Няхаромдэй тад манэ’’манда ӈоб’’ не есякохотата ӈадяда яӈгу, тю’’уй сюрням’ ядэланараха. Тайнанда хунананда Сидя Сэрм’ Мэта мята хэвувна мюдм’ сюртеда. Хасава’ мята мюня небяда, не няда танявэхэ’.
Няхар’’ пом’ мэ’’ӈа’’. Сидя Сэрм’ Мэта не нюм’ хо. Хасава ӈэвы. Сы’’ны ӈэбто’ ӈод’’ нюди’ ядэртаӈэ хая. Хубтахана нехэнда ма: – Тюку яля’ мядонзь хандава’’.
Мяк’’ хая’’. Нерандо’ няна ӈоб’’ мя’’. Мяд’ хэвхана ю’’ вандако. Ханиди’ сярӈаха’. Сыра салмуй. Хуерябт ты ядама, вэн яда’’махарт яӈгу. Мят’ тюӈаха’. Вэсакохо’, пухуцяха’ ӈоб’’ ёхорт’ намдавэхэ’. Вэсако ма: -Нюд’’ тю’’. Едар пире’’.
Ӈамгэ пирка’’на пихиня сеӈга’’ тёры’’ лаванодо’. Пухуця пин’ сырӈа,тёрей’’: – Вэсаков’’, тидяната яхана Ханта нюми товы, неямда тавы. Хасава мята синд ханамда мэда. Не ва’’аванда тер пелей’ нямна лехэбтэйда. Едамдо’ ӈамадо’. Хонэйд’’. Хуняна Сидя Сэрм’ мэтанд немада хая. Пихиня ламбэй’’ пи’’нари’’. Пин’ тарпы’’. Пухуця ӈани’ юд’ хурёдам хамэдавы. Сидя Сэрм’ Мэта ненда ня’ мяканди’ хаяха’.
Няхар’’ по’ ӈэсоӈгана ӈоб’’ ӈэдалёда то. Хан’ӈэ ӈэван’ ӈэда хэбилеры’’. Сяквавнанда нохо’ сяд хэв’’ хэвананараха’’. Хэвувнанда нултада. Мяцавэй ненэць’ маси’’: – Хибян ӈэбат. Теда тю’’у миндя ненэць’ ӈэвэн. МЯкад пухуцяда ӈадимя: – Сидя Сэрм’ Мэта нена’’ са’’лананё. Тикы небой надоранё’’. Не нянда савакм’ екада. Мят’ тюледа. Не ӈани’ ма: – Нянд хан ӈэдад. Ӈопой пихив хасава сеӈга. Хуняна Сидя Сэрм’ Мэта ӈоб’’ ямб мюдм’ хамэда, не нямда хасава ханада.
Сы’’ны ӈэбто ӈод’’ Сидя Сэрм’ Мэта пухуцяханда маси’’ ирини сэвада ӈадимя’’. Мэтари ханоти’ ӈэдалэйха’. Тайнанди’ хунанди’ ирихиюти’, хадахаюти’ мя’’мна ӈадимяха’. Ӈока’’я’’ ты’’ мядм’ синдавы’’. Тыди’ ӈэдэйди’. Мякы мякана вэсакохо’, пухуцяха’ ӈоб’ ёхорт’ ӈамдавэхэ’. –Пухуцёв’’ нюхуюд тоӈаха’. Едар пире’’.
Едамдо’ ӈамадо’. Вэсако ӈани’ вахалъй’’: -Сидя Сэрм’ Мэта ӈока тэр яӈгунё’’. Пихи’’ ты’’ хуняна мяканди’ танаиди’. Пелей’ няӈы падвы вэно’’ небям’ танырцянданд ханаир. Мани сидяни’ ӈани’ ниди’ хоӈгу’’. Е’’эмнянд ӈадимядамзь. Тад нерня’ вы яхананд илебям’ пэртяӈэ тараин.
Хонэйд’’. Хуняна ӈаворо’’махадандо’ вэсако пин тарпы’’. Ӈока’’я’’ тыда падвы вэно’’ небяхана сябаръяда. Тей то’’ма’ ӈу’’мананди’ тидахалейди’. Сидя Сэрм’ Мэта ханамда подерӈада. Вэсако вахалъй’’: – Ӈэдалава’’ пирка’’на хэб’’нянди’ пуня сырӈади’. Тикы нерцю нёди’’ сыр’’.
Хасава ты’’ пумна ӈэдалэй’’. Иринда тавы вэнекода нись табэдамбю’’ илебя ёнарм’ харта танабида. Ӈэдалава’ пирка’’на хаяха’. Нултади’ вэсакохо’ пухуцяха’ мяти’ пала’’мари ӈади.Тэри ӈэлта ӈэвады. Ӈани’ ӈэдалэйха’. Тайнанди’ хунанди мяканди’ тэвъяха’. Минревы тыди’ тамна ӈокамы’’. Хойко’’ пана’’, сэхэко’ пана. Та’ илелъяд’’.
Та малда.
