Яханана харто’ паӈгудо’ теневана’’, харто’ вадамдо’ мэта’’ хибярина’’ хусувэй ӈэсынана таня’’. Тарця хибярина’’ харто’ тенздо’ культурам’ тю’’ури’ пэрӈадо’. Харто’ ӈэсынандо’ фольклорный группахана хыно’’ӈа’’, ханяӈы таравась’ ӈобкана ма’’люрцеты’’.

Краснойхана ӈод’ маля юкад’ вата по’’ ямбан «Нянэй сём’» нюбета фольклорный группадо’ культура’ харданандо’ манзаямда минреда. Таняна нянэй не’’ хыно’’манзь’ ма’’люрцеты’’. Харто’ ӈэсынандо’ хусувэй хэбидя яляхана нито’ сею’’ ихиня’ сомбой сёхона’’ маймбтебсетыдо. Хойхана манзарана’’ ненэцие’’ е’’эмня программы’’ хамадабсеты’’. Тыбэртя’’, хойхана мядм’ манзаям’ минрена’’ нидо’ ӈэсыхына мэваханандо’ ӈобкана ма’’лабсетыдо’.

«Нянэй сё» фольклорный группахана хыно’’та’’ не’’ харто’ хамандавы’’ манзаидо’ манэ’’лабтавась округна еркы’ март’ турцеты’’, ханяӈэхэна ӈэсыхы’ тэворцеты’’, тикы’ хавна тамна ӈани’’ ян’ ӈэдалёрмадо’ танесеты’’. Сян’ по’’ тяхана «Нянэй сёхона» хынотина’’ хэвхы’ округан’ тэворӈаць, Саля’хардахана ваеравы ӈэрм’ ненэця’’ фольклорный фестивалькана харто’ сёдо’ мэ’’ӈаць.

Санкт-Петербург’ маркана «Малахитовая шкатулка» международный конкурс- фестиваль’ яндахат’ турта’’, хуркари’’ тенз’ мэта’’ хынокад’ ненэцие’’ ма’’лабсеты’’. Тюку по’ тарця ма’’лёвадо’ нюдя пэвдэй ирий’ нябимдей’ яӈганя маттамдэй’яӈганя’ толыр’’ ӈэсонд’ миӈась. Маня’’ округва’’ тамбир’ ӈарка фестивалькана «Нянэй сё» манэ’’лабтабидась. Красной’ ӈэсы’ тер’’ некоцина’’ хынокад’ ӈэвамдо’ таняна манэ’’лабтаць. Маня’’ нина’’ сидя сём’ мэ’’ӈаць. Сававна хыно’’мамдо’ ед яхана’’ нюртей степени’ Диплом’ тэвраць. Санкт-Петебург’ март’ ӈэдалёрмандо’ е’’эмня есядамдо’ ООО «Малибу Майс» ми’’мысь, округханана ӈэрм’ ненэцие’’ серу’ тасламбада отделкана манзаранина’’ ӈод’ Краснойхана манзарана’’ нина’’ хусувэй серкана нядабавыдось, няндо’ хынокад’ нина’’ ӈарка вади’’ мэ’’ӈаць.

«Нянэй сё» манзаям’ нерня’ минренаӈэ’ нюртей яляхад’ Екатерина Петровна Тайбарей тара. Пыда нида’’ хыно’’манзь’ ма’’ламбида, пыда хаӈэхэна мэта’’ сёто’ вади’’ падбасеты. Санкт-Петербургхад’ то’’омахадандо’ Екатерина Петровна тарця вади’’ хэтась: - Сян’’ яля’ ямбан ӈарка маркана мэваць. Фестиваль-конкурсхана хыно’’ӈаваць, тикахад’ тамбир’ паской мар’ манэ’’ӈаваць. Хэхэ’ мят’ тюӈгаваць, нерня серуна’’ сававна мима’’ ед’ вади’’ мэ’’ӈаваць. Ӈока’’ несэй, ихиня’ сомбой ӈамгэм’ манэ’’ӈаваць, намдаваць. Сава ихиня’ мякана’’ тэвынаць. Тарця конкурсхад’ то’’омахадана’’ нерня манзаравась ныхыдава’’ нэкалтархава’’. Хар’’на манзаина таминдя’ сававна пэрман’ харвабцова’’ ӈокамдарха’. «Нянэй сёхона» хынота’’ нина’’ пэдова’’, няндо’ ӈод сава вада’’.

Краснойхана илена’’ нина’’ ӈарка манзаям’ пэрӈа’’, хари’’ тенз’ вадамдо’, культурамдо’ тю’’ури пэрӈадо’. Харто’ яханандо’ илена’’ хибярито’ е’’эмня хусувэй хэбидя яляхана ихиня’ сомбой манзаи’’ манэ’’лабтабасьты’’. Маня’’ нина’’, ӈоб нерня тарем’ пэрӈара’’.