«Печорянкам’» нюбета конкурс’ яханана самлязимдеймэвна ваерась. Тюку’ мэвахана Межрегиональный конкурсӈэ’ ха’’мыць. Маня’’ округна’ хавна мядондина’’ Архангельской, Мурманской областьхад’, Ижевскхад’ таняць.
Таняхад’ товы’’ не’’ ӈацекы’’ мэбе’’мамдо’ яханана илена’’ нито’ поӈгана манэ’’лабтамбидонзь. Ӈокханда ӈоб’яӈганя пирибця’’ поӈгнандо’ пирдырмась’ тарпыдаць, хуркари’’ тенз’ мэта некоця’’. Хабене’’, нянэй некоця’’, ӈысма’’, устьцилем’’, башкиро-татарка, удмуртка харто’ тензандо’, паӈгуто’ нямна ӈока вади’’ мэ’’ӈаць; хыно’’ӈаць, тарабцо’ манэ’’лабтабиць. Мал’’ пыдо’ харто’ тенздо’ традиции’’ теневавы’’, харто’ вадамдо’ мэ’’ӈа’’.
Хусувэй конкурсхана нянэй некоця’’ танесеты’’. Тюку’ мэвахана няхар’’ нянэй некоця’’ сценан’ тарпыдаць. Мария Бобрикова Несьхад’ товысь, пыда харта ӈэсынанда ненэця’’ вадам’ пэртя тохолкодаӈэ’ манзара , Римма Нюрова, Кристина Латышева тедари’ Нярьяна маркана социально-гуманитарной колледжхана тоходанаӈаха’. Маня’’ пирибцина паӈгуто’ нямна лаханаць. Мал’’ пыдо’ выӈгана мюсерта’’ ненэцие’’ мякана соявыць, хойхана вадювы’’. Хой’ илм’ теневана’’, мэнена’’ пирибцяко. Хойхана вадювы’’ ӈацекы’’ нюдякодандо’ нисянадо’, небянадо’ нядабасьтыдо’. Тарем’ не ӈацекэр’ маля самляӈг’ покоцяданда нибямда ня’’амбась теневасьты, ютьямна сэдораӈгу, небянда’ хэвхана ӈамдёсь ӈухукодамда сэдгу, ембтадава. Тамна вадёхая маля ютъямна нянэювна сэдораӈгу, небямда нядабаӈгу. Тарем’ ӈод Мария Бобрикова, нюртей ӈухукомда самляӈг покцянанда сэдвэдась. Тамальӈгана небянда, нисянда хэвхана’ Канин’ вымна мюсермысь. Римма Нюрова ненэцие’’ тюнтавам’ манэ’’лабтась.
Конкурсхана мэвы’’ не’’ ӈацекы’’ малӈэ’ саваць. Малӈэ’ паской, мел’’, и’ӈудота, паӈгудо’ тенена, вадамдо’ теневана. Савахартад’ савамдо’ тэрась, «Печорянкаӈэ’» нюмдесь незел’ нись’ӈа’’. Тарця манзаям’ жюри минредась, хибяри’’ ӈод ивняндо’ ӈэда пирибцям’ нюмдембиць.
Сямянд’ мэбетаӈэ’ тюку по’ хамандавы конкурсхана Олеся Полатова тарпыць. Тикы пирибцяко округна мядонда, пыда Удмуртияхад’ тось. Ижевск’ маркана иле, тоходана. Тюку по’ конкурс’ печорянкава ӈани’ март ӈэдалэяць. Победитель почетной лентам’ Олесян’ Наталья Ануфриева (Тайбарей) сярадась. Тикы некоця сидя по’ тяхана ваеравы конкурсхана нердесь.
Хусувэй конкурсхана мэвы’’ некоця’ харта нюмдамда ми’’ӈаць – «Завлекашаӈэ’» Кристина Латышева хаясь, «Берегиня» – Римма Нюрова, «Песенницаӈэ’» Мария Бобриковам’ нюмдець.
Тамна ӈопой конкурс’ пуняна хаи. Тикы яляхана таня товы’’ хибяри’’ сававна нылэйдаць, хусувэй ихинянда маймбись. Теда, сидя ёнар’’ самляӈг яӈганя похона «Печорянкава» сидна’’ ма’’лаӈгу’’, тикы ялям’ ӈатеӈгува’’. Пирибцяко’ ӈани’ конкурсан’ хамякода’’.
