Тюку по’ нюртей ирийна еркы’’ яля’’хана Коткинохона илена’’ хибяри’’ харто’ ӈэсындо’ со’’яма ялям’ мэ’’манзь ма’’люрӈаць.

Тикы яляхана ӈэсын’ мядонда’’ яндахат’ товыць. Ӈока сава вади’’ таняна иленаха’ хэтаць: Заполярный район ервӈэ’ тарана Алексей Михеев, округхы’ Собрание депутат’ А.Безумов. Тикахад’ ӈарка концерт’ ваерась: ӈэсынандо илена’’ хибяри’’ нито’ е’’эмня хыно’’ӈаць, тикахад’ Вискахад’ товы коллектив харта программамда манэ’’лабтась. Нельмин саляхад’ товы’’ «Маймбава» ансамбль’ ненэця’’ тараць. Тикы яляхана Коткинона илена’’ хибяри’’ ӈока ихид’ миндя’’ вади’’ намдаць, мядонзэйм’ ня’’амаць. Ӈармбэй хибяридо’ ӈод ниць юр’’, пыдо’ манзаравандо’ нямна сейхад’ миндя вада’’ тянё ниць’ӈа’’.

Коткино сидя юр’’ си’’ив ю’’ пода панысь. Тикы ӈэсы саць паской яхана ну, пэдара поӈгана. Сава хибяри’’ тикы ӈэсыхына иле’’, хусувэдо’ харта манзаянандо’ манзара’’. Ӈэсыхыд’ хибяридо’ сава илм’ пюрманзь ни’’хантан’. Пыдо’харто’ ямдо’ сахарамбась ӈэсынандо’ иле, нюдо вадамби. Танок по’’ ямбан ӈэсыдо’ ӈарка ӈэсыӈэ вады’’. Культура’ хардадо’ таня, ӈэсынандо ӈарка школахана ӈацекы тоходана, садикдо’ таня, лекарь’ мято’. «Сула» СПК нюдя ни’’ӈа, хоровидо’ пэрӈа’’. Тикы ӈэсыхыд’ тэвравы’’ хорова’ юр’’,молока’ март’ тэворӈа.

Ӈэсы’ тер’’ сава ихиня со’’яма ялямдо’ ядабтадонзь. Тад’ нерня ӈод Коткинохона илена’’ хибяри’’ ӈэсымдо мэнесь ябда илея’’, сенз’ ӈэя, хусувэй серудо’ саваривна миӈая’’. Хибяри’’ манзаядо’ таняя’’, ӈацекыдо’ яханандо’ сояӈгая’’. Сава илм’ мэ’’ӈая!