Маня’’ округханана маля самляӈг’яӈганя по’’ ямбан «Суюкоцям’» нюбета литературно-творческой объединение манзаямда минреда. Тикахана ма’’лёда’’ ӈацекы’’ паднава серм’ хорпи’’. Тарця сава сер’’ юкад’ вата по’’ тяхана паднана няхаюна Прокопий Андреевич Явтысый, Алексей Ильич Пичков нэвэдись.

Пыди’ нянэй паднана ненэцяӈгахась, хусувэянди’ падвэда тянё ванься ӈа. Пыди’ падвы манзаямнанди’ тюку яля ӈацекы’’ тоходана’’.

Теда хойхана мюсерта’’ нина’’ тэтнава’’ ялудо’ мэ’’ӈа’’. Ты’’ пэртя’’ ненэця’’ ялэ’’, пи’’ ямбан тэхэнато’ мэ’’. Выӈгана ты’’ ниць ёльць. Хусувэй яля’ сую’’ ӈадимберӈа’’. Ты’’ ниць ирийна еркы ялян’ таслась округханана мат’’ яӈганя ёнар’’ сую’’ соявыць. Ӈокханда ты’’ толыр’ мат’’ ю’’ ёнарт’ вадёбнанда тара.

Не’’ ӈод хасавидо’ нядабась мякана илевамдо’ минредо’. Ханяӈы ӈэсыхына ӈацембой некоця мяд’ манзаям’ пэртяӈэ’ тара’’. Тарем’ «Ижемский оленевод» кооперативхана.

Ты’’ ниць ирийхана маня’’ сидя сава няхаюна со’’яма ялуди’ мэ’’ӈахась. Тюку ирийна 15 толыркана Роза Ивановна Канюкова- 75 помда ядабтась, 16 яляхана Анастасия Федоровна Михайловна 70 пода паны. Пыди’ нямнанди’ тюку яля паднадм’.

Леонид Иванович Худи Ямалкана соявы ненэць, паӈгуда ты’’пэртяхат’ пере’’. Ӈодьбянда ты’’пэрма серм’ саць савовна теневада. Тарем’ еримбнанда пиликов’ хой’ няку тэворцеты.

Маля ӈахакуд’ Леонид Иванович Ямалкана мюсерта’’ ненэциета няюв ӈобнзер манзаямдо’ минредо’. «Союз оленеводов Ямала» мюсерта’’ ненэцие’’ е’’эмня сертавы’’, тикы Союз’ ӈэвахана мэнаӈэ’ Леонид Худи’ тара. Пыда няюв тарця лахарёми’ танясь.

Хойхана мюсерта’’ ненэця’’ ӈод ханярид’ товыць. Приуральский, Ямальский районхад’ товы’’ хой’ тер’’ ненэця’’, не’’ сэвхана маниеб’ савархась. Мал’’ пыдо’ харто’ ембдяродо’ мэць товыць. Паской паны’’, мальця’’, пива’’, сава’’ сэвхана ябирець. Ханудо’ нянэй хан, не харто’ ханудо’, малӈэ’ падтавы’’. Нюкцидо’ сомбой мальци’’ мэ’’ӈа’’, не ӈацекэця панытаць.

Нина Ивановна Худи Саля’хард’ тер не, хусувэй по’ ты’’ пэртя ӈарка ялян’ турцеты. Пыда ӈобтарем’ сойхана соявы, вадювы. Нянэй не ӈэвада ӈади, паской паным’ мэць ядэрӈась. Хэбидя яля’ нямна тарця вади’’ хэтась.

Я’малкана илена не Н.М.Янгасова ненэцие’’ вадако’’, сюдбабц’’, ярабц’’ ӈобт ма’’лась книгаӈэ’ сертавыдась. Тарця книгада сидя ёнар’’ нюртей похона тарпыць. «Сюдбя Хэтанзи» сюдбабц’ ӈод тикан’ еримысь. Ярабц’ пелям’ тамна толара’’.

Няхар’’ ю’’ хасава, теда’ нянда’’тэд маноӈада’’. Няхар’’ ю’’ тым’ ханани пуня’ пэнъян. Пэё’’махадани, Ӈарка Санэре’’э манзь ханада: – Теда’ мякана мэхэва’’.

Нерняна товнда яляхана Саля’хардахана Всероссийский ассоциацияна съезд’ манзарась пяӈгуда. Ханярид’ товы’’ хибяри’’ таняна манзараӈгу’’. Ассоциацияна тет по’’ ямбан манзаравам’ таслаӈгу’’, тикахад’ тэранзёва ваераӈгу’’.

Тюку’ мэвахана президентадава, тикахад Координационный Советхана манзараванди’ тэрабаӈгу. Маня’’ округна делегация’ таняюв’ ӈэдалаӈгу’’, ӈарка ассоциацияна ма’’лёвахана манзараӈгу’’. Хэвхы округхана ваеравы съезд’ нямна вадина нерняна тамна падвы ӈэӈгу.