедось. Хойхана небянато’, нисянато’ хэвхана вадюданна’’ ӈацекы’’ тоходанва’  ёльць’’хандо’ тэвась, школан’ тобнандо’ харад илан’ пон’ торомзь я’’амсеты’’. Идо’ пилибт’’ мято’, небянато’, нисянато’ нямна ядэрцеты’’. Тикы’ нид хардахана вадювы’’ няхатато’’ хаюрцеты’’. Тарем’ нибнанда ӈа’’, нюдяко’’ ӈацекына’’ школан’ хамадёсь турпнандо’ хойхана тарем’ ӈадимбнанда мюсерта’’ садик’’ манзараӈгу’’.

Ученики Любови Павлив живут и трудятся в Малоземелье

Нельмин-Носхана ӈока’’ манзаяидо’ теневана’’ тохолкода’’ манзара’’, ханяӈы’’ ӈацекыто’ няю харвась манзаидо’ минрейдо’. Пыдо’ ӈацекыдо’ нюдякодандо’ маниейдо’, хусувэмдо’ тенева’’ ханзер’’ тохолабась тара.  Ӈопой тарця тохолкода Любовь Гавриловна Павлив. Тюку яля пыда мале няхар’’ ю’’ хасуюдимдэймэвна харта школаханда тюсь.

Тюку по’ пыда нертей по’ школан’ товы’’ ӈацекы’’ ня’’ма’’. Сидндет ӈацекы’’ няю тет по’ ямбан ӈобкана манзараӈгу’’. Таӈок’’ по’’ ямбан ӈацекы’’ толаӈго, паднась, толанзё тохолава’’ хавна  тамна илан’ тохолабгуда.

Большой род Паньковых живет у реки Колвы

По’’ мер’’ хаюртарха’’, Хорей-Вер’ ӈэсы хасуюр’’ помда мале’’ ядабта. Сямянд’ нерде’ тюку ян’ илелмы Ипат Паньков тюку яляха’’ хасава’’ нюта’’ ня’ тэввы’’ ӈэбнанда, ӈэсымдо’ нидось тумдаӈгу’’. Ӈэсыдо’ ӈарма, хусувэй по’ паскояркаӈэ’ хантана. Пыдо’ илевы’’ ӈэбнандо’ тюку яля’’ мальӈгана ӈока’’ сава вадам’ намдгуць.

  Участие в различных фестивалях и ярмарках мастеров – хорошая  учеба

Хибяри’’ савумдабда нямна ӈока’’ кино’’ сертавы’’, ӈока’’ книга’’ падвы’’. Тарем’ ӈод’’ маня’’ пысасетыва’’: тамбир’’ манзаям’ пэрць ханяд ныхыдамдо’ пэрӈа’’? Галина Артеева тикым’ сававна теневада. Пыда лекарь’’, няхар’’ ю’’ самляӈг по’’ ӈацекы’’ савумдабись.

Иван Павлович Выучейской нювм’ округханана’’ хусувэй хибяри теневада’’. Нянэй ненэць, ненэцяӈгат’ нертей тохолкода, государственной, общественной манзаяха’’на’’ манзаравы.

Оленеводы сельскохозяйственного производственного кооператива «Няръяна ты»

Пилю’’ ириян’ тэвась тэхэ’’на’’ манзарана’’ хибярина’’ тянембевна таӈгарка илесь пясьтыдо’. Минрена’’ манзаяханандо’ ӈод тянембевна незеларка ӈэсьты. Нумда мале ханзорка, тэкоця’’ таӈы’ пирувна ни’’ паде’’. Ненэциена’’ янамбовна сывы мюсерць яхато’ хамяку’’. Пилю’’ ирийхана хойхана манзарана’’ нина’’ хэбидя ялудо’ ваераць. Тарця ялям’ хусувэй по’ Алексей Петрович Канюков ӈатесетыда. Ханзер’’ нида ӈатеӈгу? Пыда илеванда ямбан тэхэ’’на’’ манзаравы. Хойхана соявы, вадювы, манзаравы. Нюдякодаханда Нюдя явнанда нита’’ хэвхана мюсермы, тикахад’ харта «Няръяна ты» колхозхана манзаравы.

Ольга Явтысая (слева) – председатель семейно-родовой  общины «Вы’ ту»

Саляхана илена’’ ӈокаюв’ хибяри’’ сяхава’ мал’’ Выучейской нювм’ нюбета колхозхана манзараць. Хойхана мюсерӈаць, тыбэртяӈэ’ тараць. Сян по’’ тяхана колхозандо’ тахарась тыбэртя’’ манзаяси’ хаиць. Хибяри’’ идо’ ядэлыць, ханзер’’ ӈэсь’’ сава ӈэбнанда? Тикахана Нюдя яхана семейно-родовой община’’ ӈадимяць. Теда хибяри’’ мале сидндтет общинахана тыдо’ пэрць хойхана манзара’’. «Вы’ ту» семейно-родовой община’ манзаям’ нерня минренаӈэ’ Ольга Владимировна Явтысая тара. Ханзер’’ серудо’ миӈа’’? Тикы нямна тарця вади’’ хэтась: – Малоземельской хойхана илева’’.

Маня’’ округва’’ нянэй ненэцие’’ илесь я. Нянэй ненэця’’ сян юр’’ по’’ ямбан харто’ явнандо тыдо’ пэрць мюсерӈа’’. Маня’’ хибярина’’ хойхана илесь нюдо’ вадаби’’, ямдо’ лэтби’’. Тарем’ яханана’’ тыбэртя’’ хибярина’’ хусувэй выӈгана мюсерӈа’’.

Округханана’’ падтаӈгова серм’ минрена’’ хибярина’’ сацьри’’ ӈока ни’’ӈа’’. Тарця нина’’ ненэциена’’ поӈгана тянё’’ ӈэбнандо’ ӈод’’ таня’’. Ӈарка падтаӈгода нява’’ Надежда Выучейская, падтаӈгова’’ серт’ яӈга тоходанвы.

Маня’’ яханана’’ хуркари’’ тенз’ мэта ненэцие’’ поӈгана тарця хибярина’’ таня’’, хуний тюнто’ пуд ӈобкана ӈока’’ по’’ ямбан иле’’. Нидо’ нядабась илевамдо’ мэӈадо’, хусувэй серкана нидо’ нядабась’ нерняри миӈа’’. Тарця хибярина’’ неняӈг’’ ирийна’ сиднтетимдей яляхана маркы’ культура’ хардахана ма’’лабидонзь.

Теда’ товы ирийва’ та ер ирийӈэ’ таславы. Ӈэрм яханана ӈод’ сямянд’ ядембада ирий’. Тюку ирийхана неняӈг’’ ӈока’’, нибярёр’’ маля тэри’’ я’’авлы. Ты’’ паде’’, хибирихина’’ ӈод’ саць ядембада яля’’ сава ни’’ӈа’’.

Та’ мальӈгана хынокад’ хибяри’’, тарана’’ хибяри’’ харто’ хамадавы’’ программыдо’ манэ’’лабтавась’ ӈани’ яха’ тэворцеты’’. Ӈани’’ яхана, ӈани’’ маркана танеда фестивалька’’на’’ харто’ манзаидо’ манэ’’лабтабасьты’’. Тарем’ ӈод хынокад’ нява Фаина Харитоновна Ледкова Архангельскан’ тэвормысь, таняна нита’’ няюв’ манзаравысь. Тарця сер’’нямна пыда няюв’ тарця лахакурмав’ танясь.

Страницы