Хор’’ ириян’ тэвына’’. Тюку ирийна нюртей яляха’’на ӈармбэй хибярина ӈарка ялям’ мэцьтыва’’. Тарця ялям’ маля сян по’’ ямбан ядтамбива’’. Ӈармбэй хибярина яляхана янда’’хана илена’’ нина’’ ныланавась ма’’ласьтыд.

Округна еркы маркана, округна хусувэй ӈэсыхына ӈарка ненэциена ныланавась ма’’лабсетыдо’. Няръяна маркана илена’’ иринана, хадунана ӈопой яхана нисьты’’ хасена’’. Пыдо’ е’’эмняндо’ хуркари тоходанва танесеты, тикахад кружокха ядэрцеты, поӈгнандо пирдырцеты. Товы ирийна нюртей толыркана выставка нэяць, таняна ӈарка хибяри’’ ӈудаханато’ сертавы манзаи’’ манэ’’ма’’ пир’’. Хусувэй ӈармбэй хибярива илеванда ямбан манзарабэй,теда ӈод тарця нина’’ манзаясю нисьты’’. Пыдо’ивняндо ӈэда манзаядамдо пилибт хомбсеты’’. Ханяӈы сё’’ мэ’’мась ма’’люрцеты, ханяӈы хуркахова клубха’ тэворцеты, ханяӈы театрхана сянаковась ма’’люрӈа, поӈгнандо мел’’ хибярина ӈока. Тарця хибярина ӈудахана сертавы’’ манзаи’’ манэ’’манзь культурно-деловой центр мят’ тюӈгада’’.

Хэбидя яляхана хусувэй ӈармбэй хибярива ихид ӈэда вади’’ намдась, нюдо’ небянадо’, нисянадо’ ниць юр’’. Ханяӈы ӈэсыхына ненэциедо’ культура’ хардахана ма’’ламбидось. Тарця ныланавам’ӈарка нито’ е’’эмня Хонгурей ӈэсына сертавыць. Ӈармбэй нидо культура’ хардан’ ма’’ламбидось,ихиня сомбой концерт’ манэ’’лабтаць. Хибяри’’ сян’ сяс’’ ямбан ӈобкана ныланаць, сё мэ’’ӈаць, сянакуць. Тикахад ӈобкана сяйӈаць. Ӈарка хибяри’’ ӈобт ма’’лась лахарёдо’ ӈока’’ ӈэсьты’’, невхы похо’’на ӈобкана иле’’мидо’, манзара’’мидо’ тензебтембсеты’’.