Ӈэрм’ яхана ты’’пэрма сер’ ӈахы’’ похот’ миӈа’’. Нянэй ненэця’’ ӈод’ янда’’на’’ илебнандо’ ӈод тыдо’ пэрць ӈока по’’ ямбан мюсерӈа’’. Тыдо’ лэтби’’, ямдо’ сахарамби’’, нюкцидо’ вадамби’’, харто’ иламдо’ мэ’’ӈа’’.

Сямбир’’ я’ниня’’ таремъюв’ иле, хибяхарт’ нида’ хэтгу. Сян’ ёнар’’ по’’ ӈэдакы? Иринана’’, нисянана’’ сер’ иле, ханярина ненэця’’ нерня минредо’. Тына’’ толыр’’ хусувэй по’ ӈокамдана, валакада ты’’ хадырць’ ява’ тянёмдана. Ханяӈы яда’ нядэйсяламзяна. Хойхана мюсертина’’ тенева’’, валакада нядэй яхана ты’’ хасена хадырӈа’’.

Тены похо’’на ӈод’ ты’’пэртина хойхана манзара’’. Ӈарка хасава’’ хэвхана ӈацембой ненэця’’ манзара’’. Ӈокаюв’ тарця хибяри малӈэ’ паӈгудо’ хойхад’ пере’’. Пыдо’ тамна иринато’ нися’’, иринадо’ тэхэна’’ илебэй’’. Мал’’ тарця ӈацекы’’ нисянадо’ ты’’пэрма серт’ тохолавы’’. Тарця хасава’’ округна хусувэй сельскохозяйственный кооперативхана, семейно-родовой общинахана ты’’пэртяӈэ’ тара. Тарця ӈацембой ненэця’’ «Няръяна ты» СПКахана манзара’’. Невхэна «Няръяна ты» ӈарка колхозӈэ’ толысь, тыто’ толыр’’ ханяӈэхэна’’ сидя’яӈганя ёнарт’ тэворӈась. Тыдо’ тет ӈэсыхына ненэця’’ ня’’амбидось. Не’’ ӈод хасавидо’ нядабиць, мядм’ манзаям’ пэрӈаць, нюдо’ вадабиць. Таремъюв’ ёнар’’ хасуюёнар’’мат’’ ю’’ тетимдей по’’ ӈэсонд’ илець. Тикы’пуд колхозхана сменный выпас’ мэць’ пяць. Хасавари’’ тыдо’ пэрць хойхана илесь’ хаиць, мяд’ е’’эйӈэ’ ты’’пэртя балокха’ илелъядоць. Не’’ ӈани’ нюсавэй ӈэсыхы’’ илевась ха’’мыдаць. Самляӈг ю’’ по’’ ямбан таремъюв’ иле’’. Невхы похона хойхана мюсермы’’ ненэця’’ вэсэйма’’, ханяӈы’’ маля яӈгумы’’. Нюдо’, нюто’ ню’’ тены’’ похо’’на тыто’ хаю’’ми’’ пэрӈа’’. Тюку ялян’ хэтась колхозхана мат’’ ёнар’’ мян тэкоцядо’, юд’ мян ты’’пэртя’’. Ваеравы по’ пилю’’ ирийхана ты’’ ялям’ мэ’’мана’’ мальӈгана мань’ «Няръяна ты» колхозан’ тэворӈамась. Ӈарка яляхана хасава ӈацекы’’ лаханакурць ня’’айнась. Руслан Ардеев няби Степан Косков нябимдей ӈэсыхы’ ты’’пэртяха’. Пыди’ маля сян по’’ ямбан тэхэна’’ мэ’’ӈаха’. Школам’ ёльцесь, армияхад’ то’’омахаданди’ хоян’ танась ты’’ пэрӈаха’. Минрена манзаямди’ саву’’ӈади’, хойхана илева’’ ивнянди’ ӈэдараха.

Тикы хасавакохо’ нисянади’ ӈопой ӈэсыхына ӈока по’’ ямбан ты’’пэрӈась, ӈоб’«Няръяна ты» нябимдей ӈэсыхына. Алексей Гермагенович Ардеев, Руслан’ нися’ хаса, илеванда ямбан тэхэна’ мэнась, ӈэсым’ нерня пэртяӈэ’ манзарась. Пыда Иван Иванович Косковм’, Степан нися’ хасам’, ты’’пэрма серт’ тохолавэдась. Иван Иванович Алексей Гермагенович ед’ ӈока масьты: – мань’ тохолкодами’. Теда тикы ты’’пэртяха’ хасава нюди’ ӈобкана манзараӈаха’. Харвась тэхэна мэӈаха’, ты’’пэрма серм’ саць’ таранаӈэ’ мэ’’ӈади’. Янамбовна ям’ торомдабихи’, ты’’пэрма серм’ тохолабихи’, ненэцие’’ ватовна илевамди’ мэ’’ман’ харвади’. Пыди’ хавнанди’ «Няръяна тэхэна» малӈэ’ ты’’пэртя’’ ӈацембой’ хасава’’. Тамна неси’. Ӈэсынандо’ пирибтя’’ яӈгударха’’. Недамдо’ хосеявась ӈани’ ян’ тэворпато’ тараван’ хабе’’. Мяд’ терсавэй хибярир’ тамна мэёвна ты’’пэрма серм’ нерня минреӈгуда. Тарця ӈэ’’нив.