Тайна хунандо’ мякандо’ тэвыд’’. Тэсяда Нисяндо’ ябтако якэда ӈадимя, манзь ханада: – Тюкохобида’’ ненэй ты’’ ӈамза’’ ӈэдараха’’. Ханяд хойда’’? -Хаби вэсако’ Ий сӈэдараха, таныртаданда ӈани’ нюдя тидява’’ мэ’’мы’’. Маня’’ хадаӈгува’’.

Нисядо масьнё’’: – Хаби вэскако’ ий ӈэхэвабта таня хэя. Нисяндо’писиденян си’’ив ябта нюда нисяндо’ муно’ ирманя Харюциндо’ ня’ хая’’. Тад ялмандо’ наӈэдя сырандо’ ядавари сер’’. Тарем’ миндяхандо’ ӈаво таняхуна нидо’ пыркыбтадоць ӈобт’ сулмыд’’, сидя тынзь’ хабт тэхэюдо’ хаӈаха’. Нюдя Харюцидо’ ӈопойӈэ неда’ мюмня хая. Тайна хунанда пи’ сава ерня хаби вэсаконда ий’ мят’ вэн’ нюдрев’ ӈани’ тю, пи’ ямбан’ пелей’ няӈы тюмю вар’ хыдарадан’ туё’’ӈа.

Хубтахана не маманода: – Тедахава харта вэвава, неняӈг’’ мальцякомд мэць пыида, вануда лэбтана ханм’ сидя тынзь’ хабткохона мэтнакы. Мюд’’ нулиаб’’ юр’’ тибян’ нулаӈгая. Ӈамгэмда харамда вэрку’’манава’’, ӈани’ мюселъяд’’. Тарем’ сырпато’ нерандо’ няна няхар’’ ю’’ мя’’ – ӈадядо’ яхандо’ та’ нултадо’. Хаби вэсако’ Ий нюдя Харюцимда нянда хаӈада: – Саць ӈэдалёван’ харвасетынанё’’ – теда’ ӈэдалад’’: Няби ӈэр хан’ ябцо’ тэлахад таная, няби ӈэр’ пыя’ ядахад таная. Вадо’ ня’’ван нултаир. Вад’ махахад синя’ туёс’’, пэяр тасий марико сырахана токадарӈая. Хасев’ ня’ тэвмахаданд хано’ пыяха’’на ян’ туёс’’. Ервотахандо’ манъин: – Хаби Вэсако’ ий’ ӈэдаряртм’. Тадахава ӈэдалад’’, тэхэюд пирби’ ӈэсонд’ тянабахаюн’’. Нянда вато’ сер’ сертамахаданда, нюдя Харюци мяканда ӈэдалэй’’. Ю’’ тибя ӈэсонд’ нултада. Тарем’ сырпато’ пунда няюна парабтахая ӈэдаравы ӈоб’’ мюд сяйна. Мюд’ нябтит’ тэвава’ сер’ Хаби вэсако’ ий ма: – Ӈопой хасава’ няюмна хань’’.

Таддикахад Хаби вэсако’ Ий нюдя Харюцинда няна хая, няханда вахалъй’’: – Неданд мюня ӈамгэм’ манэ’’ӈан? Я таняюв’ сылахарад’’. – Мяды манэ’’ӈадм’. Хаби вэсако’ Ий сидя ӈоталмамда ӈобт’ пейде – сидя тынзь’ хабт тикахана, нита ӈобт’ сулма’’ма яхана хохортаӈаха’. – Тэхэюд яха’’, ӈамзиди ӈаван’’. Нянандо’ сеня’ нивы ӈэбат хун’’ ӈавэн’ си’’ив мяӈгацяр тутнакы’’?

Хаби вэсако’ Ий сидя ӈоталмамда ӈани’ пэйде. Тэсяда иринда мя’’ ӈадимя, тыда ӈокамы’’, якэда няӈормы. Тарцям’ мание Хаби вэсако’ ий ӈани’ тарем’ ма: – Сеня’ сидда’’ табламба’’манда е’’эмня Тэсяда вэсако сававна илелъй’’. Сидя ӈоталмамда ӈани’ пейда – синё саркада, сэв’ малувна ӈадядако яӈгу. Хаби вэсако’ Ий ваб’’нанда ма: – Ханондаӈгува’’. Нид илеӈгуд’’, Вы’ Харюцир, сидя некар нисякондо’ ня’ илеванда’’ ни’’ӈа’’ – ея мяцавэй’ ӈэвакуто’ нид таня палалаӈгу’’. Хаби вэсако’ Ий нюдя Харюцихинда самбляӈг ю’’ тым’ ми’’ӈа, ма: – Тад нерня’ Харюциӈэ няби ӈэта’’ яда илеӈгуда’’.

Тадахава яхато’ пядо’. Та’ илелъяд’. Хаби вэсако’ ий нув’ хэхэӈэ хая, неда яляӈэ хая. Нюдя Харюци илебям’ пэртякоӈэ я’ ниня хаи.

Та’ малда.