Вэба’’ ирий’ нюртей яляхана ханярина илена’’ ӈацекы’’ тоходанась пядось. Хойхана мюсерта’’ ненэця’’ ӈацекы’’ ӈод та’ ямбан нисянато’, небянато’ хэвхана выӈгана иле’’мяхад’ харто’ тоходанва’’ яхато’ янамбовна тэвотыд’.

Хэвхы округхана вымна мюсерта’’ ненэця’’ тамна ӈока, пыдо’ нянэй ненэцие’’ невхы илм’ мэць мято’ терсавэй мюсерӈа’’, тыдо’ пэрць нянэй мякана иле’’. Я’малкана тюку по’ няхар’’ ёнар’’ самляӈг юр’’ мюсерта’’ ненэця’’ ӈацекы’’ тоходанвась тэвбато’ тара’’. Теда хусувэй районхана ӈацекыдо’ школан’ хэвась ма’’ламбидо’. Приуральской районхад’ тет юр’’ сиднтет ю’’ мат’’ ӈацекы’’ тюку по’ тоходанась пяӈгудо’, тикы толыркад’ юр’’ си’’ив’яӈганя ӈацекэця нюртей по’ парта’ тя ӈамдгуд’’. Вэба’’ ирий’ юдимдей толыр’’ ӈэсонд хусувэй ӈацекы’’ тоходанась пябнанда тара’’.

Тюку яля’’хана округ’’мана си’’ив яӈганя тохолкода’’,воспитатель’’ ӈацекыдо’ школан’ ма’’лабась вымна’ тиртя ӈанохона тирӈа’’.

Ӈокханда Я’малкана нюртей по’ школан’ товы’’ ӈацекы’’ толыр’’ – си’’ив’’ ёнар’’ няхар’’ юр’’ сиднтет ю’’ ӈопой ӈацекы’’.