Нянэй ненэця’’ ӈацекына харто’ вадамдо’ школахана тохолабидо’; ханяӈы ӈацекы’’ небяхадандо’, нисяхадандо’ вадамдо’ намдурӈа’’. Ӈацекына харто’ вадавнандо’ толаӈгось’ тоходана’’. Тюку яля’ К. Лабанаускас’ падвэвна Таймыркана ӈэда ямидхы лаханаком’ харто’ толамдо’.

Ямидхана тикы ява’’ ӈылекахат пан’’мы. Ненэй ненэця’’ тю’’уй тир’’ нимня ядэрць нивэду’’ пирас’’. Я ваӈгхана илесятвы. Ся’’ны ӈэбта ӈод’’ пухуця’ вадана Ёмбо танявы. Мяти’ ӈоб’’ саля’ ниня падлёвы. Ӈобӈгуна Ёмбо маниеда: сюдбя вэсако мяканди’ миӈа. Тад Ёмба паркасипой пин’ санэй’’, ханкомда нэкалӈа. Надо’ ни’ танэй’’. Тикы’ пуд хайхалъй’’.Сюдбя вэсако’ хэван’ тэвы’’, ман’’ма: – Ада, ӈада, Ёмбо’ хан, нулад’’! Иринд хэван’ тэвыни’. Тад Ёмбо’ хан тикэн’ хасеръй’’. Сюдбя вэсако ма: – Абэй, ӈабэй, тикы ханар ӈули’’ сава ӈэвыню’’! Ханзер’’ харета миӈа? Хандан тад! Мань тэмдаӈгув.

Ёмбо ма: -Ирикэ, тэри тарем’ татав. Пыдар ӈопой яля’ хунанд ханад! Паныд ӈани’ тюкона хаен’’! Паркасипой вунин ханидм’’. Мань паркасипой тюку ӈарка ям’ ӈопой яля’ вэкана сюрхалесятыв.

Тад тикад сюдбя вэсако паныда екэйда, хая. Тарем’ миндяханда ӈаяда сырадарев’ хая. Пыда ихинянда ма: «Ӈули’’ ӈаркавна мань ханимядм’.»

Тад хананда ни’ ӈамды’’, манив: – Ёмбэко’ хан, хань’’, хань’’! Ӈули’’ ханимядм’. Ёмбо’ хан ханяхарт хэван’ ни харва’’. Тад сюдбя вэсако тикыри яхана ханимзь яӈгума. Ёмбэ’ инда вато, тарем’ лахана:

– Сёнзя хамбол’’ӈэ, ти хуркавна сит хададм’. Тикы пуд Ёмбо хадамда яминя пухуцяӈэ сертада. Пыда ӈани ӈарка Явмалӈэ ӈамды’’.

Та валакад.