Тюку ненэцие’’ лаханако’ Елена Николаевна Окотэтто’ падвы. Тикы не Я’малкана иле’’, маля ӈарка хибяри. Харта яхананда илеванда ямбан образование’ серкана манзарась, нюдяко’’ ӈацекы’’ е’’эмня книги’’ падбада. «Тыто» лаханаком’ ӈацекына толабато’ сава ӈэӈгу.
Выӈгана хасава ӈацекы илевы. Пыда сата ты’ то’’олха ӈэвы – «ты», паской то’ то’’олха – «то», ӈадьбята небяхаюда, нисяхаюда, Тытоӈэ нюмдевэди’. Ӈули’’ харвобтавэди’. Серта сер’ пэрмэди’.Ӈопой манзаян’ нивэди’ тохоламбю’’. Лэкӈэ вадёвы. Яндаха’’на сава ӈавори нивыда мание’’. Хибяхартан’ сава саӈом’ нивы ӈэдарамбю’’. Хой’ нина ядбата мараӈгы танпавыда. Хабэвко’ пиди’’ тахабтамбавыда. Лэ’’молроко’’ есӈгана хадабавыда. Нисяхаюта, небяхаюта ня’ сабе нивы инзеле’’.
Ӈоб’’мэва пыда ӈани ненэцие’’ еся го манэ’’манзь хэвы. Ӈопой яӈгон’ тёня еремы. Тыто ида ядэрӈа: – « Ханаӈгув, савадани’ сава ӈэӈгу.» Тёня ярума, хынумбавы: -« Си’’ми ӈэдара’’, мякнани’ ханикуни’’ ӈатена’’. Мань тюку е’’эмня сит иле тохолаӈгудм’. Тэвами татадм’.» Тыто тэвам’ ня’’амвэда, нинда иня’тяха ӈыдавэда. Нявотана тёня’ пумна сылы’’, харта сэвхата ни пунрю’’. Тёня тэвадада вадёвы. Тыто паской тэва’ пумна санэй’’. Тёня тэвамда макабтамба нявоты. Тыто ныхысялама. Лахацянд’ тапхалъй’’. Мо’’нэй’’. Юсида. Ӈодь’’ индата нэкалпида, сэвда сэя’’… Сэвда ӈадимя’’. Варк хыносумби, ма: – Ӈани ӈамгари’’ нёд хан’’. Харт пыхыданд е’’эмня манзаран. Тарцян, Тыто’, нён ӈа’’. Варк тытом’ ӈоб’’ хэвхад няби хэв’ ня’ сюре’’леда. Тыто ӈэвада сюралй’’. Юсида, пилкабтада варкан’ сыраць пина. Хасава ӈацекы ида вома, ярума: – «Мань са’’ладм’, са’’ладм’! Ӈамгэ небяхаюни’, нисяхаюни’ ня’ нивэдм’ инзеле’’?...»
Варк хая. Паской лэ’’мороко’’ хыносумба нимнянда сюра’’: -тыто, сёнзяр саваӈэ хэбта, маня’’ сехэрым’ манэ’’лабтаӈгува’’. Манзаям’ мэнеӈгур, лэкамд хаеӈгур. Небяхают, нисяхают ня’ саван ӈа’’! Тикахана Тыто ӈэта ни’ санэй’’, ӈарка’’явана тёрей’’: – Манзаям’ мэнеӈгув! Лэкм’ хаеӈгув! Ненэцие нядабаӈгун, мэнеӈгун! Сяхаӈгарт’ ида’’ нидм’ вомдабаӈгу’’!
Тарця ваторо’’ми намдхава, лэ’’мороко’’ я’ сяр’ нимня тияд’’. Тыто пумнандо’ мирна. Тадри мята манэ’’ӈа. Сейда ӈули’’ маи’’. Я’ сяр’ ниня иленя’’ ну сармик’’, я’ сармик’’ мал’ ма’’лы’’. Тытон’ ӈэваридо’ ха’’морӈа. Варк ма: – Тыто, тад нерня’ яна’’ ниня тидпой’’ иле’’. Маяндорта нид нядабан’’. Сидна’’ сяй’’. Тыто, тад савовна сылаванда, хэвхананда ӈамгэхэрт яӈгу. Нумд’ тёрей’’: – Тад нерня’ савовна илеӈгудм’!
