Тюку ирийна самлязимдей яляхана Ким Андреевич Вонгуев со’’яма’ ялямда мэ’’ӈась, сиднтет ю’’ помда мада. Пыда пухуцянда’ ня тохолкодаха’, ӈока по’’ ямбан Хорей Веркана манзараӈаханзь. Ӈацекы’’ тохоламбава’’ ивнянди’ ӈэда сер’’. Ӈока ныхымди’, теневанамди’ школахана манзараван’ масибтеӈаханзь. Теда’ ӈод’’ хусувэй яля школан’ нибнанди яд’ ӈод’’, урокхати’ нибнанди’ паромбю пыди’ – тохолкодаха’. Хусувэй тохоламбавы ӈацекым’ тенеди’, школахана манзаравы поди’ ихинанди’ лэтбиди’. Манзаравы поди’ тензебтебванди’ мальӈгана сядуди’ салмраӈгаха’.

Вонгуев’ мяд’ тер ӈацекы’’ тохоламбава серкана манзаравадо’ хасуюр’’ поход ва’’ӈа. Ким Андреевич институтм’ ёльцесь Хорей Вер’ ӈэсыхы’ школан’ манзаравась хэвысь. Тамальӈгана’ мале нелевыць, неда’ Людмила Алексеевна тохолкова по’ ваерась 1968 похона вэсаконда ӈэсын’ тось. Пыди’ тохолкодаӈэ’ манзаравади’ тянё ни’’ӈа, тикахад’ завучӈэ’, директорӈэ’ манзараӈаханзь. Хусувэй манзаян’ ивъер’ сыртаха’. Ӈацекы’’, таняна манзарана’’ хибяри’’ школаханандо’ хардаханандо’ мэнараха’ ӈэсьты’’. Ким Андреевич’ ӈод’’ директорӈэ’ тарась. Тарця манзаям’ сибицяӈэ’ нюмдеӈгу нир’’. Школа’ ервотахад’ ӈока ӈамгэ пере’’ нив. Ӈацекы’’ тохоламбава’’, школахана манзарана’’ нита’’ ня тарана серу’’ тасламбава’’, ӈацекы’’, тохолкоди’’ сенз’ ӈэва’’, манзарась харад’ сулурпава сер’’ – мал’’ школа’ ервота тасламбада’’. Школахана манзарана хибярир’ ӈацекы мэнебнанда тара, хибяри’’ ня манзарась теневабнанда. Ӈацекы волтамбада хибярир’ школахана манзарась нида пират’’. Ким Андреевич манзаяхананда ӈацекы’’ теневась, манзарась нята хибярита’ ня’ сававна манзарась.
Пыда манзаравада мале ӈока. Хорей Верской сельской совет’ ервотаӈэ’ тараванда мальӈгана ӈод’’ ӈока тарана серу’’ харта ӈэсыхынанда илена’’ хибярита’ е’’эмня таслабись. Тарця манзаяда ӈод’’ ивнянда ӈэвысь. «Мань советхана манзаравы пон’ ихин’ ханяӈэхэ’’на ха’’мурцетыд’’. Манзаяда ӈокась, ӈока тарана серу’’ тасламбиваць. Хусувэй ӈарка сер’ пявана’’ нерде’ ӈэсыхы хибярина’’ ня тасалкосьтыва’’: ханзер’’ сертабнана’’ саварка ӈэӈгу. Няха’’на’’ инзелесьтыва’’, тасалкосьтыва’’, валакада тикы’ пуд’ нерня’ минзьтыва’’. Хибярина’’ сими’ нядабасьты’’, – тарця вади’’ Ким Андреевич хэтась.
Лаханакурмани’ ямбан хэвхананда неда’ Людмила Алексеевна ӈамдысь, пыда мунзипой невхы тет ю’’ по’’ тяхана сертавы сидяӈг манэ’’сарӈась. Ихинда тамальӈгы поди’ ха’’мурмакы. Ханяӈэхэ’’на ванерабтёсетыхы’, ханяӈэхэ’’на сидяӈг’ понку ня’’амбась мунзетыхы’. Ким Людмиламда самляӈг юкад’ вата по’’ тяхана Ленинград маркы’ пединститутхана тоходанванда мальӈгана сэвтевэдась. Людмила школамда ёльцесь Якутияхад’ товысь. Ненэця’ хасавако ӈани’ Хоседа Хард’ ӈэсыхыд’ ӈарка маркана мале’ тоходанась. 1966 похона тюнди’ ӈэвыць. По’’ мер’’ ваера’’, ил’ нерняри’ миӈа.
Вонгуевха’ пенсиян’ тарпась Няръяна март’ илелъяханзь. Нибнанди’ манзаян’ ядэр’ ӈод’’, ӈопой яханана хасенась я’’амади’. Ким Андреевич Хоседа Хардской землячеством’ ма’’лась. Харта янда историям’ тохолабида, Харута’ ӈэсы’ нямна ӈока материалм’ ма’’ла, колвахана илевы’’ Вонгуев тэнз’ мэ’’мы паӈг’ ненэця’’ илм’ нямна падарм’ падби. Нерняна’ товнда по’ харта со’’явы яханда, Хоседа Хард’ ӈэсыкоця ӈэ’’мы ян’ тэворман’ харва, таняна памятный знакм’ ӈамтаванзь ятна’’. Харто’ якоцяндо’, таняна илевы’’ нито’ е’’эмня тарцям’ сертаби’’. Людмила Алексеевна ӈани’’ пон’ Хорей- Веркана илевы, манзаравы. Теда’ маркана илена’’ нита’’ е’’эмня клуб’ ма’’лавы, ненэцие’’ театрхана сянакусь, «Ханебцёхона» сё’’ мэ’’ӈась.
Вонгуевха’ хибярихина саваха’, пыди’ мяканди’ турта’’ пилибт’’ танесеты’’. Лаханакурцетыхы’, ханяӈэхэна тарана ӈамгэм’ таслабсетыхы’. Тохоламбавы ӈацекы’’ ӈод’’ тохолкодидо’ манэць маймбасьты’’. Ким Андреевич, Людмила Алексеевна ня’ ниди’ нядабась илевамди’ нерня’ минреди’, тарем’ нерня’ ӈод’’ ӈэя! Пон’ сававна илеӈахая!

