Мэта мя’’на’’ мюня’’тетва’’. Паханзеди’’ тэта нека’’ями, пухуцянда ня’, пыди’ нюсавэхэ’. Тетам’ тивтяди’ нюди’ нив’ таня’’. Мяд’ сиди’’мана сидя ю’’ хурёда. Тэхэвава’’ тэва’’ няхар’’ ёнре’’э. Тёныӈы мя’’на’’ ерв Тай маӈгацями. Не нянда ня’ ян’ сидярихи’.

Ярабцм’ хо’’махад няхар’’ по’ илева’’. Хубта’ няна нека’’ями манзь ханада: – Едва’’ пия.

Ед ханя пи’’. Едва’’ ӈамава’’. Паханзеди’’ тэта ӈани’ тарем’ ма:- Неӈэ, Тай мянгацяр тюкон’ хотва. Мэ’’манда вадами, мань таня’’ нив’. Пыда ханя ту’’. Паханзеди’’ тэта ӈани’ тарем’ ма. –Ялэ’’ ӈэвадё тябихоркадм’. Юд’ по’ техэ еся ӈэва мирми хана харвадм’. Теда’ неянд ня’ няхарӈэ хаёдадама’’.

Тай мяӈгацями няхар’’ ёнре’’эм’ сюрлабтэйда. Мя’’ма’’ ха’’мы’’. Нека’’ями мюдамда ненадорка ты’’ подерӈада. Тикамда мале манзь ханада: – Пумнани нёда’’ ту’’. Илена ӈэб’’ни’ тутадм’. Тай мяӈгацями пыда тарем’ маси’’: – Хананд си’ хабтод мал’ ханэйд? Самляӈг хабтарка тыд хаёя’’. Сит пюлаба’’ни нянани тараӈгу’’. Тиканда самляӈг хабтаркамда хаейда. Хэ’’мяхаданда пуй недарида хаи. Тикы’ хэ’’мяхад Тай мяӈгацями, пихиня пой’ ӈутокы хананда ниня ӈамдёвари сер’’. Си’’ив ӈэсоӈгана инзелеб’’нани тыда ма’’лаванода. Тарем’ сырпа’’ни самляӈг хабтаркам’ тым’ сяравы. Ӈавормадавэй’ ӈэдалаванода. Ӈоб’’ си’’ивахав хэӈо’ мундрев’ ханда лаб’’ӈэрӈа. Няби си’’ив ӈэсоӈгана паӈгарка соты’ тяхад самляӈг хабтарка ты’ нихамьяд’’. Ӈоб’’ ямб мюдм’ пунда теревэда. Тамна пунда няна няхар’’ ӈэдалёда. Ирими ядэрӈа: хадари’ ӈэбта сер’’мня хэвы хад’ ӈэдараха.

Тай мяӈгацями манзь ханада: – Паханзеди’’ тэтам’ маня’’ хадаваць. Яво’’ сёран’ тэвраваць таняна харта хаӈгу. Серодо’ мале’’мяхадандо’ няхар’’ Тай’ ню’’ мякандо’ хая’’. Ӈари’’ маньзявана’’ илевари сер’’. Тай мяӈгацями пи’ хонёба’’на’’ няби паӈгалярми тяӈгаданда тяха’ пэбтарисетыда. Ӈоб’’ пи’ сава ерьня ямб’’ паӈгалярми хар’ мадав. Харасяда ян’ сюрба пяв. Сюрамбадахани тёр ӈуркада. Тай мяӈгацями тикахав ӈэвы. Си’’ми тэва, са’ сюрте. Няда’ яӈгацямда’ ӈэвани ни’ ха’’авравахавм’ тенене нисявав’, ялям’ юравэдм’. Сэвани ӈадимзь, тарем’ сыра’’пани ӈэвами сидя ян’ лекавы’’. Ӈобтикы яханда талкадтав. Ӈэ’’ни ни’ санэйв’. Ӈани’ илейяв’’. Нерни’ няна мядм’ ма’’нэӈадм’. Тай маӈгацями мя’’ ӈэривы. Си’’ми ханяхарт ни’ ӈэдарамбю’’. Хун’’махадани мяканда си’’ми ӈани’ тэваравы ӈэсеты. Няхар’’ хуныв’’, няхар’’ си’’иев хада. Тетимдейхана ӈэвами няхар’’ ян’ лекавы’’. Сэв’’ни ӈадимзь ӈобтикы яханда талкадтав. Тарем’ сыра’’пани’ мя’’ вада яӈгу. Сэвани ху’ сырӈа’’ та’ ед’ пяв. Тарем’ яданахани сидя ӈарка мядм’ нердани ня’ мань манэ’’ӈадм’. Пон’ тэводаӈахаюн. Няби мят’ тюдм. Сея’ нямна хаядм’. Манзь ханав: -Тюку хибя’ мя’’? Не мунда яӈгу. Ханзер’’ сэдораса ӈани’ тарем’ сэдора. Ӈамдё тябиховани сер’, тёняӈы мят’ хаядм’. Тёняӈы мякана ӈоб’’ нямбара не таневы. Мят’ тювани’ сер’ таминда вахалъй’’. – Ӈамгэ’ маядирт, ӈа’ маядирт, ӈуда’ маядирт? -Ӈуда’ маядиртм’! Тай мяӈгацями си’’ми хадась. Тюку хибя’ мя’’?

– Тёняӈы мят ерв Пайхы’’ тэта. Тюку мят ерв’ Палкуро’’тэта. Ядэрта’’ хасевдо’ пэвсюмя’ няна то’’. Едва’’ ӈаво’’махадана’’ хонэйна’’. Пи’ сава ерьня, пэвдя пихиня Пайхы’’ тэта’ ӈэва’ ед’ Тай мяӈгацями тойбтёванонда. Пыда тарем’ маси’’: – Пайхы’’ тэта тю’’у’ ня’ ӈа’’! Няби мя’’ма’’ няхар’’ Тай’ ню’’ таланархадо’. Саюхув’’ ӈока’’ ӈэдараха’’.