Перевод на русский язык

90 лет стажа на двоих

Старейший педагог Ненецкого округа Ким Андреевич Вонгуев отметил на днях 80-летний юбилей. Профессия педагога для супругов Вонгуевых – прежде всего, настрой души. Они и сейчас остались учителями, хотя уже и не спешат на уроки. Они помнят каждого из своих выпускников, и при воспоминаниях их лица всегда светлеют.

Ким и Людмила познакомились во время учебы в Ленинградском педагогическом институте им. А. И. Герцена. Людмила приехала из Якутии, ненецкий паренек Ким – родом из исчезнувшего ныне поселка Хоседа-Хард. Свадьбу сыграли в 1966 году.
После института Кима Андреевича направили в школу поселка Хорей-Вер. Пока жена заканчивала учебу, молодые провели год в разлуке. В 1968 году Людмила приехала к мужу. В разные годы супруги занимали должности завуча и директора школы. Наверное, именно поэтому в сельской школе всегда царила семейная атмосфера.
В дальнейшем глава семьи возглавлял Хорей-Верский сельсовет, решал самые сложные проблемы земляков.
– Я часто вспоминаю то время, – рассказывает Ким Андреевич. – Оно было до предела насыщено полезной работой. Мы не принимали скоропалительных решений, всегда советовались с народом. Слушали, сопоставляли и только потом принимали решение.
Пока Ким Андреевич рассказывал, Людмила Алексеевна, присев на краешек дивана, внимательно рассматривала фотографии 40-летней давности, словно книгу семейной жизни листала страничку за страничкой, то с грустью, то с улыбкой, вспоминая обо всем.
Трудовой учительский стаж семьи Вонгуевых составляет на двоих более 90 лет. После выхода на пенсию, супруги живут в Нарьян-Маре. Как и раньше, стараются вести активный образ жизни. Ким Андреевич создал Хоседа-Хардское землячество. Он увлеченно занимается историей края, собрал большой материал о Харуте, по крупицам воссоздает для потомков летопись своего рода – колвинских ненцев Вонгуевых. Весной будущего года планирует принять участие в установке памятного знака на месте своей малой родины – поселка Хоседа-Хард.
Людмила Алексеевна, в свою очередь, организовала клуб уроженцев Хорей-Вера, играла в ненецком театре «Илебц», была участницей фольклорного коллектива «Ханебцё».
К Вонгуевым, как и прежде, любят приезжать родственники и друзья. Здесь нет роскоши, но это дом, где тебе всегда рады, где всем хватает душевного тепла. Сюда приходят посоветоваться, обсудить что-то или отвести душу. Не забывают своих учителей и бывшие ученики.
В любви, согласии и взаимопонимании Вонгуевы прожили 50 лет. Здоровья вам и низкий поклон от всех учеников, Людмила Алексеевна и Ким Андреевич!